Samz 103 - Tèstèman nèf-la: Épi an posyòn an liv samz-la

Lanmityé Bondyé

Sé an sam David

¹ Kité mwen glowifyé Bondyé Senyè-a èk tout lam mwen! Sé pou tout sa mwen ni andidan mwen glowifyé non Senyè-a ki pa ni pyès fòt-la.

² Kité mwen glowifyé Bondyé Senyè-a èk tout lam mwen, mwen pa kay obliyé tout sé bon bagay-la i ja fè-a.

³ I ka pawdonnen tout movèzté mwen, i ka djéwi tout maladi mwen.

⁴ I ka chapé mwen sòti an djòl lanmò èk i ka benni mwen èk mizéwikòd li èk lanmityé-a i toujou ni pou mwen-an.

⁵ I ka voyé bontéʼy asou mwen tout lavi mwen, kon sa mwen ka wèsté jenn èk fò menm kon an malfini.

⁶ Bondyé Senyè-a ka jijé an favè sé moun-an yo ka pwan lavantay asou-a èk i pa ka vòlè wézon yo.

⁷ I fè Moziz konnèt sa i té ni plan pou fè, èk i fè sé Manmay Izwayèl-la wè gwan twavay li.

⁸ Bondyé Senyè-a ni mizéwikòd èk lagwas, i pa ka faché vit, èk tjèʼy toujou plen lanmityé.

⁹ I pa ka pwi dèyè nou tout lè, ni i pa ka wèsté faché pou tout tan.

¹⁰ I pa ka pini nou kon i sipozé pini nou, ni i pa ka ban nou jijman-an nou méwité-a pou péché èk movèzté nou.

¹¹ Menm hòtè ou ka wè syèl-la anho latè-a, sé menm mannyè-a i toujou ni lanmityé pou sé moun-an ki ka wèspèktéʼy-la.

¹² Menm kon koté sòlèy-la ka lévé-a lwen koté i ka kouché-a, sé menm otan lwen i ja jété fòt nou.

¹³ Menm kon an papa ka twété manmay li byen, sé menm mannyè-a Bondyé Senyè-a ka twété sé moun-an ki ka wèspèktéʼy-la.

¹⁴ I konnèt èk ki sa nou fèt, i pa ka obliyé nou sé lapousyè.

¹⁵ Lavi nou sé menm kon zèb-la. Nou ka pwofité èk nou ka vini bèl kon an flè ki an savann-an,

¹⁶ mé kon an ti van vantéʼy, i ka dispawèt èk pyèsonn pa ka wèʼy ankò.

¹⁷ Mé Bondyé Senyè-a ka toujou enmen sé moun-an ki ka wèspèktéʼy-la, èk bontéʼy ka diwé pou tout jennenwasyon

¹⁸ asou moun ki ka tjenn agwémanʼy èk ki ka obéyi konmandmanʼy èk tout tjè yo.

¹⁹ Bondyé Senyè-a mété gwan chèz li an syèl, sé li ki wa-a ki ka kondwi tout bagay-la.

²⁰ Glowifyé Bondyé Senyè-a, zòt nanj ki ni pouvwa, ki ka obéyi konmandmanʼy, ki ka fè tout sa Senyè-a di.

²¹ Glowifyé Bondyé Senyè-a, zòt sòlda syèl-la, zòt sèvant li ki ka fè tout sa i vlé!

²² Sé pou tout sa Bondyé Senyè-a fè glowifyéʼy toupatou koté i ka kondwi. Kité mwen glowifyé Bondyé Senyè-a èk tout lam mwen.