Maitiú 15 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL XV. Na Sgríḃneóirí d’á n-imḋeargaḋ ag Críost. Inġean na mná ó Ċanaan, agus a lán eile d’á leiġeas aige agus bia aige ’á ṫaḃairt do ċeiṫre ṁíle duine le seaċt mbológaiḃ.

¹ Ansan do ṫáinig Sgríḃneóirí agus Fairisíniġ ag triall air ó Ierúsalem, agus duḃradar:

² Cad ċuige go mbrisid do ḋeisgioḃuil-se nósa na sean? Óir ní níġid siad a láṁa nuair a ċaiṫid siad bia.

³ Agus d’ḟreagair sé iad, agus duḃairt: Cad ċuige go mbriseann siḃ-se dlíġ Dé ar son ḃúr sean-nós? Óir deir Dia:

⁴ Taḃair do t’ aṫair agus do d’ ṁáṫair onóir; agus, An t-é déanfaiḋ easgaine ar a aṫair nó ar a ṁáṫair curtar ċun báis é.

⁵ Deir siḃ-se, áṁṫaċ, Pé duine adeir le n-a aṫair nó le n-a ṁáṫair, Gaċ taḃarṫas d’á dtugaim-se uaim, beiḋ a ṫairḃe agat-sa;

⁶ Agus ní onórfaiḋ sé a aṫair ná a ṁáṫair; agus tá aiṫne Dé curṫa agaiḃ ar neaṁníḋ ar son ḃur sean-nós.

⁷ A ċluanaiḋṫe, is maiṫ a ṫargair Isáias i nḃúr dtaoḃ nuair aduḃairt sé:

⁸ Onóraid na daoine seo mé le n-a mbéal, aċ is fada uaim atá a gcroiḋe.

⁹ Agus is onóir gan ḃunús a ṫugaid siad dom, ag múineaḋ teagaisg agus aiṫeanta daoine.

¹⁰ Agus do ġlaoiḋ sé ċuige an pobul, agus duḃairt sé leó: Cloisiḋ agus tuigiḋ:

¹¹ Ní h-é an rud a ṫéiġeann isteaċ sa ḃéal a ṡailiġeann an duine, aċ an rud a ṫagann amaċ as an mbéal, siné a ṡailiġeann an duine.

¹² Ansan do ṫáinig a ḋeisgiobuil ċuige, agus duḃradar leis. An eol duit go ḃfuil sgannal glacaiṫe ag na Fairisíniġ ó airiġeadar an focal san?

¹³ Aċ d’ḟreagair seisean: Gaċ curadóireaċt nár ċuir m’Aṫair neaṁḋa-sa, stracfar as a ṗréacaiḃ é.

¹⁴ Sgaoiliḋ leó san; giollaí dalla ag dallaiḃ iseaḋ iad; agus má ḋeineann dall giollaċt ar ḋall, tuitfid siad araon sa díg.

¹⁵ Agus d’ḟreagair Peadar agus duḃairt: Mínig dúinn an tsoluíd úd.

¹⁶ Agus duḃairt seisean: Agus an ḃfuil siḃ-se féin gan tuisgint fós?

¹⁷ Ná tuigeann siḃ, gaċ níḋ a ṫéiġeann isteaċ sa ḃéal, go dtéiġeann sé síos sa ḃolg, agus go n-imṫiġeann sé sa ḃfiailteaċ?

¹⁸ Aċ na neiṫe a ṫagann as an mbéal, is ó’n gcroiḋe a ṫagaid siad; agus isiad a ṡailiġeann an duine.

¹⁹ Óir is amaċ as an gcroiḋe a ṫagaid droċ-smuínte, dúnṁarḃaḋ, aḋaltranas, striapaċas, gadaiḋeaċt, leaḃair éiṫiġ, diaṁasla;

²⁰ Siniad a ṡailiġeann an duine; Agus ní bia a ḋ’iṫe gan láṁa do níġe a ṡailiġeann an duine.

²¹ Agus d’imṫiġ Íosa as an áit sin, agus ċuaiḋ sé go críoċaiḃ Tuíre agus Sídóin.

²² Agus féaċ, ṫáinig bean ó Ċanaan amaċ as na críoċaiḃ sin, agus do ġlaoiḋ sí: A Ṫiġearna, a Ṁic Dáiḃid, fóir orm! ar sisi; Tá m’inġean d’á ciapaḋ go cruaiḋ ag deaṁan.

²³ Agus níor ṫug sé aon ḟreagra uirṫi. Agus ṫáinig a ḋeisgiobuil ċuige, agus d’iarradar air í leigint ċun siúḃail. Leig ċun siúḃail í, ar siad; tá sí ag glaoḋaċ i n-ár ndiaiḋ.

²⁴ Ansan duḃairt sé léi: Níor cuireaḋ mé aċ ċun na gcaoraċ a cailleaḋ ó teaġlaċ Israéil.

²⁵ Aċ do ṫáinig sisi agus do ṡléaċt sí ḋó, agus, Fóir orm, a Ṫiġearna, ar sisi.

²⁶ Agus d’ḟreagair sé: Ní maiṫ an rud bia na leanḃ a ṫaḃairt dos na coileánaiḃ.

²⁷ Aċ, a Ṫiġearna, ar sisi, iṫid na coileáin an brúscar a ṫuiteann ó ḃórd a dtiġearnaí.

²⁸ Ansan d’ḟreagair Íosa agus duḃairt sé léi: A ḃean, is mór é do ċreideaṁ. Deintear duit mar is mian leat. Agus do slánuiġeaḋ a h-inġean ó’n uair sin.

²⁹ Agus d’imṫiġ Íosa ó’n áit, agus ṫáinig sé go bpuaċ mara Ġaililí; agus ċuaiḋ sé suas ar ċnoc, agus ṡuiḋ sé ann.

³⁰ Agus ṫáinig sluaiġte móra ċuige, agus daoine balḃa acu, agus daill, agus bacaiġ, agus daoine leicṫe, agus mórán eile; agus ċaiṫeadar agá ċosaiḃ iad, agus do leiġis sé iad;

³¹ I dtreó go raiḃ iongnaḋ ar na sluaiġte nuair a ċonacadar na daoine a ḃí balḃ ag caint, agus na daoine a ḃí bacaċ ag siúḃal, agus raḋarc ag na dallaiḃ; agus do ṁoladar Dia Israéil.

³² Ansan do ġlaoiḋ Íosa ċuige a ḋeisgiobuil agus duḃairt sé: Tá truaġ agam do’n tsluaġ, óir táid siad tar éis fanṁaint trí lá am’ ḟoċair agus ní’l aon níḋ le n-iṫe acu; agus ní maiṫ liom iad do ċur uaim ’n-a dtrosgaḋ, le h-eagla go dtuitfidís ar an slíġ.

³³ Agus duḃairt a ḋeisgiobuil leis: Aċ cá ḃfaiġmíd-ne, i ḃfásaċ, oiread aráin agus ṡásóċaiḋ a leiṫéid de ṡluaġ?

³⁴ Agus duḃairt Íosa leó: An ’mó bulóg agaiḃ? Agus duḃradar-san, Seaċt mbulóga, agus raint d’ iasgaiḃ beaga.

³⁵ Agus d’órduiġ sé do’n tsluaġ suiḋe ar an dtalaṁ.

³⁶ Agus ṫóg sé na seaċt mbulóga agus na h-iasga, agus ġaiḃ sé buiḋeaċas, agus do ḃris sé iad, agus ṫug sé dos na deisgiobuil iad, agus ṫugadar-san do’n tsluaġ iad.

³⁷ Agus d’iṫeadar go léir, agus ḃí a ndóiṫin acu; Agus an bia briste do fágaḋ, do ṫógadar é i seaċt gciseánaiḃ lána.

³⁸ Agus isé méid daoine a ċaiṫ bia ann ná ċeiṫre ṁíle duine, lasmuiġ de ṁiondaoiniḃ agus de ṁnáiḃ.

³⁹ Ansan do ċuir sé uaiḋ an tsluaġ, agus ċuaiḋ sé ar bórd na luinge bige, agus ṫáinig sé i gcríoċaiḃ Magedan.