PRIMER LIBRO DE CR%D3NICAS 10 - Wuj Pa K'ubultzij

Ukamik ma Saúl junam ku' i rak'al pa ch'oj

¹ I aj Filistea xki'an ch'oj chkij aj Israel, xwiri aj Israel xe'anmaj chkiwach, man lik je k'i xekam chke chila che i jyub' Gilboa.

² I aj Filistea xeterej b'i chrij ma Saúl xaq chkij i rak'al, are uri xekikamsaj ma Jonatán, ma Abinadab xaq ma Malquisúa.

³ Chrijil chik ile, xkiya kik'ux chu'anik ch'oj chrij ma Saúl, rumali i ajk'aqol ch'ab' xkimaja xaq xkich'ap kich'ab' che.

⁴ Rumali ma Saúl xub'ij che i tol re: “Chawesaj li ach'ich' chi o uware k'ulala, chajila b'i che inpam, man keje ile i je aj-anol i utz taj le ketzen ti chinkamsaxik.” Xwiri i tol re le xraj ti ukamsaxik, man lik kuxij rib' chu'anik. Are uri ma Saúl xuk'am pan uch'ich' chi o uware k'ulala, te'uri xujupij rib' puwi.

⁵ I tol re ma Saúl are xrilo chi ma Saúl xukamsaj rib', xaq keje xu'an ire, xujupij rib' puwi uch'ich', are uri xkamik.

⁶ Keje kikamik ma Saúl ile che i ij le, oxib' rak'al xaq konojel i ralk'uwal.

⁷ I konojel aj Israel chi je jeqel chila che i ta'aj, are xkilo chi xe'anmaj b'i achiyab' chi je yij che i ch'oj xaq xkam ma Saúl junam ku' i oxib' uk'ojol, are uri xko'taj kan kitinimit ipa je o wi, xe'anmaj b'ik. Are uri xeupon aj Filistea xaq xejeqi chila che i tinimit le.

⁸ Chukab' ij are xeupon aj Filistea chumajik kib'itaq ke konojel ni'pa je kamnaq, xkiriq ma Saúl xaq i oxib' uk'ojol je jab'al b'i pa taq es chila che i jyub' Gilboa.

⁹ Are uri xkesaj u'u' ma Saúl, xkik'am b'i ujolom xaq uch'ich' chi o uware k'ulala; te'uri xkitaq ub'ixkil chke konojel aj Filistea xaq chke konojel kitiox, wach xk'ulmaxik.

¹⁰ Chrijil chik ile, xkiya uch'ich' ma Saúl chila prachoch kitiox, xaq i ujolom xkitzayb'a prachoch i tiox Dagón.

¹¹ Konojel i winaq je aj pa tinimit Jabes chi ukwenta i Galaad, are xketamaj wach xki'an aj Filistea che ma Saúl,

¹² are uri xkimol kib' konojel i achiyab' chi lik ko kiwach, xe'e chuk'amik uch'akul ma Saúl xaq kich'akul i rak'al, xekik'am b'i pa tinimit Jabes. Chila xkimuq wi chuxe' jun nim laj che' sik'al. Chrijil chik ile xkimayij wuqub' ij wa'im rumal kib'is.

¹³ Keje ukamik ma Saúl ile rumal umak, xmakunik man xkojon ti che utaqanik i Ajwal xaq rumal xutz'onoj uno'oj che jun ixoq chi knanik

¹⁴ puk'exel utz'onoxik uno'oj che i Ajwal. Rumali i Ajwal xresaj uk'aslemal che xaq xuya i ajawinik che ma David chi uk'ojol ma Isaí.