PRIMER LIBRO DE CR%D3NICAS 14 - Wuj Pa K'ubultzij

Ma Hiram xeutaq b'i jub'an ajb'il tzij ru' ma David

¹ Ma Hiram, chi ajawinel re i tinimit Tiro, xutaq b'i jub'an rajchak ru' ma David xaq xutaq b'i je ajanelab' xaq i ajyakol ja, ike le xkik'am b'i chomiq laj taq che' chi chakalte', re anb'al i nim laj rachoch ma David chi ajawinel.

² Are uri ma David xuk'am usuk' chi are i Ajwal x-uluw che i k'ijib'al chi o wi le, chi ajawinel pa tinimit Israel, man u'anom che chi kel chisaq ru' rajawinik puwi utinimit Israel.

I jub'an chik rak'al ma David

³ I ma David xeutzukuj jub'an chik rixoqil chila pa Jerusalén, chi xaq xuk'uwalij rak'al alab'om xaq i altom ku' ixoqib' le.

⁴ I rak'al chi xealax chila pa Jerusalén are kib'i iri: Ma Samúa, ma Sobab, ma Natán, ma Salomón,

⁵ ma Ibhar, ma Elisúa, ma Elpelet,

⁶ ma Noga, ma Nefeg, ma Jafía,

⁷ ma Elisama, ma Beeliada xaq ma Elifelet.

Kich'akik aj Filistea rumal ma David

⁸ Are xketamaj aj Filistea chi ma David xjach pu'ab' i Ajwal man kkanaj kan pa ajawinel re i tinimit Israel, are uri konojel xe'ok chutzukuxik; xwiri are xretamaj ma David, x-e chkik'ulaxik.

⁹ Are uri aj Filistea xkib'isoj ki'enam, xek'iji chwa ta'aj Refaim.

¹⁰ Rumali ma David xutz'onoj che i Ajwal: —¿Kaya nawi chwe chi kin-an ch'oj chkij aj Filistea? ¿Kaya nawi ch'akanik chwe? I Ajwal xub'ij che: —Utz, cha'ana ch'oj chkij, yin kinya i ch'akanik chawe. Keje ile xub'ij i Ajwal che ma David.

¹¹ Ma David xel b'i chila pa Baal-perazim, chila xeuch'ak wi aj Filistea. Rumali xub'ij: “Pacha k-on i ya chi kujaq b'i ub'e, keje x-on i Ajwal ile chwe chi xujaq b'e chinwach chkixol i ajch'oj chwij”; xuya pub'i i k'ijib'al le Baal-perazim.

¹² Xwi ta la ile, aj Filistea xko'taj kan kitiox, i ma David xutaq uk'atik.

¹³ Xwiri i aj Filistea xeupon chik chwa ta'aj Refaim.

¹⁴ Rumali ma David xutz'onoj chik che i Ajwal; are uri i Ajwal xub'ij che: —Matel li chkiwach chu'anik ch'oj, are cha'ana chasutij kij xaq chkij katok wi, are katupon chila ipa o wi k'iyal che' Bálsamo, te'uri chajeqa u'anik ch'oj chkij.

¹⁵ Are kata chi o kb'in puwi taq che', jat uri chu'anik ch'oj chkij, man ile ke'eloq chi Yin in nab'e chawach chkikamsaxik aj Filistea.

¹⁶ Ma David xu'ano pacha xb'ix che rumal i Ajwal, xujeq b'i kich'akik aj Filistea chila Gabaón k'a che i tinimit Gezer.

¹⁷ Rumali chi ma David lik pa ronojel taq tinimit x-etamax uwach rumal wach xu'ano, xaq i Ajwal xu'an chke konojel i winaq re i jalajuj taq tinimit chi kkixij kib' che.