Samz 2 - Tèstèman nèf-la: Épi an posyòn an liv samz-la

Wa-a Bondyé Chwazi-a

¹ Pouki sé nasyon latè-a ka fè plan pou yo lévé kont Bondyé? Pouki sé moun-an ka fè konplo ki pa kay vo yo anyen?

² Sé wa yo-a ka lévé kont Bondyé, sé nonm-lan ki ka kondwi-a ka asanblé ansanm pou yo fè konplo kont Bondyé Senyè-a èk kont wa-a i chwazi-a.

³ Yo di, “Annou kasé sé chenn-an Bondyé èk wa-a i chwazi-a mété anlè nou-an, èk annou pa kité yo kondwi nou ankò.”

⁴ Bondyé Senyè-a ki ka kondwi-a asid an syèl, i wi, èk i pwan yo sèvi widitjil.

⁵ Lè i fini, i vini faché kont yo èk i hélé dèyè yo. I fè lapè pwan yo.

⁶ Bondyé Senyè-a di, “Mwen ja établi wa-a mwen chwazi-a asou Mòn Zayonn, mòn-an ki pou mwen yonn-an.”

⁷ Wa-a di, “Mwen kay fè zòt konnèt ki sa Bondyé Senyè-a di mwen. I di mwen, ‘Ou sé gason mwen, dépi jòdi-a mwen vini papaʼw.

⁸ Mandé mwen, mwen kay ba ou tout sé nasyon-an pou sa ou menm. Mwen kay ba ou tout latè-a pou pozèsyonʼw.

⁹ Ou kay kwazé yo èk an baton fè, ou kay kwazé yo an miyèt menm kon an kannawi.’ ”

¹⁰ Bon, atjwèlman mwen ka vèti zòt ki wa, sé pou zòt ki ka kondwi an latè-a ni lakonpwann.

¹¹ Sé pou zòt sèvi Bondyé Senyè-a èk wèspé èk twanblé douvanʼy.

¹² Sé pou zòt abésé kò zòt douvanʼy. Si pa sa, zòt kay fèʼy faché èk zòt kay mò sibit, paski adan an ti mouman i sa moutwé mannyè i faché. Pa dé bon i bon pou tout moun ki chaché pwotèksyon an li.