Mateo 1 - I Baha'o Kasuratan

I Ginikanan-na si Jesus

¹ Yayto i ginikanan-na si Jesu-Kristo, i Dadi'-na si David pati' si Abraham:

^2-3 Si Abraham i tatay-na si Isaac nga iya i tatay-na si Jacob nga tatay-na si Juda pati' i mga bugtu'-na lalla. Si Juda i tatay-na kas Fares pati' Sara, ngan si Tamar i nana-na mga iya. Si Fares i tatay-na si Esrom nga tatay-na si Aram.

⁴ Si Aram i tatay-na si Aminadab nga iya i tatay-na si Naason nga tatay-na si Salmon.

⁵ Si Salmon i tatay-na si Boas, ngan si Rahab i nana-na. Si Boas i tatay-na si Obed, ngan si Ruth i nana-na. Si Obed i tatay-na si Jesse

⁶ nga tatay-na si Hadi' David. Si David i tatay-na si Solomon, ngan i nana-na, alla-na dahulo si Urias.

⁷ Si Solomon i tatay-na si Rehoboam nga iya i tatay-na si Abias nga tatay-na si Asa.

⁸ Si Asa i tatay-na si Jehosapat nga iya i tatay-na si Jehoram nga tatay-na si Usias.

⁹ Si Usias i tatay-na si Jotam nga iya i tatay-na si Ahas nga tatay-na si Esekias.

¹⁰ Si Esekias i tatay-na si Manases nga iya i tatay-na si Amon nga tatay-na si Josias.

¹¹ Si Josias i tatay-na si Jeconias pati' i mga bugtu'-na lalla si uras si kadistirru-na si mga a'a-na si Israel pan Babilonia bilang mga bihag.

¹² Pagkatapos si kadistirru-na mga iya pan Babilonia, si Jeconias i tatay-na si Salatiel nga tatay-na si Sorobabel.

¹³ Si Sorobabel i tatay-na si Abiud nga iya i tatay-na si Eliakim nga tatay-na si Asor.

¹⁴ Si Asor i tatay-na si Sadok nga iya i tatay-na si Akim nga tatay-na si Eliud.

¹⁵ Si Eliud i tatay-na si Eleasar nga iya i tatay-na si Matan nga tatay-na si Jacob.

¹⁶ Si Jacob i tatay-na si Jose nga iya i sa'alla-na si Maria nga iya i nana-na si Jesus, i nag'arunan liwat Kristo.

¹⁷ Sanglit bali katursi lut'o si ka'uru'ampuhan i tikang si Abraham pada'iray si David ngan katursi liwat gihapon i tikang namay si David pada'iray si kadistirru-na si mga a'a-na si Israel pan Babilonia. Tikang namay si uras si kadistirro, katursi gihapon lut'o tubtob si ka'allum-na si Tinu'inan Mannanalwas.

I Ka'allum-na si Jesu-Kristo

¹⁸ Da'ito sito i isturya hi'unong si ka'allum-na si Jesu-Kristo: Agpahanda-na si Jose i nanay-na nga si Maria. Ngan karaslon pa hamok mga iya, aniya' magpakatu'anan nga burod nayto dina pero yayto pagburod pina'agi si Espirito Santo. Ahinabo' to myintras pa aglabutan-na iya si Jose. Sanglit bali kuri si kamutangan-na si Jose kay si bala'ud-na mga iya kwintado nga agdangallahan na mga iya.

¹⁹ Ngan tungod kay si Jose matadong a'a, agplano iya pagsunod si bala'ud-na mga iya nga agtugot pagbawi' si dati nagkasarabutan si pagdangallahan pero si sikrito pama'agi dina kay ga'i iya aruyag nga akamalu'an si Maria.

²⁰ Pero si kaliyat-liyatan si pagparapinsar-na sinan, agpakulaw i anghel-na si Paragdalom ari si upi, ngan agpinugad, “Jose, dadi'-na si David, dakaw agruha-duha pagpa'istar si Maria si ruma'-mo bilang alla-mo, kay i magtudok anan si iya tikang si Espirito Santo.

²¹ Sigurado lalla i ma'allom ngan kinahanglan Jesus i pina'arun-bi, kay iya i tisalbar si mga a'a-na basi' gana' na mga iya baratunun-na si sala' ngan basi' ga'i na mga iya sadaluman-na pa si sala'.”

²² Ahinabo' nan dimu'an basi' atuman i nagpahalling-na si Paragdalom, pina'agi si paragsumat-na:

²³ “Aniya' magburod dangkanda nga ga'i pa akalabutan, ngan lalla i ma'allom dadi'-na. ‘Emmanuel’ i pina'arun-na, nga i kahulugan-na, ‘Atiya' i Diyos si kita’.”

²⁴ Sanglit pakakallat-na si Jose, agtuman-na i mandu'-na si anghel-na si Paragdalom ngan agkumpli-na dayon i dati pagkasarabutan si pagdangallahan-na mga iya. Agpa'istar-na si Maria si ruma'-na

²⁵ pero ga'i aglabutan-na tubtob nga a'allom i dadi'-na, ngan ag'arunan-nay to Jesus.