PRIMER LIBRO DE CR%D3NICAS 18 - Wuj Pa K'ubultzij

U'anik jalajuj taq ch'oj rumal ma David

¹ Chrijil chik ile, ma David xu'an ch'oj chkij aj Filistea xaq xeuch'ako, xu'an taqon chke xaq xumaj i tinimit Gat chke junam ru' i jalajuj taq ukomon.

² Xaq xeuch'ak aj Moab, xu'an taqon chke, xaq xu'an chke chi kkitoj i alkawal che.

³ I ma David xaq xuch'ak ma Hadad-ezer, chi ajawinel re i tinimit Soba, chi o pusuk' i tinimit Hamat, are enam re chumajik i ulew chi o chi raqana Éufrates.

⁴ Are uri ma David xumaj lajujwinaq kamo' (1,000) ch'ich' re anb'al ch'oj che ma Hadad-ezer, xaq xeuchap b'i lajujwinaq wuqlajujmo' (7,000) achiyab' chi je yij che i ch'oj ajrij taq kaway, xaq lajujmo' kachiy (20,000) achiyab' chi je yij che i ch'oj chi keb'in chaqan. Xwi ta la ile, xaq xu'osij kaqan i kaway chi kejek'aw b'i ch'ich', xwiri xu'osij ti kaqan i jub'an chi keajwax chujek'ik jo'winaq (100) ch'ich'.

⁵ Are uri xeupon aj Siria, chi ukwenta i tinimit Damasco, chuto'ik ma Hadad-ezer, chi ajawinel re i tinimit Soba, xwiri ma David xeuch'ak aj Siria man xeukamsaj jo'lajujmo' kachiy (22,000) achiyab' chke.

⁶ Te'uri ma David xukoj chajal pa tinimit Siria chi ukwenta Damasco, are uri aj Siria xekanaj kan pu'ab' ma David xaq xe'ok chutojik i alkawal che. Keje uri ile chi Ajwal kuya i ch'akanik che ma David xaipa k-e wi.

⁷ Te'uri ma David xumaj i tob'al ib' an-o'oj chke i rajpatan ma Hadad-ezer, xaq xuk'am b'i pa Jerusalén.

⁸ Xaq xumaj k'iyal taq anch'ich' chi o pa ulew Tibhat xaq pa ulew Cun, chi je ukwenta utinimit ma Hadad-ezer. X-on panoq i ma Salomón xukoj i anch'ich' le are xu'an i nim laj pila re i k'olb'al ya, raqan ja xaq ronojel i chapanb'al chi anch'ich' re i rachoch i Dios.

⁹ I ma Toi, chi ajawinel re i tinimit Hamat, are xretamaj chi ma David xeukamsaj konojel i winaq chi je yij che i ch'oj re ma Hadad-ezer, chi ajawinel re i tinimit Soba,

¹⁰ are uri xutaq b'i uk'ojol, chi ma Adoram, ru' i ajawinel ma David chuya'ik rutzil uwach xaq chuya'ik u'ij rumal xuch'ak ma Hadad-ezer che i ch'oj, man ma Toi xaq u'anom ch'oj chrij ma Hadad-ezer le. Rumali chi xusipaj k'iyal taq b'iroxik chi an-o'oj, saq-o'oj xaq anch'ich' che ma David.

¹¹ I ma David xujach ronojel i b'iroxik le pu'ab' i Ajwal junam ru' i an-o'oj xaq i saq-o'oj chi uk'amom pa jalajuj taq tinimiti: Edom, Moab, Amón, Amalec xaq kitinimit aj Filistea.

¹² Xwi ta la ile, xaq ma Abisai, chi ralab' ati Sarvia, xeuch'ak jo'mo' kachiy (18,000) aj Edom chila chwa “Ta'aj chi Atz'am” ub'i.

¹³ Te'uri ma David xukoj chajal pa tinimit Edom, are uri konojel aj Edom xekanaj kan pu'ab' ma David. I Ajwal kuya i ch'akanik che ma David xaipa k-e wi.

I je rajpatan ma David

¹⁴ Ma David xrajawin puwi ronojel i tinimit Israel, i u'atb'al tzij lik suk'ulik pacha kmajawik.

¹⁵ I aj-atzil ke achiyab' chi je yij che i ch'oj are ma Joab, chi ralab' ati Sarvia; i ma Josafat, chi uk'ojol ma Ahilud, are rajtz'ib' i ajawinel.

¹⁶ Ma Sadoc, chi uk'ojol ma Ahitob, xaq ma Ahimelec, chi uk'ojol ma Abiatar, je are ajsujul sipon; ma Savsa are ktz'ib'aw ronojel ni'pa kk'ulmax che jun ij,

¹⁷ i ma Benaía, chi uk'ojol ma Joiada, are aj-atzil ke achiyab' chi je yij che i ch'oj aj Creta xaq aj Peleteo. I je uk'ojol ma David je are aj-atzil ke i ketow re.