Lúcas 23 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL XXIII. Tuairisg na Páise ar leanṁaint.

¹ Agus d’eiriġeadar go léir agus do rugadar ag triall ar Ṗílát é.

² Agus ċromadar ar neiṫe do ċur ’n-a leiṫ, agus deiridís: Fuaramair é seo ag cur na ndaoine ar a n-aiṁleas, agus ag cosg cíosa do ṫaḃairt do Ċaesar, agus ’ġá ráḋ gur b’é Críost an rí é.

³ Agus do ċuir Pílát ceist ċuige agus duḃairt sé: An tusa rí na n-Iúdaċ? Agus duḃairt seisean ’ġá ḟreagraḋ: Deirir é.

⁴ Agus duḃairt Pílát le h-uaċtaráin na sagart agus leis an sluaġ: Ní ḃfaiġim aon ċoir sa duine seo.

⁵ Aċ do ġéaruiġ orṫa-san agus duḃradar: Tá sé ag buaireaṁ na ndaoine, ag teagasg ar fuid Iúdaéa go léir, ag tusnú ó Ġaililí go dtí an áit seo.

⁶ Nuair a d’airiġ Pílát Gaililí d’ḟiafraiġ sé ar Ġaililíaċ an duine.

⁷ Agus nuair a ṫuig sé gur le cóṁaċt Héróid a ḃain sé, ċuir sé ag triall ar Héród é, mar ḃí Héród i n-Ierúsalem na laeṫanta san.

⁸ Agus nuair a ċonaic Héród Íosa ḃí áṫas ana-ṁór air, óir ḃí sé aḃfad ag súil le h-é d’ḟeisgint, mar ḃí sé tar éis a lán d’aireaċtaint ’n-a ṫaoḃ, agus ḃí súil aige go ḃfeicfeaḋ sé mírḃúilt ṁór éigin aige ’á ḋéanaṁ.

⁹ Agus ḋein sé a lán cainte ’ġá ċeistiú. Aċ níor ṫug seisean aon ḟreagra air.

¹⁰ Agus ṡeasaṁ uaċtaráin na sagart agus na Sgríḃneóirí agus iad coitċianta ag cur ’n-a leiṫ.

¹¹ Agus ṫug Héród agus a luċt airm tarcuisne ḋó, agus ċuir sé éadaċ bán air, ċun magaiḋ, agus ċuir sé ṫar n-ais ag triall ar Ṗílát é.

¹² Agus ṫáinig caradas an lá san idir Ṗílát agus Héród, mar, naṁaid ab eaḋ iad d’á céile roimis sin.

¹³ Agus do ċruinniġ Pílát uaċtaráin na sagart agus maiṫe an ṗobuil agus na daoine.

¹⁴ Agus duḃairt sé leó: Ṫugaḃair ċúġam an duine seo mar go raiḃ sé ag cur na ndaoine ar aiṁleas, agus féaċ, do ċeistiġeas os ḃúr gcóṁair é agus ní ḃfuaras ciontaċ i n-aon níḋ é de sna neiṫiḃ atá agaiḃ ’á ċur ’n-a leiṫ.

¹⁵ Agus ní lúġa ’ná mar a fuair Héród; mar do ċuireas ag triall air siḃ, agus féaċ níor deineaḋ aon níḋ leis ba ċóṁionan le bás.

¹⁶ Smaċtóċad é agus leigfead ċun siuḃail é.

¹⁷ Aċ ḃí air aoinne aṁáin do leigint saor ċúċa mar ġeall ar lá na féile.

¹⁸ Aċ do liúiġ an pobul go léir agus duḃradar: Tóg uainn é seo agus sgaoil ċúġainn Barabbas,

¹⁹ Fear a ḃí istiġ le marḃú duine agus mar ġeall an ċeannairc a deineaḋ sa ċaṫair.

²⁰ Aċ do laḃair Pílát leó airís a d’iarraiḋ Íosa do leigint saor.

²¹ Agus is aṁlaiḋ a liúġadar níos aoirde: Dein é ċéasaḋ; dein é ċéasaḋ.

²² Agus duḃairt seisean leó an tríṁaḋ h-uair: Agus cad é an t-olc atá déanta aige? Ní ḃfaiġim aon ċoir ḃáis ann; smaċtóċad é, d’á ḃríġ sin, agus leigfead ċun siuḃail é.

²³ Aċ do leanadar-san ag liúiriġ do ġuṫanaiḃ árda go ndéanfaí é ċéasaḋ, agus do ḃuaiḋ a nguṫana.

²⁴ Agus ṫug Pílát mar ḃreiṫ an níḋ a ḃí uaṫa do ḋéanaṁ.

²⁵ Agus do leig sé saor ċúċa an fear a ḋ’iarradar, an fear a ḃí istiġ le marḃú duine agus le ceannairc; agus ṫug sé Íosa ḋóiḃ ċun a dtoile ḋ’imirt air.

²⁶ Agus nuair a ḃíodar ’ġá ḃreiṫ leó do rugadar ar ḋuine ó Ċíréné dár ḃ’ainim Símón, agus é ag teaċt isteaċ ó’n dtuaiṫ, agus ċuireadar an ċros ar a ṁuin ċun í ḋ’iompar i ndiaiḋ Íosa.

²⁷ Agus ḃí mórán daoine ’ġá leanṁaint, agus mná, agus iad ag gol agus ag caoi mar ġeall air.

²⁸ Agus d’iompuiġ Íosa orṫa agus duḃairt sé leó: A ṁná Ierúsaleim, ná ḃíḋiḋ ag gol mar ġeall orm-sa, aċ ḃíḋiḋ ag gol ar ḃúr son féin agus as son ḃúr gclainne.

²⁹ Óir tiocfaid na laeṫanta ’n-a ndéarfar, Is aoiḃinn do sna h-aimridiḃ, agus do sna broinníḃ nár rug clann, agus do sna cíoċaiḃ nár ṫál bainne.

³⁰ An uair sin cromfaid daoine ar a ráḋ leis na sléiḃtiḃ, Tuitiḋ anuas orainn; agus leis na cnocaiḃ, Clúdaiġiḋ sinn.

³¹ Óir má ḋeinid siad na neiṫe seo sa n-aḋmad ġlas, cad a déanfar sa n-aḋmad ċríon?

³² Agus ḃí ḃeirt eile, beirt ṁéirleaċ, d’á mbreiṫ i n-aonḟeaċt leis ċun iad do ċur ċun ḃáis.

³³ Agus nuair a ḃíodar tagaiṫe ċun na h-áite ar a dtugtar Áit an ċloiginn do ċéasadar ansan é, agus an ḃeirt ḃiṫeaṁnaċ, duine, acu ar a láiṁ ḋeis agus an duine eile ar a láiṁ ċlé.

³⁴ Agus duḃairt Íosa: A Aṫair, maiṫ ḋóiḃ; óir ní fios dóiḃ cad ’tá acu ’á ḋéanaṁ. Agus do rainneadar a ḃaill éadaiġ, ’ġá gcur ar ċrannaiḃ.

³⁵ Agus ḃí na daoine ’n-a seasaṁ ag féaċaint air, agus ḃí na h-uaċtaráin ag magaḋ faoi leó, agus deiridís: D’ḟóir sé ar ḋaoiniḃ eile, fóireaḋ sé air féin, má ’sé an Críost é a toġaḋ ó Ḋia.

³⁶ Agus ḃí na saiġidiúirí ag déanaṁ magaiḋ faoi, ag teaċt agus ag taḃairt fínéigre ḋó,

³⁷ Agus deiridís: Má’s tú rí na n-Iúdaċ saor tú féin.

³⁸ Agus ḃí sgríḃinn sgríoḃṫa os a ċionn i litreaċaiḃ Gréigise agus Laidne agus Eaḃra: RÍ NA N-IÚDAĊ É SEO.

³⁹ Agus ṫug duine de’n ḃeirt ḃiṫeaṁnaċ a ḃí ar croċaḋ masla dó, agus deireaḋ sé: Má’s tú Críost dein tu féin agus sinne do ṡaoraḋ.

⁴⁰ Aċ do ḟreagair an fear eile é ag milleán air, agus duḃairt sé: An aṁlaiḋ ná fuil eagla Dé ort agus tú fé’n ndaor-ḃreiṫ ċéadna?

⁴¹ Sinne áṁṫaċ, le ceart, mar do tugaḋ dúinn an rud a ḃi tuillte againn; aċ níor ḋein an duine seo aon droċ-níḋ.

⁴² Ansan duḃairt sé le h-Íosa: A Ṫiġearna, nuair a ṫiocfair ad ríġeaċt cuiṁniġ orm-sa.

⁴³ Agus duḃairt Íosa leis: Deirim, leat go fíos go mbeiḋ tú i ḃflaṫas Dé indiu am’ ḟoċair-se.

⁴⁴ Ansan ḃí sé tímpal na séṁaḋ h-uaire, agus ṫáinig doirċeaċt ar an ndoṁan go léir go dtí an naoṁaḋ h-uair.

⁴⁵ Agus do doirċiġeaḋ an ġrian; agus do stracaḋ brat an teampail tré n-a lár.

⁴⁶ Agus duḃairt Íosa, do ġuṫ árd: A Aṫair, cuirim mo spioraid isteaċ ad’ láṁaiḃ. Agus ag rád na ḃfocal san dó, d’éag sé.

⁴⁷ Agus nuair a ċonaic an taoiseaċ céad cad a ṫárla ṫug sé glóire do Ḋia, agus duḃairt sé: Fíoraon ab eaḋ an duine seo gan aṁras.

⁴⁸ Agus an tsluaġ go léir daoine a ḃí ann ag féaċaint ar an raḋarc san, agus do ċonaic na neiṫe a ṫuit amaċ, ṫánadar ṫar n-ais agus iad ag bualaḋ a n-uċt.

⁴⁹ Agus a luċt aiṫne go léir, agus na mná do lean é ó Ġaililí, do ṡeasuiġeadar aḃfad amaċ, ag féaċaint ar na neiṫe sin.

⁵⁰ Agus féaċ, fear dár ḃ’ainim Ióseṗ, agus de’n ċóṁairle ab eaḋ é, fear fóġanta fíoraonta;

⁵¹ Níor ṫoiliġ sé leis an gcóṁairle ’ná le n-a ngníoṁarṫa; ó Arimatéa b’eaḋ é, caṫair i n-Iúdaéa; agus ḃí sé ag súil le ríġeaċt Dé:

⁵² Ṫáinig sé sin ag triall ag Pílát, agus d’iarr sé corp Íosa air.

⁵³ Agus ṫóg sé anuas é, agus d’ḟill sé i línéadaċ é, Agus ċuir sé i dtuama é a ḃí gearrṫa i gcaraig, agus nár cuireaḋ aoinne ann go dtí san,

⁵⁴ Agus ḃí lá an ollaṁuiġṫe ann, agus ḃí an tsabbóid ag teaċt.

⁵⁵ Agus ṫáinig na mná a lean é ó Ġaililí agus ċonacadar an tuama agus conus mar a ḃí an corp curṫa ann.

⁵⁶ Agus d’ḟilleadar agus d’ollaṁuiġeadar spíosra agus oíle, agus ansan do ġlacadar a suaiṁneas i gcaiṫeaṁ na sabbóide, do réir na h-aiṫne.