Samz 84 - Tèstèman nèf-la: Épi an posyòn an liv samz-la

Mwen Anvi Alé An Kay Senyè-a

An sam sé désandan Kora-a

¹ Pa dé bèl Kay ou bèl, Bondyé Senyè, ou ki ni tout pouvwa-a!

² Mwen anvi alé lakay ou. Dézi tjè mwen sé pou wèsté an Kay ou, Bondyé Senyè. Mwen ka chanté épi tout tjè mwen afòs Bondyé-a ki vivan-an ban mwen lajwa.

³ Jis sé sikwiyé-a ki ka jwenn koté pou yo wèsté la, èk sé pijon-an ka fè nich pou yo fè piti yo bò lotèl ou, Bondyé Senyè-a ki ni tout pouvwa-a. Sé ou ki wa mwen, sé ou ki Bondyé mwen.

⁴ Pa dé bon i bon pou sé moun-an ki ka wèsté an Kay ou-a. Yo toujou ka chanté pou glowifyé nonʼw.

⁵ Pa dé bon i bon pou sé moun-an ou ka bay fòs-la, sé moun-an ki ka kontan pou maché lonng lawout-la pou alé Mòn Zayonn-an.

⁶ Kon yo ka pasé an fon sèk-la yo ka kwiyé Baka-a, i ka vini an plas ki ni an pil sous dlo, akwèdi pwèmyé lapli-a ka bay an bennédiksyon.

⁷ Sé moun sala ka ni pli kouway kon yo ka maché alé. Yo ka alé Zayonn pou pwézanté kò yo douvan Bondyé.

⁸ Tann lapwiyè mwen, Bondyé Senyè-a ki ni tout pouvwa-a. Panché tèt ou èk kouté mwen, Bondyé Jakòb-la.

⁹ Bondyé, gadé wa-a ki ka pwotèkté nou-an. Sé li ki wa-a ou ja chwazi-a.

¹⁰ Yon jou an Kay ou pli mèyè pasé yon mil lézòt jou an lòt koté. Mwen simyé wèsté an pa lapòt Kay Bondyé-a pasé pou mwen wèsté an kay sé méchan-an.

¹¹ Sé Bondyé Senyè-a ki klèté nou, sé li ki ka pwotèkté nou. I ka voyé bontéʼy asou nou èk i ka onnowé nou. Lè an moun ka fè sa ki dwèt, Bondyé pa ka wifizéʼy anyen ki bon.

¹² Pa dé bon i bon pou sé moun-an ki mété konfyans yo an ou-a, Bondyé Senyè-a ki ni tout pouvwa-a!