Juta 1 - NISVITAI ITAP ANTAS ANEJOM

¹ AK ilpu atimi iji eigki, is ago upene caua a Atua Etmaija, um aminjinai caua irai Iesu Kristo, eris upyi ahlaig vai caua, ek aiheuc vai caua ainyak Juta, naheca u Iesu Kristo, im etoai Jakobus:

² Etmu amen alupas ehelemia naiheuc, im neigpa, im naiyu.

³ Ak ilpu etoak upene, kis wat auritai emda ainyak nagedvaig imi caua va nitai umoh iran ineig imi atimi asega, is idim ika irak ki aged intas imi caua, um ated caua, mika aki imyiisjis emda aijaua vai intas inivaijec ineig, eris ehcethi ache alupai ilpu atimi upene.

⁴ Eris auarahcil pam eheleija nahaiji atimi, eris upyi aged ra itu acen, mika eri leh neruvaig ineigki ara; ilpu atimi eti eccen vai Atua, era auoh tak ago ara an naiheuc o Atua pan an nedo has esjilid ura, um ateri Atua Natimarid et ethi ache, im Iesu Kristo Natimarid uja.

⁵ Ek lep merit ainyak nahugnivaig lelmia an nitai ineigki, ja eka idim ato aijaua, nikavaig, is imyiatamaig ilpu atimi o un a Natimarid an pece Ijipt, ja par apitac um auahas ra eris eti imyiisjis ninivaijec ara:

⁶ im lep ilpu agelo iji eig eris eti aiji aktit ara an natimi alupas ura, jam ude inuarin ineig eris amen iran, et aminjinai ra aien an naupat ineig et arahed ira ra um eti lep ti, um imyihum pan neruvaig imi ra an nadiat alupas:

⁷ et idivaig nupu Sotom im nupu Comora, im nup urai iji uari-pece arahed ira ra, eris ago nedo et idiva nedo ura ara, um acitak, um ispara apitac jipe ra a ilpu atamaig, eris ikni ra mika itai asjaaicnaig ara, um leucse nohocred an cop ineig inyi ti lep ti:

⁸ et um ucco, era lep ago emeig irai ohura a ilpu atimi umjeg ahnag iji eigki, um imyipalea ilpu atimarid, um asan tas has vai ilpu atimi alupas.

⁹ Ja is wat imyiisjis itai a Maikel, nagelo esjilid, ehele Tiapolo, is imyiisjis aien va nohui Moses, ja is imtitaig aien par asan tas has vai yin, is tup ika aien, Etmu ated euc a Natimarid.

¹⁰ Ja eris asan tas has ara sji eigki va nitai iji eigki eris eti ato ara: ja era auahas ra ara an nitai iji eigki era ispara ato ara, et idivaig niji itai umumoh et eti eteuc lelra.

¹¹ Aʼa, auwe vai ra! eris idim ago nedo o Kein ara, um athut emda pan u nedo ahnag u Belam va nimtan, um auahas ra an nehtauo u Kora.

¹² Era idivaig neduei itai ara sji eigki irai hag an naiyu jipe u inliinmopomia, an hag ura ehelemia, era hag ara jam eti imtitaig: era idivaig naupat ara et eti amen incaupda iran, et ahre jipe nimtinjop; im incai imlai, eh ti nohoan iran, um mas acen, er atecrei pan an nicvan;

¹³ im nepeau agrei an jop, er asuptecnaig nitai ehcamai vaig ura; im moijeuv et eti amen aktit, erupu amen ara an mehcim esjilid irai iji mesese.

¹⁴ Is lep upyi asaig vai ra sji eigki a Inok, natimi is seven ahes irai Atam, um ika, “Etpu idim ham a Natimarid im lep ilpu atimi upene o un et ahinag acen ehelen,

¹⁵ par asuptecnaig nimtan imi atimi asega; um lep aru irai ilpu atimi asega eti eccen vai Atua ira ra, va nedo eti eccen asega ura vai Atua, eris ago ara an nedo eti eccen vai Atua ura, im lep vai intas has asega, eris asaig vai Atua a ilpu atimi eti eccen vai yin.”

¹⁶ Era ulikulik ara sji eigki, um etgai itai, um imyiaiji merit has ura; era lep asan tas ijinies acen ara, um imyiahpas atimi mika eri leh niji itai ura ara.

¹⁷ Ak ilpu etoak upene, akumu lep aktaktai aijaua intas eris upyi asaig a ilpu apostolo o Iesu Kristo Natimarid uja;

¹⁸ eris idim asaig ehelemia ara mika, erupu ehcohos a ilpu atimi imyiafakahcil an naopan apitac, um imyiaiji merit has ura an neti eccen vai Atua ura.

¹⁹ Ara aigki era ude caua ara, um ago nedo an nobohtan, et eti amen ehele ra a Nesgan Upene.

²⁰ Ja akumu aiji aktit aijaua, ak ilpu etoak upene, an nimyiisjis ninivaijec unyimia et upene acen, um ugni itai irai Nesgan Upene;

²¹ etmu lep amen naiyu u inliinmopomia aijaua vai Atua, um aitgaig naiheuc o Iesu Kristo Natimarid uja, va nitai umoh iran ineig inyi ti lep ti.

²² Akumu aiheuc va ahaiji atimi aijaua, um aktaktai ra an neche u nedo ura:

²³ jam imyiatamaig nahaiji ra an nimyicoho, um atoraliak ra an cop; akumu lep amcel vai napelumai ura aijaua et emeig va nohura.

²⁴ AIEN et emda aien par aminjinai caua, va aki jim eropse aijaua, um ikni caua upene an nuhup u natimi alupas o un, an nimyiacitak alupas unyimia,

²⁵ aien et Atua arapakau ache aien, im Natimi imyiatamaig caija, etmu eteuc nimyiahpas yin, im natimarid o un, im natimi alupas o un, im nemda o un, an naopan ineig im lep irai iji mesese. Emen.