Samz 16 - Tèstèman nèf-la: Épi an posyòn an liv samz-la

Sé Bondyé Ki Ka Ban Nou Tjè Kontan

Sé an sam David

¹ Pwézèvé mwen, Bondyé, paski sé an ou mwen ka chaché pwotèksyon.

² Mwen di Bondyé Senyè-a, “Ou sé Senyè mwen. Sé ou ki ban mwen tout sé bon bagay-la mwen ni-an.”

³ Pli gwan plézi mwen sé pou mwen toujou la épi sé moun Bondyé-a ki an péyi-a. Sé yo ki méwité wèspé.

⁴ Sé moun-an ki ka adowé lézòt bondyé-a ka mennen twaka asou kò yo menm. Mwen pa kay ni anyen pou fè épi sé sakwifis san-an yo ka ofè bay sé imaj sala. Mwen pa kay menm mansyonnen non sé bondyé yo-a.

⁵ Bondyé Senyè, sé ou ki tout byen mwen, èk sé ou ki ban mwen tout sa mwen bizwen. Lavi mwen an lanmenʼw.

⁶ Pòsyon-an mwen éwityé-a sé an pòsyon mwen kontan an pil. Byen-an mwen éwityé-a bèl an pil!

⁷ Mwen ka lévé non Bondyé Senyè-a, paski i ka di mwen ki chimen pou mwen pwan, jis lannwit konsyans mwen ka di mwen ki sa pou mwen fè.

⁸ Mwen toujou ka mété Bondyé Senyè-a douvan mwen. I tou pwé, kon sa anyen pa sa jété mwen.

⁹ Kon sa mwen ni tjè kontan épi mwen ka chanté, èk anyen pa sa wivé mwen.

¹⁰ Ou pa kay kité lam mwen koté sé mò-a yé-a, épi ou pa kay kité kò sèvant ou-a ki ka viv baʼw tousèl-la pouwi an twou-a.

¹¹ Ou ka moutwé mwen chimen-an ki ka ban mwen lavi-a. Ou ban mwen tjè kontan paski ou toujou la épi mwen. A kotéʼw mwen ni plézi pou tout tan.