Samz 110 - Tèstèman nèf-la: Épi an posyòn an liv samz-la

Wa-a Bondyé Chwazi-a

Sé an sam David

¹ Bondyé Senyè-a palé bay wa-a, senyè mwen-an, i diʼy, “Asid asou lanmen dwèt mwen jis tan mwen fè lèlmiʼw tounen an ti ban pou mété pyéʼw.”

² Bondyé Senyè-a kay fèʼw kondwi plis péyi pasé Zayonn. I di, “Kondwi sé lèlmiʼw-lan ki oliwon-an.”

³ Jou-a ou kay goumen èk sé lèlmiʼw-lan, tout sé moun ou-an kay vin édéʼw. Menm kon séwen ka tonbé bonnè bonmaten, sé kon sa sé jenn nonm ou-an kay vini jwenn ou asou sé mòn-an ki sa ou yonn-an.

⁴ Bondyé Senyè-a ja fè sèman èk i pa kay pwan pawòl li viwé. I di, “Ou sé an pwèt pou tout tan, an pwèt menm kon Mèlkizidèk.”

⁵ Senyè-a doubout asou lanmen dwèt ou. Lè i faché, i kay kwazé sé wa-a.

⁶ I kay pasé jijman asou sé nasyon-an, la kay ni moun mò yonn asou lòt. I kay détwi tout sé wa-a an tout latè-a.

⁷ Wa-a kay bwè dlo an lawivyè-a ki bò chimen-an, sé pou sa i kay ni fòs pou lévé tèt li.