Marcus 12 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL XII. Parabal an ḟíonġuirt agus an luċt saoṫruiġṫe. Ceart Ċéasair ċun na cánaċ. Na Sadducíniġ; i bpúnc. An ċéad aiṫne; cianóg na baintríġe.

¹ Agus do ċrom sé ar laḃairt leó i soluídíḃ: Do ċuir duine fíonġort, agus ḋein sé fál ’n-a ṫímpal, agus ḋein sé clais ann ċun an ḟíona do ḃrúṫ, agus ċuir sé suas túr ann, agus do ċuir sé é ċun luċt saoṫruiġṫe, agus d’imṫiġ sé i gcéin.

² Agus nuair a ṫáinig an t-am ċuir sé seirḃíseaċ ag triall ar an luċt saoṫruiġṫe ċun toraḋ an ḟíonġuirt d’ḟáġail ó’n luċt saoṫruiġṫe.

³ Agus do rugadar ar an seirḃíseaċ, agus ġaḃadar air, agus ċuireadar ċun siuḃail folaṁ é.

⁴ Agus airís ċuir sé ċúċa seirḃíseaċ eile; agus do ġoineadar é sin, sa ċeann, agus ṫugadar tarcuisne ḋó.

⁵ Agus airís ċuir sé seirḃíseaċ eile ag triall orṫa: agus do ṁarḃuiġeadar é féin; agus mórán eile; do ġaḃadar ar ċuid acu, agus do ṁarḃuiġeadar cuid acu.

⁶ Aċ do ḃí aige aon ṁac aṁáin, ró-ḋílis; agus ċuir sé é sin ċúċa sa deire, agus duḃairt sé Taḃarfaid siad uraim dom’ ṁac.

⁷ Aċ duḃairt an luċt saoṫruiġṫe le n-a ċéile: Sidé an t-oiġre; téanam, cuirimís ċun ḃáis é, agus beiḋ an oiġreaċt againn.

⁸ Agus do rugadar air, agus do ċuireadar ċun ḃáis é, agus ċaiṫeadar lasmuiġ de’n ḟíonġort é.

⁹ Cad a ḋéanfaiḋ tiġearna an ḟíonġuirt sin? Tiocfaiḋ sé agus déanfaiḋ sé díḃeirg ar an luċt saoṫruiġṫe sin agus taḃarfaiḋ sé an fíonġort d’á malairt.

¹⁰ Agus an aṁlaiḋ nár léiġeaḃair an scriptiúir seo, An ċloċ ná glacfaḋ na saoir, isí atá ’n-a cloiċ ċinn cúinne;

¹¹ Isé an Tiġearna do dein an níḋ sin, agus is iongantaċ é i n-ár súiliḃ-ne?

¹² Agus ḃíodar a d’iarraiḋ beirṫe air, aċ ḃí eagla acu roimis an bpobul; óir ḃí ḟios acu gur ċúċa féin a ḃí sé sa tsoluíd sin. Agus d’ḟágadar é agus d’imṫíġeadar.

¹³ Agus ċuireadar ċuige cuid de sna Fairisíniġ agus de ṁuintir Héróid ċun buntáiste ḃreiṫ air ’n-a ċaint.

¹⁴ Agus ṫánadar ċuige agus duḃradar leis: A Ṁáiġistir, is eól dúinn gur duine fírinneaċ tu, agus ná fuil beann agat ar aoinne; mar ní féaċann tú ċun gnúise aon duine, aċ slíġ Dé do múineaḋ do reir fírinne. An dleaġṫaċ cíos a ḋíol le Caesar nó gan a ḋíol? An dtaḃarfam é nó an gcoimeádfam é?

¹⁵ Aċ do ċonaic sé an feall a ḃí ionta, agus duḃairt sé leó: Cad ċuige ḋaoiḃ ḃeiṫ am’ braṫ? Tugaiḋ ċuġam píosa airgid go ḃfeicead é.

¹⁶ Agus ṫugadar ċuige é. Agus duḃairt sé leó: Cé leis an íoṁáiġ seo agus an sgríḃinn seo? Duḃradar leis: Le Caesar.

¹⁷ Agus d’ḟreagair Íosa agus duḃairt sé leó: Tugaiḋ, d’á ḃríġ sin, do Ċaesar na neiṫe is le Caesar, agus do Ḋia na neiṫe is le Dia.

¹⁸ Ansan ṫáinig ċuige na Sadducíniġ, daoine a ṡéanann aiseiriġe na marḃ, agus ċuireadar ceist ċuige agus duḃradar;

¹⁹ A Ṁáiġistir, do sgríḃ Maois dúinn: Má ġeiḃeann driṫáir ḋuine bás agus go ḃfágann sé a ḃean, agus ná fágann sé clann ’n-a ḋiaiḋ, go nglacfaiḋ a ḋriṫáir an ḃean, agus go dtógfaiḋ sé clann d’á ḋriṫáir.

²⁰ Aċ ḃí mórṡeisear driṫár ann, agus do ṗós an ċéad duine acu bean, agus fuair sé bás gan clann ḟágáilt.

²¹ Agus do ġlac an tarna duine acu í, agus fuair sé bás, agus níor ḟág sé sin clann aċ ċóṁ beag. Agus an tríṁaḋ fear ar an gcuma gcéadna.

²² Agus do ġlac an mórṡeisear í ar an gcuma san, agus niór ḟágadar clann. I n-a ndiaiḋ go léir do fuair an ḃean bás.

²³ D’á ḃríġ sin, nuair ṫiocfaiḋ an aiseiriġe, agus nuair a ḋ’eireóċaid siad go léir, cé ’cu ḋíoḃ gur leis an ḃean? Óir ḃí sí ’n-a mnaoi ag an mórṡeisear.

²⁴ Agus d’ḟreagair Íosa agus duḃairt sé leó: Nác é atá ’búr gcur amú gan eólus a ḃeiṫ agaiḃ ar an scriptiúir, ná ar ċóṁaċtaiḃ Dé?

²⁵ Óir, nuair a ḋ’eireóċaid siad ó sna mairḃ ní ḃeiḋ pósaḋ ná taḃairt le pósaḋ feasta, aċ beid siad ar nós na n-aingeal ins na flaṫais.

²⁶ I dtaoḃ na marḃ, áṁṫaċ, go n-eireóċaid siad, nár léiġeaḃair i leaḃar Ṁaoise, conus mar aduḃairt Dia leis as an dtor: Is mise Dia Ábrahaim agus Dia Isaaic agus Dia Iacóib.

²⁷ Ní do ḋaoine marḃa is Dia é aċ do ḋaoine atá beó. D’á ḃríġ sin is mór atáṫaoi-se amú.

²⁸ Agus ṫáinig ċuige duine de sna Sgríḃneóiriḃ a ḃí ag éisteaċt leó-san ag déanaṁ an aiġnis, agus nuair a ċonaic a ḟeaḃas do ḟreagair sé iad, d’ḟiafraiġ sé ḋe cad í an ċéad aiṫne de sna h-aiṫeantaiḃ go léir.

²⁹ Agus d’ḟreagair Íosa é: Isí an ċéad aiṫne ḋíoḃ go léir: Clois, a Israéil, is aon Dia aṁáin do Ṫíġearna Dia-se;

³⁰ Agus gráḋfaiḋ tú do Ṫiġearna Dia ód’ ċroíḋe go h-iomlán, agus ót’ anam go h-iomlán, agus ót’ aigne go h-iomlán, agus ód’ neart go h-iomlán. Siní an ċéad aiṫne.

³¹ Agus is cosṁail léi an tarna h-aiṫne; Gráḋfair do ċóṁarsa mar ṫu féin. Ní’l aiṫne eile is mó ná iad san.

³² Agus duḃairt an Sgríḃneóir leis: Maiṫ, a Ṁáiġistir. Do laḃrais fírinne, aon gur b’eaḋ Dia, agus ná fuil ann aċ é.

³³ Agus é ġráḋú ó ċroiḋe go h-iomlán, agus ó ṫuisgint go h-iomlán, agus ó anam go h-iomlán, agus ó neart go h-iomlán, agus an ċóṁarsa do ġráḋú mar ḋuine féin. Is mó san ’ná gaċ íḋbirt agus ’ná gaċ ofráil.

³⁴ Agus nuair a ċonaic Íosa gur ḟreagair sé go ciallṁar, duḃairt sé leis: Ní’lir-se aḃfad ó ríġeaċt Dé. Agus mór leóṁaiġ aoinne é ċeisdiú as san amaċ.

³⁵ Agus ḃi Íosa ag teagasg sa teampul agus duḃairt sé: Conus adeir na Sgríḃneóirí gur mac do Ḋáiḃid Críost?

³⁶ Óir deir Dáiḃid féin, sa Spioraid Naoṁ, Duḃairt an Tiġearna lem’ Ṫiġearna, Suiḋ ar mo ḋeis go gcuiread do naṁaid mar ṫaca féd’ ċosaiḃ.

³⁷ Mar sin, tugann Dáiḃid féin a Ṫiġearna air, agus conus atá sé ’n-a ṁac aige? Agus d’éist an pobul mór leis agus áṫas orṫa.

³⁸ Agus duḃairt sé leó agus é ’ġa dteagasg: Seaċnaiḋ na Sgríḃneóirí. Is maiṫ leó siuḃal i n-éadaiġiḃ fada, agus go ndéanfaí úṁlú ḋóiḃ i n-áit an ṁargaiḋ;

³⁹ Agus suiḋe ins na caṫaoireaċaiḃ uaċtair ins na sinagógaiḃ, agus ins na h-ineadaiḃ tusaiġ ċun búird;

⁴⁰ Iṫid siad teaġlaċa na mbaintreaċ ar sgáṫ úrnuiġṫe fada: Ġeoḃaid siad san an ḃreiṫ is truime.

⁴¹ Agus do ṡuiḋ Íosa i n-aice áite an ċiste, agus ṫug sé fé ndeara conus a ċuireaḋ na daoine airgead isteaċ ann, agus do ċuir a lán daoine saiḋḃire mórán isteaċ ann.

⁴² Agus do ṫáinig baintreaċ ḋealḃ agus ċaiṫ sí isteaċ ḋá ċianóig, ’sé sin feóirling.

⁴³ Agus ġlaoiḋ sé ċuige a ḋeisgiobuil agus duḃairt sé leó: Go deiṁin a deirim liḃ gur mó a ċuir an ḃaintreaċ ḃoċt ḋealḃ so isteaċ sa ċiste ’ná mar a ċuir aoinne eile d’ár ċuir rud ann;

⁴⁴ Óir do ċuir an ċuid eile ann as a ḃflúirse, aċ do ċuir sí seo ann, d’á dealḃas, a raiḃ aici, a cuid an tsaoġal.