Filimon 1 - NISVITAI ITAP ANTAS ANEJOM

¹ AK etoamrau Filimon, natimi imtaam auritai ehelemrau, ecrau aiheuc vai euc aijumrau, Paulo, natimi ineig eris arore nyak vai Iesu Kristo, im Timodeus etoaijau,

² ecrau lep aiheuc vai Afea etoamrau aijumrau, im Arkippus neucsupo etoamrau, im lep nup an nakalasia an nimnim unyum:

³ Etmu amen ehelemia naiheuc im neigpa ineig et ahes ehele Atua Etmaija, im Iesu Kristo Natimarid.

⁴ EK naaurineig vai Atua unyak ainyak, um aniv euc an nalaigaheni unyak irai iji adiat;

⁵ kis idim atahaijeg intas va naiyu u inliinmopom ainyak, im nimyiisjis ninivaijec unyum vai Iesu Natimarid, im ilpu atimi upene asega;

⁶ mika yi emda nasipiaig nimyiisjis ninivaijec unyum, va uhpu ato niji itai upene asega iramia vai Iesu Kristo.

⁷ Ecrau imyiacitak aijumrau um cediaig va naiyu u inliinmopom, et lep imyiacitak inliinmopoi ilpu atimi upene vai euc, ak etoak.

⁸ ¶ Ek idim emda ainyak vai Kristo par tas alep ehelum va nitai ineig et upene;

⁹ ja ek ugni euc ainyak va naiyu u inliinmopom vai nyak, ek mun efatimi ainyak Paulo, um lep atimi ineig eris arore nyak vai Iesu Kristo.

¹⁰ Ek ugni euc ainyak vai Onesimus inhal unyak, kis apos yin ainyak an narore nyak vaig:

¹¹ is takitai vai euc aien itu acen; ja et upene aien vai nyak, im lep vai euc, an naopan ineig:

¹² ek mun lep abraig pam yin ehelum ainyak: namu leh yin aiek, et idivaig inhal unyak aien:

¹³ kis idim merit ainyak mika yi amen ehelek aien, um isjipigmoig euc, um aheca unyak, an narore nyak vaig vai intas-upene;

¹⁴ jai kis ika ainyak ki upyi ato inliinmopom vai yin, ja par ago, va an jim ago nedo upene ineig aiek va nimyiisjis unyak, jam vai intup naiheuc unyum.

¹⁵ Kit is ude euc ipjidipjid aien, mika napu lep leh yin aiek yi amen ehelum irai iji mesese;

¹⁶ jam eti lep idivaig naheca, et esjilid irai aheca aien, et idivaig etoak upene, ja et lep etoam aien um atimi ehpan iram, an nohun, im lep irai Natimarid.

¹⁷ El et ika aiek ek apah unyum ainyak, namu leh yin aiek, um idivaig nyak.

¹⁸ El is ahneg tah nitai unyum aien, ka eti aru tah nitai unyum, namu aged nitai iyehki aiek ehelek;

¹⁹ ek mun aged intas ineigki ainyak Paulo an nikmak, ekpu aru ainyak: ja ek eti ika ehelum ainyak, na eti aru unyak aiek vai euc.

²⁰ Maiya, ak etoak, ekmu imyiacitak ainyak irai Natimarid vai euc: namu lep auacediaig inliinmopok aiek irai Natimarid.

²¹ Ek ato ainyak, nikavaig, napu imyiaiji intas unyak aiek, va nitai ineigki ek mun aged nitasvitai imtam ainyak, ek lep ato ainyak mika, napu ago nedo esjilid iran neigki aiek ek mun asaig ainyak.

²² Im lep ineig, namu imyecrei neom ineig aiek, ekpu amen iran ainyak: ek ika ainyak uhpu lep ati nyak ehelemia va nalaigaheni unyimia.

²³ ET aiheuc vai euc a Epafras, eris ehrarore cumrau vai Iesu Kristo;

²⁴ im lep Markus, im Aristarkus, im Timas, im Lukas, ilpu atimi imtaam auritai ehelek.

²⁵ Etmu amen anliinmopomia naiheuc o Iesu Kristo Natimarid uja. Emen.