Maitiú 2 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL II. Ofrálaċa na suaḋ. An teiṫe ċun na h-Éigipte. Marḃaḋ na leanḃ.

¹ Ansan, nuair a rugaḋ Íosa i mBetlehem Iúda, i laeṫiḃ an rí Héróid, ṫáinig draoiṫe ó’n ndoṁan toir go Ierúsalam, agus duḃradar:

² Cá ḃfuil an rí seo na n-Iúdaċ atá beirṫe? Mar do ċonacamairne a réalt sa doṁan toir agus ṫánamair ċun é ḋ’aḋraḋ.

³ Nuair airiġ Héród, an rí, an méid sin ṫáinig buaireaṁ air, agus ar Ierúsalem go léir ċóṁ maiṫ.

⁴ Agus ċruinniġ sé uaċtaráin na sagart agus sgríḃneóirí an ṗobuil, agus d’ḟiafraiġ sé ḋíoḃ cá mbéarfaí Críost.

⁵ Agus duḃradar-san leis: I mBetlehem Iúda, óir sin mar atá sgríoḃṫa ag an ḃfáiḋ:

⁶ Agus tusa, a Ḃetlehem, a ṫalaṁ Iúda, ní tu is lúġa i n-aon ċor ar ṫaoiseaċaiḃ Iúda, óir is asat-sa a ṫiocfaiḋ an taoiseaċ a ḋéanfaiḋ mo ṗobul Israél do riaraḋ.

⁷ Ansan do ġlaoiḋ Héród na draoiṫe ċuige, a gan ḟios, agus fuair sé amaċ uaṫa go cruinn an t-am i n-ar taisbeánaḋ an réalt dóiḃ.

⁸ Agus do stiúruiġ sé go Betlehem iad, agus duḃairt sé: Cuarduiġiḋ go maiṫ an mac so; agus nuair a ġeoḃaiḋ siḃ tuairisg air tagaiḋ agus innsiḋ dóṁ-sa é, go dtéiġead agus go n-aḋrad é, leis.

⁹ Tar éis na cainte sin ó’n rí d’imṫiġeadar. Agus féaċ, an réalt a ċonacadar sa doṁan toir do ġluais sé rómpa go dtáinig sé agus gur stad sé os cionn na h-áite i n-a raiḃ an leanḃ.

¹⁰ Nuair a ċonacadar an réalt do ṫáinig árd-áṫas orṫa.

¹¹ Agus ċuadar isteaċ sa tiġ, agus fuaradar an leanḃ agus a ṁáṫair, Muire, agus ṡléaċtadar dó agus d’aḋradar é; agus d’osgaladar a gcuid stóir, agus ṫugadar bronn-tanas dó, ór agus túis agus mirr.

¹² Agus do tugaḋ foláraṁ dóiḃ i dtaiḃreaṁ gan dul ṫar n-ais go dtí Héród, agus ċuadar bóṫar eile ṫar n-ais ċun a dtíre féin.

¹³ Nuair a ḃíodar-san imṫiġṫe do ṫaisbeáin aingeal an Tiġearna é féin do Ióseṗ, ’n-a ċodla, agus duḃairt sé. Eiriġ, agus tóg leat an leanḃ agus a ṁáṫair agus imṫiġ go h-Éigipt, agus fan ann go n-innsead duit, mar beiḋ Héród ag lorg an leinḃ ċun a ṁairḃṫe.

¹⁴ D’eiriġ seisean, agus ṫóg sé leis an leanḃ agus a ṁáṫair, agus ċuaiḋ sé sa n-Éigipt;

¹⁵ agus ḃí sé sa n-áit sin ċun go ḃfuair Héród bás; Ionus go gcóṁlíonfaí an focal aduḃairt an Tiġearna tré ḃéal an ḟáiḋ, nuair aduḃairt sé: As an Éigipt do ġlaoḋas mo ṁac.

¹⁶ Ansan, nuair a ċonaic Héród gur ṁeall na draoiṫe é, ṫáinig fearg ana-ṁór air agus ċuir sé amaċ a luċt airm agus ṁairḃ sé a raiḃ de ṁacaiḃ dá ḃlian, nó fé n-a ḃun, i mBetlehem agus ins na triúċaiḃ go léir a ḃain léi, do réir an méid aimsire a fuair sé amaċ ó ċaint na ndraoiṫe.

¹⁷ Ansan iseaḋ do cóṁlíonaḋ an ċaint aduḃairt Ieremias fáiḋ nuair aduḃairt sé:

¹⁸ Do h-airiġeaḋ guṫ i Ráma, árd-ġol agus iomad ologón, Ráchel ag caoine a clainne, agus ná glacfaḋ sí sólás toisg gan iad a ḃeiṫ ann.

¹⁹ Tar éis ḃáis Héróid, áṁṫaċ, féaċ, do ṫaisbeáin aingeal an Tiġearna é féin do Ióseṗ i dtaiḃreaṁ, sa n-Éigipt.

²⁰ Agus duḃairt: Eiriġ, agus tóg leat an leanḃ agus a ṁáṫair, agus imṫiġ go tír Israéil, óir an ṁuíntir a ḃí ar tí an leinḃ do ċur ċun ḃáis táid siad tar éis ḃáis.

²¹ Agus d’eiriġ seisean agus ṫóg sé leis an leanḃ ⁊ a ṁáṫair, agus ṫáinig sé go tír Israéil.

²² Aċ d’airiġ sé Archelaus a ḃeiṫ ’n-a rí ar Iúdéa i n-inead a aṫar, Héród, agus níor leig eagla ḋó dul ansan; agus do tugaḋ foláraṁ dó i n-a ċodla, agus ċuaiḋ sé i gcríoċaiḃ Ġaililí.

²³ Agus ṫáinig sé ċun cóṁnuiġṫe sa ḃaile ar a dtugtar Nasaret, ionus go gcóṁlíonfaí an níḋ aduḃairt na fáiḋe: Óir taḃarfar Nasarénaċ air.