Samz 130 - Tèstèman nèf-la: Épi an posyòn an liv samz-la

An Lapwiyè Pou Mandé Padon

An chanté pou lè yo té ka mouté Jérouzalèm

¹ Andidan gwan twaka-a mwen yé-a, mwen ka kwiyéʼw, Bondyé Senyè.

² Tann lè mwen ka kwiyéʼw, Mèt mwen, èk kouté lè mwen ka mandéʼw pou édé mwen!

³ Si ou té ka ékwi tout péché nou, Bondyé Senyè, kilès ki té kay sa chapé anba kondannasyonʼw?

⁴ Mé ou ka pawdonnen nou, pou nou sa adowéʼw èk wèspé.

⁵ Mwen ka èspéyé èk tout lam mwen pou Bondyé Senyè-a vin édé mwen, èk mwen ka mété tout konfyans mwen an pawòl li.

⁶ Mwen ka èspéyé pou Bondyé Senyè-a èk tout lam mwen, plis pasé lè an gad ka véyé pou sòlèy lévé, wi, plis pasé an gad ka èspéyé jou ouvè.

⁷ Sé pou sé jan Izwayèl-la èspéyé èk tout konfyans yo an Bondyé Senyè-a, paski Bondyé Senyè-a toujou enmen yo èk i toujou pawé pou sové yo.

⁸ Sé li ki kay sové sé jan Izwayèl-la hòd tout movèzté yo.