Lúcas 3 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL III. Missiún Eóin agus a ṡeanmóiniú. Críost dá ḃaisteaḋ aige.

¹ Sa ċúigṁaḋ bliain déag d’ímpireaċt Ṫiberias Caesair, nuair a ḃí Pontius Pílát i n’uaċtarán ar Iúdaéa, agus Héród ’n-a ṫetrarc ar Ġaililí, agus a ḋriṫáir Pilib ’n-a ṫetrarc ar Ituria agus ar ċríċ Traconítis, agus Lisanias ’n-a ṫetrarc ar Abilína,

² I n aimsir an dá árdṡagart Annas agus Caiṗas, do ṫárla briaṫar Dé ar Eóin mac Sacariais sa ḃfásaċ.

³ Agus ṫáinig sé ar fuid na gcríoċ go léir ar bruaċ Iórdain ag fógairt baiste ċun aiṫriġe agus ċun maiṫeaṁnaċais peacaí,

⁴ Mar atá sgríoḃṫa i leaḃar na ḃfocal aduḃairt Isáias fáiḋ: Guṫ duine ag glaoḋaċ sa ḃfásaċ: Deiniḋ slíġ an Tiġearna d’ollaṁú: Deiniḋ na bóiṫre do ḋíriú ḋó;

⁵ Líonfar gaċ gleann, agus ísleófar gaċ sliaḃ agus gaċ cnoc, agus beiḋ gaċ cam ’n-a ḋíreaċ agus gaċ garḃ ’n-a slíġ réiḋ,

⁶ Agus ċífiḋ gaċ feóil an slánú a ḋéanfaiḋ Dia.

⁷ Agus deireaḋ sé leis an muintir a ṫagaḋ amaċ ċun go mbaistfí iad: A ṡíol na n-aiṫreaċ niṁe, cé ṁúin daoiḃ-se conus dul ó’n ndíḃfeirg atá ag teaċt?

⁸ Tugaiḋ uaiḃ, d’á ḃríġ sin, toraḋ a ḃeiḋ ċóṁ maiṫ leis an aiṫriġe, agus ná cromaiḋ ar a ráḋ: Tá Ábraham i n’aṫair againn. Deirim liḃ go ḃféadfaḋ Dia slioċt do ṫógaint ċun Ábrahaim ó-s na cloċaiḃ sin.

⁹ Tá an tuaġ curṫa ar ṗréiṁ na gcrann ċeana féin. Agus gaċ crann ná taḃarfaiḋ toraḋ fóġanta uaiḋ gearrfar é, agus curfar sa teine é.

¹⁰ Agus do ċeistiġ na daoine é, agus duḃradar: Cad ’tá le déanaṁ againn má ’seaḋ?

¹¹ Agus d’ḟreagair sé agus duḃairt leó: An t-é go ḃfuil ḋá ċasóig aige tugaḋ sé do’n t-é ná fuil aige; agus an t-é go ḃfuil bia aige deineaḋ sé mar an gcéadna.

¹² Agus ṫáinig puibliocánaiġ ag triall air go mbaistfí iad, agus duḃradar leis: A Ṁáiġistir, cad tá le déanaṁ againn?

¹³ Agus duḃairt seisean leó: Ná deiniḋ níor mó ’ná mar atá ceapaiṫe ḋaoiḃ le déanaṁ.

¹⁴ Agus do ċeistiġ saiġdiúirí é, agus duḃradar: Cad tá le déanaṁ againne? Agus duḃairt sé leó: Ná deiniḋ láṁláidir ar aoinne, agus ná deiniḋ cúlċaint ar aoinne, agus bíḋiḋ sásta le nḃúr dtuarasdal.

¹⁵ Agus ḃí na daoine ag breiṫniú agus ag maċtnaṁ ’n-a gcroiḋe féin i dtaoḃ Eóin, go mb’ḟéidir gur ḃ’é Críost é.

¹⁶ Agus d’ḟreagair Eóin agus duḃairt leó go léir: Táim-se ag ḃúr mbaisteaḋ le h-uisge; aċ tiocfaiḋ duine is treise ’ná mé, duine náċ fiú mé go ndéanfainn iall a ḃróige do sgaoileaḋ. Baistfiḋ sé sin siḃ leis an Spioraid Naoṁ agus le teine.

¹⁷ Tá a ġaoṫrán ’n-a láiṁ aige agus glanfaiḋ sé a úrlár buailte, agus cruinneóċaiḋ sé a ċuid cruiṫneaċtan isteaċ ’n-a sgioból, agus dóġfaiḋ sé an cáṫ le teine náċ féidir a ṁúċaḋ.

¹⁸ Agus do ċraoḃsgaoil sé a lán neiṫe eile do sna daoine ’ġá gcóṁairliú.

¹⁹ Aċ Héród, an tetrarc, nuair a laḃair sé leis i dtaoḃ Héródias, bean a ḋriṫár, agus i dtaoḃ na ndroċ-ḃeart eile a ḋein Héród,

²⁰ Ċuir sé an méid seo leó go léir, agus ċuir sé Eóin i bpríosún.

²¹ Do ṫárla, áṁṫaċ, nuair a ḃí na daoine go léir ḋ’á mbaisteaḋ, agus nuair a baisteaḋ Íosa agus ḃí sé ag guiḋe, gur h-osgalaḋ an spéir,

²² Agus gur ṫúirling an Spioraid Naoṁ air i rioċt corparṫa, mar ḃeaḋ colúr, agus ṫáinig guṫ as an spéir: Is tusa mo Ṁac dílis; is ort atá mo ġreann.

²³ Agus ḃí Íosa féin ag dul ’n-a ḋeiċṁaḋ bliain fiċid nó mar sin, ’n-a ṁac, dar le daoine, ag Ióseṗ, mac Hélí, mic Maṫat,

²⁴ mic Leḃí, mic Melċí, mic Ianna, mic Ióseṗ,

²⁵ Mic Matatias, mic Amos, mic Nahúm, mic Heislí, mic Nagge,

²⁶ Mic Mahat, mic Matatias, mic Semeí, mic Ióseṗ, mic Iúda.

²⁷ Mic Ioanna, mic Résa, mic Sorobabel, mic Salatiel, mic Nérí,

²⁸ Mic Melċí, mic Addí, mic Ċósam, mic Elmadain, mic Héir,

²⁹ Mic Iósé, mic Elieseir, mic Iórím, mic Maṫat, mic Leḃí,

³⁰ Mic Simeóin, mic Iúda, mic Ióseṗ, mic Iónain, mic Eliacim,

³¹ Mic Melea, mic Menna, mic Matata, mic Nátán, mic Dáiḃid,

³² Mic Iessé, mic Óbéd, mic Boos, mic Salmóin, mic Naassóin,

³³ Mic Aminadaiḃ, mic Áram, mic Esróin, mic Ṗáres, mic Iúda.

³⁴ Mic Iacóib, mic Isaaic, mic Ábrahaim, mic Tárá, mic Naċór,

³⁵ Mic Sarug, mic Ragau, mic Ṗaleg, mic Ebeir, mic Sale,

³⁶ Mic Cainan, mic Arṗacsad, mic Sém, mic Nóe, mic Lameċ,

³⁷ Mic Matúsala, mic Enóċ, mic Iáred, mic Malaleél, mic Caïnán,

³⁸ Mic Enós, mic Sét, mic Adam, mic Dé.