Marcus 3 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL III. An láṁ a ḃí feóċta dá leiġeas ag Críost. An dáréag dá dtoġaḋ aige. Na Fairisíniġ dá gcur i bpúnc aige, agus an diaṁasla acu á ḋéanaṁ.

¹ Agus ċuaiḋ sé isteaċ airís sa tsinagóig, agus ḃí duine ann agus ḃí láṁ leis feóċta.

² Agus ḃíodar ag faire air, féaċaint a’ ndéanfaḋ sé an leiġeas sa trabbóid, i dtreó go gcuirfidís ’n-a leiṫ é.

³ Agus duḃairt sé leis an ḃfear: Seasaiṁ amaċ anso i lár baill.

⁴ Agus duḃairt sé leó-san: Cé ’cu is dleaġṫaċ, maiṫ a ḋéanaṁ nó olc a ḋéanaṁ sa tsabbóid? anam duine do ṡaoraḋ nó do ṁilleaḋ? Níor laḃradar-san focal.

⁵ Agus d’ḟéaċ sé ’n-a ṫímpal orṫa go feargaċ, agus ḃí brón air mar ġeall ar an gcroiḋe ḃeiṫ ċóṁ dall acu, agus duḃairt sé leis an ḃfear: Sin do láṁ. Do ṡín; agus ḃí an láṁ leiġiste.

⁶ Agus d’imṫiġ na Fairisíniġ amaċ láiṫreaċ agus ċuadar féin agus muintir Héróid i gcóṁairle ’n-a ċoinniḃ féaċaint conus a ṫiocfaḋ leó é ṁilleaḋ.

⁷ Aċ d’imṫiġ Íosa agus a ḋeisgiobuil ċun na faraige; agus do lean pobul mór é a’ Gaililí agus a’ Iúdaéa,

⁸ Agus a’ Ierúsalem, agus a h-Idúméa, agus ó’n dtaoḃ ṫall de’n Iórdan, agus muintir na mball tímpal Tuíre agus Sídóin, suaṫantais daoine a ṫáinig ag triall air nuair airiġeadar a ġníoṁarṫa.

⁹ Agus duḃairt sé le n-a ḋeisgiobuil long ḃeag a ċoimeád dó, mar ġeall ar an sluaġ, le h-eagla go mbrúṫfaidís é.

¹⁰ Óir ḃí mórán daoine aige ’á leiġeas, agus ḃí na daoine go raiḃ aon ġearán orṫa ag brúṫ isteaċ air a d’iarraiḋ teangaḃáil leis;

¹¹ Agus na h-annspridí truailliġṫe, nuair a ċídís é, do ṡléaċtaidís dó, agus deiridís go h-árd:

¹² Is tusa Mac Dé. Agus ṫugaḋ sé órdú dian dóiḃ gan é ḋ’ḟoillsiú.

¹³ Agus ċuaiḋ sé suas ar an gcnoc agus do ġlaoiḋ sé ċuige na daoine ba ṫoil leis féin, agus ṫánadar ċuige.

¹⁴ Agus ṡocaruiġ sé ar ḋáreág a ḃeiṫ i n-a ḟoċair, agus go gcuirfeaḋ sé ag craoḃsgaoileaḋ iad.

¹⁵ Agus ṫug sé cumas dóiḃ ar ġalaraiḃ do leiġeas agus ar ḋeaṁnaiḃ do ċur amaċ.

¹⁶ Agus ṫug sé Peadar mar ainim ar Ṡímón.

¹⁷ Agus Séamus mac Sebedé agus Eóin a ḋriṫáir, agus ṫug sé Bóanerges orṫa, sé sin maca tóirṫniġe.

¹⁸ Agus Aindrias, agus Pilib, agus Párṫalán, agus Maitiú, agus Tomás, agus Séamus mac Alṗeí, agus Taddeus, agus Símón an Canáníteaċ,

¹⁹ Agus Iúdás Iscariót, an fear a ḋíol é.

²⁰ Agus ṫánadar ċun an tiġe, agus ṫáinig an tsluaġ airís i dtreó nár ḃ’ḟéidir dóiḃ fiú bia do ċaiṫeaṁ.

²¹ Agus nuair airiġ a ṁuíntir féin é do ċuadar amaċ ċun beirṫe air. mar duḃradar: Is as a ṁeaḃair atá sé.

²² Agus na Sgríḃneóirí a ṫáinig anuas ó Ierúsalem, duḃradar gur ḃ’é Beelsebub a ḃí istiġ ann, agus gur le cóṁaċt rí na ndeaṁan a ḃí sé ag cur na ndeaṁan amaċ.

²³ Agus do ġlaoiḋ sé ċuige iad, agus do laḃair sé leó i soluídíḃ: Conus ḟéadfaḋ Sátan Sátan do ċur amaċ?

²⁴ Agus má ḃíonn ríġeaċt deiġilte ’n-a coinniḃ féin ní féidir do’n ríġeaċt san seasaṁ:

²⁵ Agus má bíonn teaġlaċ ag gaḃáil i gcoinniḃ a ċéile ’n-a ċodaiḃ ní féidir do’n teaġlaċ san seasaṁ;

²⁶ Agus má eiriġeann Sátan ’n-a ċoinniḃ féin, tá se ’n-a ċodaiḃ rannṫa, agus ní féidir dó seasaṁ, agus tá deire leis.

²⁷ Ní féidir do ḋuine dul isteaċ i dtiġ fir láidir agus a ċuid d’ḟuadaċ, mura ndeiniḋ sé an fear láidir do ċeangal an dtúis, agus ansan féadfaiḋ sé a ṫiġ do robáil.

²⁸ Go deiṁin adeirim liḃ, maiṫfar do’n ċine daona gaċ peacaḋ agus gaċ diaṁasla d’á ndéanfaid siad;

²⁹ Aċ an t-é a ḋéanfaiḋ diaṁasla i n-aġaiḋ an Spioraid Naoiṁ, ní ḃeiḋ maiṫeaṁnaċas go deó aige le fáġail, aċ beiḋ sé ciontaċ i bpeacaḋ ṡíoruiḋe.

³⁰ Mar go nduḃradar: Is annsprid truailliġṫe atá aige.

³¹ Agus ṫáinig a ṁáṫair agus a ḃráiṫre agus ḃíodar ’n-a seasaṁ amuiġ, agus ċuireadar teaċtaireaċt isteaċ ag glaoḋaċ air.

³² Agus ḃí na daone ’n-a suiḋe ’n-a ṫimpal, agus duḃradar leis: Féaċ, tá do ṁáṫair agus do ḃráiṫre amuiġ agus iad at’ lorg.

³³ Agus duḃairt sé leó ’ġá ḃfreagra: Cé h-iad mo ṁáṫair-se agus mo ḃráiṫre?

³⁴ Agus d’ḟéaċ sé ’n-a ṫimpal ar an muintir a ḃí tímpal air agus duḃairt: Siniad mo ṁáṫair-se agus mo ḃráiṫre.

³⁵ Óir, an t-é a ḋéanfaiḋ toil Dé, siné is bráṫair agus siúr agus máṫair agam-sa.