2 Joanes 1 - NISVITAI ITAP ANTAS ANEJOM

¹ AK intakata esga atimi eris ehtai euc, im ilpu hal unyum, ek aiheuc vai caua ainyak, natimi tas alep; et aiyu inivaijec inliinmopok ainyak vai caua; ja et ti ainyak ache, jam lep ra asega era ato intas inivaijec ara;

² vai intas inivaijec et amen anliinmopja, etpu lep amen eheleija irai iji mesese:

³ Etmu amen ehelemia naiheuc, im neti aru, im neigpa, et ahes ehele Atua Etmaija, im lep Iesu Kristo Natimarid, Inhal o Etman, an ninivaijec im naiyu.

⁴ Kis imyiacitak alupas ainyak, va nitai ineig, nikavaig, kis ecet nahaiji ilpu hal unyum ainyak nagovaig nedo inivaijec, et idivaig inleh intas alep u Etmaija uja.

⁵ Ek lep ugni euc ainyak, ak intakata esga atimi, ja ek eti aged intas alep mat imi euc ainyak, ja intas alep ineig is amen eheleija itu acen um uhum pam, nikavaig, yi aiyu jipe inliinmopja akaija vai caija.

⁶ Naiyu u inliinmopja vai yin neigki, mika ti ago nedo uja akaija et idivaig intas alep o un. Intas alep o un neigki, et idivaig akis atahaijeg aijaua itu acen um uhum pam, mika aki ago nedo ineigki aijaua.

⁷ Era adala an nobohtan a ilpu atimi efaifa et ahinag, era eti asuptecnaig ara, um ika, is ham a Iesu Kristo an nohun. Natimi efaifa neigki, im lep intaka kristo.

⁸ Akumu aminjinai caua aijaua, va ecri jim etjo u nitai iji eigki aijama ecris ago aijama, jam leh neruvaig upene.

⁹ Ara asega era imyipalea ara, um eti apol an nesege u Kristo, et eti amen ehele ra a Atua. Aien et apol an nesege u Kristo aien, et amen ehelen a Etman, im lep Inhal o un.

¹⁰ El et ham ehelemia tah, jam eti apos nesege ineigki, jim leh pam yin iraili eom unyimia, um jim ika ehelen, Kaiheuc vai euc:

¹¹ aien et ika aien ehelen, Kaiheuc vai euc, et asipiai edo has o aien.

¹² Kis ika ainyak ki aged niji itai et ahinag imi caua, ja ek eti merit ainyak nagedvaig a peper im inwai apeig: ja ek ika ainyak ki apam ehelemia, mika ti tas jipe akaija, um imyiacitak alupas.

¹³ Era lep aiheuc vai euc a ilpu hal o etoam eris ehtai yin. Emen.