Samz 37 - Tèstèman nèf-la: Épi an posyòn an liv samz-la

Dèstinasyon Moun Ki Bon Èk Moun Ki Mové

Sé an sam David

¹ Pa twakasé kòʼw pou lapéti sé méchan-an. Pa anvi sa sé mové moun-an ni.

² Talè yo kay dispawèt menm kon lè zèb ka sèk. Yo kay mò menm kon pyé bwa ki ka fennen.

³ Mété tout konfyans ou an Bondyé Senyè-a èk fè sa ki bon. Viv an tè-a mwen ba ou-a an lapé.

⁴ Pwan tout pléziʼw an Bondyé Senyè-a, èk i kay baʼw dézi tjèʼw.

⁵ Mété laviʼw an lanmen Bondyé Senyè-a. Mété konfyans ou an li èk i kay édéʼw.

⁶ I kay fè moun wè ou ka viv dwèt menm kon klèté sòlèy lévé. I kay fè moun wè ou ni wézon menm kon klèté sòlèy midi.

⁷ Sé pouʼw ni pasyans èk èspéyé pouʼw wè Bondyé Senyè-a twavay. Pa twakasé kòʼw lè ou wè sé mové moun-an ka pwòspéwé, lè ou wè tout sé vyé plan-an yo ni-an ka maché byen.

⁸ Sé pa pouʼw twakasé kòʼw ében faché. Sa kay fèʼw fè movèzté.

⁹ Sé moun-an ki mété konfyans yo an Bondyé Senyè-a kay éwityé tè-a Bondyé té pwonmèt yo-a, mé Bondyé kay kouwi dèyè sé méchan-an sòti an tè-a.

¹⁰ Sé méchan-an kay dispawèt touswit. Ou kay las gadé pou yo, mé ou pa kay menm jwenn yo.

¹¹ Mé moun ki ka abésé kò yo kay éwityé tè-a Bondyé té pwonmèt yo-a. Yo kay pwan plézi an kantité lapé-a yo kay ni-an.

¹² Méchan-an ka fè konplo kont nonm-lan ki dwèt-la. I ka gadéʼy, i ka anvi manjéʼy.

¹³ Mé Bondyé Senyè-a ka wi sé méchan nonm-lan, paski i kay koupé asou lavi yo.

¹⁴ Sé méchan-an ka hédi fèman yo èk yo ka pliyé bannza yo pou sa tjwé sé maléwé-a èk sé moun-an ki bizwen-an, pou fini èk sé moun-an ki ka fè sa ki dwèt-la.

¹⁵ Mé sé an tjè yo menm fèman yo kay antwé, èk bannza yo kay kasé.

¹⁶ Ti tak-la nonm-lan ki dwèt-la ni-an vo plis pasé sé wichès-la tout sé méchan-an ni-an,

¹⁷ paski Bondyé Senyè-a kay kasé pouvwa sé méchan-an, mé i kay sipòté sé moun-an ki dwèt-la.

¹⁸ Bondyé Senyè-a ka otjipé sé moun-an ki san fòt-la, èk tè-a kay sa yo pou tout tan.

¹⁹ Yo pa kay hont lè bagay vini mové. Yo kay ni plis pasé yo sa manjé lè lafen tonbé an péyi-a.

²⁰ Mé sé méchan-an kay mò. Lèlmi Bondyé Senyè-a kay dispawèt menm kon sé bèl flè-a ki an savann-an. Yo kay dispawèt menm kon lafimen.

²¹ Sé méchan-an ka pwété èk yo pa ka wimèt viwé, mé nonm-lan ki dwèt-la ni bon tjè, i toujou ka bay.

²² Sé moun-an Bondyé Senyè-a benni-an kay éwityé tè-a Bondyé té pwonmèt yo-a, mé i kay kouwi dèyè sé sa i modi-a.

²³ Bondyé Senyè-a ka moutwé an nonm ki chimen pouʼy pwan èk i ka pwotèkté sé moun-an ki ka plèʼy-la.

²⁴ Si yo mantjé an so, yo pa kay tonbé, paski Bondyé Senyè-a ka ba yo lanmen.

²⁵ Mwen té jenn, èk atjwèlman mwen ja gwan, mé mwen pa janmen wè Bondyé tounen doʼy asou nonm-lan ki dwèt-la, ni mwen pa janmen wè ich li ka mandé lachawité.

²⁶ Nonm sala donnan, i ka pwété lézòt moun, èk ich li sé an bennédiksyon.

²⁷ Tounen kont movèzté èk fè sa ki bon, èk désandanʼw kay toujou viv an tè-a Bondyé té pwonmèt-la.

²⁸ Paski Bondyé Senyè-a enmen sa ki dwèt èk i pa ka tounen doʼy asou sé moun li-an. I ka pwotèkté yo tout tan, mé i kay kouwi dèyè ich sé méchan-an sòti an tè-a.

²⁹ Sé moun-an ki dwèt-la kay éwityé tè-a Bondyé té pwonmèt yo-a, èk yo kay viv adanʼy pou tout tan.

³⁰ An nonm ki dwèt ni lasajès. Sé bon pawòl tousèl ki ka sòti an bouch li.

³¹ I ka tjenbé lwa Bondyé an tjèʼy, èk pyéʼy pa ka janmen kité bon chimen-an.

³² Nonm méchan-an ka véyé nonm-lan ki dwèt-la èk i ka chaché mannyè pou tjwéʼy.

³³ Mé Bondyé Senyè-a pa kay ladjéʼy an lanmen lèlmiʼy, ni i pa kay kité yo kondannéʼy lè i lodyans.

³⁴ Èspéyé èk konfyans asou Bondyé Senyè-a èk obéyi konmandmanʼy. I kay onnowéʼw, i kay baʼw tè-a, èk ou kay wè lè i kouwi dèyè sé méchan-an.

³⁵ Mwen té konnèt an nonm méchan ki té ka pwan lavantay asou lòt moun. I té menm kon an gwo pyé bwadnò ki an péyi Lèbannonn.

³⁶ Mé apwé sa lè mwen pasé, i pa té la. Mwen gadé pou li, mé mwen pa wèʼy pyès koté.

³⁷ Gadé nonm-lan ki bon èk dwèt-la, gadé mannyè i ka viv. An nonm ki ni lapé an tjèʼy ka ni an pil désandan.

³⁸ Mé moun-an ki ka kasé lwa Bondyé-a kay dispawèt nèt, èk pyèsonn pa kay wè désandanʼy.

³⁹ Bondyé Senyè-a ka sové nonm-lan ki dwèt-la èk i ka pwotèktéʼy lè twaka vini anlèʼy.

⁴⁰ Bondyé Senyè-a ka édéʼy èk i ka délivwéʼy. I ka tiwéʼy anba lanmen sé méchan-an èk i ka sovéʼy, paski sé an li i ka vini chaché pwotèksyon.