Samz 24 - Tèstèman nèf-la: Épi an posyòn an liv samz-la

Sé Bondyé Ki Gwan Wa-a

Sé an sam David

¹ Latè-a èk tout sa ki adanʼy sé sa Bondyé Senyè-a. Latè-a èk tout moun ki ka wèsté anlèʼy sé sa li.

² I mété fondasyon latè-a ofon lanmè-a èk i fèʼy asid asou dlo-a.

³ Ki moun ki ni dwa pou mouté asou mòn Bondyé Senyè-a? Ki moun ki pé antwé an kay-la ki sa li yonn-an?

⁴ Sé moun ki pa ka fè bagay ki mové, moun ki pa ni vyé lidé. Sé moun ki pa ka adowé imaj, èk moun ki pa ka fè pwonmèt yo pa ka tjenn.

⁵ Yo kay wisivwè bennédiksyon Bondyé Senyè-a. Yo kay moun ki dwèt douvan Bondyé ki délivwé yo-a.

⁶ Sé moun kon sa ki pou vini adowé Bondyé. Sé moun kon sa ki pou vini douvan Bondyé Jakòb-la.

⁷ Ouvè sé bayè-a gwan, ouvè sé lapòt-la ki la dépi lontan-an, pou gwan wa-a sa antwé.

⁸ Kilès ki gwan wa sala? Sé li ki Bondyé Senyè-a ki fò èk ki ni tout pouvwa-a. Sé li ki Bondyé Senyè-a pyèsonn pa sa genyen an batay-la.

⁹ Ouvè sé bayè-a gwan, ouvè sé lapòt-la ki la dépi lontan-an pou gwan wa-a sa antwé.

¹⁰ Kilès ki gwan wa sala? Sé Bondyé Senyè-a ki chèf sé sòlda syèl-la. Sé li menm ki gwan wa-a.