Maitiú 4 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL IV. Trosgaḋ Ċríost ar feaḋ daċad lá. – Froṁaḋ á ḋéanaṁ air — É ag tosnú ar ṡeanmóiniú; ar a ḋeisgiobuil do ġlaoḋaċ ċuige; agus ar ṁírḃúiltíḃ a ḋéanaṁ.

¹ Ansan do ṡeól an Spioraid Íosa isteaċ sa ḃfásaċ ċun go gcurfaí caṫ air ó’n ndiaḃal.

² Agus nuair a ḃí trosgaḋ déanta aige ar feaḋ daċad lá agus daċad oiḋċe, ansan do ṫáinig ocras air.

³ Agus ṫáinig an t-Áirseóir agus duḃairt sé leis: Má’s tu Mac Dé órduiġ arán a ḋéanaṁ des na cloċaiḃ sin.

⁴ Agus duḃairt seisean ’ġá ḟreagraḋ: Tá sgríoḃṫa: Ní h-ar arán aṁáin a ṁaireann an duine, aċ ar an uile ḟocal d’á dtagann ó ḃéal Dé.

⁵ Ansan do ṫóg an t-Áirseóir leis é isteaċ sa ċaṫair naoṁṫa, agus ċuir sé ’n-a ṡeasaṁ ar spuaic an teampuill é. Agus duḃairt sé leis: Má’s tu Mac Dé caiṫ ṫu féin le fánaiḋ. Óir tá sgríoḃṫa:

⁶ Mar go dtug sé órdú d’á aingealaiḃ ad’ ṫaoḃ, agus glacfaid siad ’n-a láṁaiḃ ṫu sar a mbuailfá do ċos i gcoinniḃ cloiċe.

⁷ Duḃairt Íosa leis: Tá rud eile sgríoḃṫa, leis: Ná dein froṁaḋ ar do Ṫiġearna Dia.

⁸ Ansan do rug an t-Áirseóir leis é go mullaċ cnuic a ḃí ana-árd, agus ṫaisbeáin sé ḋó ríġeaċta an doṁain go léir, agus a ngradam;

⁹ Agus duḃairt sé leis: Taḃarfad iad san go léir duit aċ sléaċtaḋ ḋom agus mé ḋ’aḋraḋ.

¹⁰ Ansan duḃairt Íosa leis: Imṫiġ, a Ṡátain; Óir tá sgríoḃṫa: Aḋarfaiḋ tú do Ṫiġearna Dia, agus beiḋ tú uṁal dó san aṁáin.

¹¹ Ansan d’imṫiġ an t-Áirseóir uaiḋ, agus féaċ, ṫáinig na h-aingil agus ḋeineadar friṫálaṁ air.

¹² Agus nuair airiġ Íosa Eóin a ḃeiṫ ’n-a ṗríosúnaċ d’imṫiġ sé go Gaililí;

¹³ Agus d’ḟág sé Nasaret, agus ċuaiḋ sé ċun cóṁnuiġṫe i gCaṗarnaum i n-aice na faraige, i gcríoċ Sabulon agus Neṗtalim.

¹⁴ Ionus go gcóṁlíonfaí an níḋ aduḃairt Isáias fáiḋ:

¹⁵ Talaṁ Sabulon agus talaṁ Neṗtalim, fan na faraige lastall de Iórdan, Gaililí na ngeinte:

¹⁶ Pobul a ḃí suiḋte i ndorċadas, ċonacadar solus mór, agus d’eiriġ solus do’n ṁuintir a ḃí suiḋte sa n-áit ar a raiḃ sgamall an ḃáis.

¹⁷ As san amaċ do ṫusnuiġ Íosa ar ṡeanmóin, agus ar a ráḋ: Deiniḋ aiṫriġe, óir tá ríġeaċt na ḃflaṫas buailte liḃ.

¹⁸ Agus ḃí Íosa ag siuḃal i n-aice mara Ġaililí, agus ċonaic sé beirt driṫár, Símón, ar a dtugtar Peadar, agus Aindrias, a ḋriṫáir, agus iad ag cur lín amaċ sa ḃfaraige (mar iasgairí ab eaḋ iad),

¹⁹ Agus duḃairt sé leó: Tagaiḋ am’ ḋiaiḋ-se, agus déanfad iasgairí ar ḋaoiniḃ ḋíḃ.

²⁰ Agus gan ṁoill d’ḟágadar ansan na líonta, agus do leanadar é.

²¹ Agus ag imṫeaċt ó’n áit sin dó, do ċonaic sé beirt eile driṫár, Séamus mac Sebedé agus a ḋriṫáir Eóin, agus iad sa ḃád i dteannta a n-aṫar Sebedé, ag deisiú a líonta; agus do ġlaoiḋ sé ċuige iad.

²² Agus gan ṁoill d’ḟágadar ansan na líonta agus a n-aṫair, agus do leanadar é.

²³ Agus do ġluais Íosa mór-ṫímpal Ġaililí go léir, ag teagasg ins na sinagógaiḃ, agus ag craoḃsgaoileaḋ soisgéil na ríġeaċta, agus ag leiġeas gaċ galair agus gaċ breóiteaċta d’á raiḃ ar ḋaoine.

²⁴ Agus do leaṫ a ċlú ar fuid Siria go léir, agus do tugaḋ ag triall air na daoine go léir a ḃí as a sláinte, gaḃṫa le galaraiḃ agus le piantaiḃ, agus daoine go raiḃ deaṁain ionta, agus daoine a ḃí as a meaḃair, agus daoine a ḃí gan lúṫ, agus do leiġis sé iad.

²⁵ Agus do lean sluaiġte móra é a Gaililí agus a Decapolis agus a Ierúsalem, agus ó’n dtaoḃ ṫall de Iórdan.