Lúcas 2 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL II. Beirtear Críost. Tugtar do’n Tiġearna é. Targaireaċt Simeón. Faġtar Críost, i n-aoír a ḋá ḃlian déag, ameasg na ndoċtúirí.

¹ Do ṫárla, áṁṫaċ, ins na laeṫiḃ sin go ndeaġaiḋ reaċt amaċ ó Ċaesar August go ndéanfaí áireaṁ ar an ndoṁan go léir.

² Do deineaḋ an ċéad áireaṁ so nuair a ḃí Curínus i n’ uaċtarán ar críċ Síria.

³ Agus do ġluais na daoine go léir ċun go ndéanfaí iad d’áireaṁ, gaċ aoinne ’n-a ċaṫair féin.

⁴ Agus ċuaiḋ Ióseṗ ó Ġaililí, ó ċaṫair Nasareit, suas go Iúdaéa, go caṫair Ḋáiḃid ar a dtugtar Betlehem, toisg go mba de ṫeaġlaċ agus de ṡlioċt Dáiḃid é.

⁵ Ċun go ndéanfaí é ḋ’áireaṁ i n-aonḟeaċt le Muire, a ḃan-ċéile a ḃí ag iompar clainne.

⁶ Agus do ṫárla, agus iad ann, go dtáinig a h-aimsir ċun na clainne do ḃreiṫ;

⁷ Agus do rug sí a mac, a céadġein, agus d’ḟill sí i n-éadaiġiḃ é, agus ċuir sí ’n-a luiġe i mainséar é, mar ní raiḃ aontslíġ ḋóiḃ sa tiġ ósda.

⁸ Agus do ḃí aoḋairí sa ċeanntar ċéadna agus iad ag faire na dtráṫ sa n-oiḋċe ar a dtréad.

⁹ Agus féaċ, ṫáinig aingeal ó’n dTiġearna agus ṡeasaiṁ sé ’n-a n-aice, agus do las solus Dé ’n-a dtímpal, agus ṫáinig eagla mór orṫa.

¹⁰ Agus duḃairt an t-aingeal leó: Ná bíoḋ eagla oraiḃ, mar féaċ, tugaim sgéala ḋaoiḃ ar lúṫġáir ṁór atá le teaċt ċun na ndaoine go léir;

¹¹ mar go ḃfuil Slánuiġṫeóir beirṫe ḋaoiḃ indiu, ’sé sin Críost an Tiġearna, i gcaṫair Dáiḃid.

¹² Agus seo cóṁarṫa ḋaoiḃ: Ġeoḃaiḋ siḃ an leanḃ fillte i n-éadaiġiḃ ’n-a luiġe i mainséar.

¹³ Agus láiṫreaċ do ḃí i ḃfoċair an aingil mór-ṡluaġ na ḃflaṫas agus iad ag molaḋ Dé, agus deiridís:

¹⁴ Glóire do Ḋia ins na flaṫais go h-árd, agus ar talaṁ síoṫcáin do luċt deaġ-ṁéinne.

¹⁵ Agus do ṫárla, nuair a d’imṫiġ na h-aingil uaṫa suas ins na flaṫais, gur laḃair na h-aoḋairí le n-a ċéile: Téiġmís go Betlehem agus feicimís an briaṫar so do ṫárla ann, agus a ṫaisbeáin Dia ḋúinn.

¹⁶ Agus ṫánadar ar luas, agus do fuaradar Muire agus Ióseṗ, agus an leanḃ ’n-a luiġe sa ṁainséar.

¹⁷ Agus nuair a ċonacadar do ṫuigeadar ’n-a n-aigne i dtaoḃ an ḃréiṫir a laḃraḋ leó ar an leanḃ san.

¹⁸ Agus gaċ ar airiġ iad, ḋeineadar iongna de sna neiṫe a ḋ’innis na h-aoḋairí ḋóiḃ.

¹⁹ Agus do ċoimeád Muire na laḃarṫa san go léir, ġá mbreiṫniú ’n-a croiḋe.

²⁰ Agus d’ḟill na h-aoḋairí agus ṫugadar molaḋ agus glóire do Ḋia mar ġeall ar a ḃfeacadar agus ar ar ċloiseadar, fé mar a duḃraḋ leó.

²¹ Agus nuair a críoċnuiġeaḋ an t-oċt lá agus a deineaḋ an tímpalġearraḋ ar an leanḃ, do tugaḋ mar ainim air ÍOSA, an ainim a ṫug an t-aingeal air sar ar gaḃaḋ é sa broinn.

²² Agus nuair a ḃí laeṫanta a h-íoḋnuiġṫe caiṫte do réir dlíġe Ṁaoise, do rugadar leó an leanḃ go Ierúsalem ċun go gcuirfidís i láṫair an Tiġearna é,

²³ Do réir mar atá sgríoḃṫa i ndlíġ an Tiġearna: Gaċ firean ag osgailt broinne is naoṁṫa ċun an Tiġearna é.

²⁴ Agus ċun go dtaḃarfaidís an ofráil mar a h-órduiġṫear i ndlíġ an Tiġearna, cúpla colúr nó ḋá ġearrcaċ colúir.

²⁵ Agus féaċ, ḃí i n-Ierúsalem duine dár ḃ’ainim Simeón, agus ḃí an duine sin fíoraonta, diaḋa, ag súil le sólás Israéil, agus ḃí an Spioraid Naoṁ ann.

²⁶ Agus do tugaḋ foillsiú ḋó ó’n Spioraid Naoṁ ná feicfeaḋ sé bás ċun go ḃfeicfeaḋ sé Críost an Tiġearna.

²⁷ Agus ṫáinig sé, sa spioraid, isteaċ sa teampul. Agus nuair a ṫug a ṁuintir an leanḃ Íosa isteaċ ann, ag cóṁlíonaḋ nóis na dlíġe ḋó;

²⁸ Do ṫóg seisean ċuige i n’uċt é, agus ṫug sé molaḋ do Ḋia agus duḃairt sé:

²⁹ Anois a leigeann tú ċun siuḃail, a Ṫiġearna, do seirḃíseaċ, do réir t’ḟocail i síoṫċáin,

³⁰ Óir ċonaic mo ṡúile do ṡlánú,

³¹ A ḋ’ollaṁuiġis os cóṁair na bpobal go léir;

³² Solus ċun na ngeinte do ṡoillsiú, agus glóire do d’ṗobul féin Israél.

³³ Agus ḃí Ióseṗ agus an ṁáṫair ag déanaṁ iongna de sna neiṫe a ḃí d’á ráḋ ’n-a ṫaoḃ;

³⁴ Agus do ċuir Simeón a ḃeannaċt orṫa, agus duḃairt sé le Muire a ṁáṫair: Féaċ, tá so ceapaiṫe ċun díṫe agus ċun aiseiriġṫe ḋ’á lán i n-Israél, agus ċun ḃeiṫ ’n-a ċóṁarṫa a ġeoḃaiḋ diúltaḋ;

³⁵ Agus raġaid claiḋeaṁ tré t’anam-sa féin, ionus go noċtfaí smuínte as mórán croiḋṫe.

³⁶ Agus ban-ḟáiḋ dob’ eaḋ Anna inġean Ṗanuéil, de ṫreiḃ Aser, agus ḃí sí tar éis mórán laeṫanta ċur di, agus ḃí sí tar éis seaċt mbliana ó n-a h-óige do ċaiṫeaṁ agá fear.

³⁷ Agus ḃí sí sin ’n-a baintriġ go dtí go raiḃ sí ceiṫre bliana agus ċeiṫre fiċid, agus ní ḟaġaḋ sí an teampal, aċ ag déanaṁ trosgaiḋ agus úrnuiġṫe i n-onóir do Ḋia do ló agus d’oiḋċe.

³⁸ Agus ṫáinig sí sin do láṫair an uair ċéadna, agus d’adṁuiġ sí an Tiġearna agus do laḃair sí ’n-a ṫaoḃ le gaċ duine a ḃí ag súil le fuasgailt Israéil.

³⁹ Agus nuair a ḃí gaċ níḋ cóṁliónta acu do réir dlíġe an Tiġearna, d’ḟilleadár go Gaililí agus go dtí a mbaile féin Nasaret.

⁴⁰ Agus d’fás an mac agus do neartuiġ sé, lán d’eagna, agus ḃí grásta Dé ann.

⁴¹ Agus do ṫéiġeaḋ a ṁuintir go Ierúsalem gaċ bliain uim ḟéile na Cásga.

⁴² Agus nuair a ḃí sé ḋá ḃliain déag do ċuadar suas go Ierúsalem do réir ġnáis na féile,

⁴³ Agus nuair a ḃí na laeṫanta caiṫte agus iad ag filleaḋ d’ḟan an mac, Íosa, i n-Ierúsalem, agus ní raiḃ a ḟios san agá ṁuintir.

⁴⁴ Ċeapadar go raiḃ sé ameasg na ndaoine, agus ṫánadar siuḃal aon lae ar aġaiḋ, agus ḃíodar ’ġá lorg ameasg a ngaolta agus a luċt aiṫne,

⁴⁵ Aċ ní ḃfuaradar é, agus d’ḟilleadar go Ierúsalem, ’ġá lorg.

⁴⁶ Agus do ṫárla, tar éis trí lá go ḃfuaradar é sa teampul ’n-a ṡuiḋe ameasg na n-ollaṁ, ag éisteaċt leó agus ’ġá gceisdiú.

⁴⁷ Agus ḃí iongna ar a raiḃ ag éisteaċt leis, mar ġeall ar a ġuntaċt agus ar na freagraí a ṫugaḋ sé.

⁴⁸ Agus ḃí iongna orṫa-san nuair a ċonacadar é. Agus duḃairt a ṁáṫair leis: A ṁic, cad é seo atá déanta agat orainn? Féaċ, ḃí t’aṫair agus mise go buarṫa ar do lorg.

⁴⁹ Agus duḃairt sé leó: Cad ċuige go raḃaḃair ar mo lorg? Ná raiḃ ’ḟios agaiḃ náċ foláir mé ḃeiṫ ins na neiṫiḃ a ḃaineann le m’Aṫair?

⁵⁰ Agus níor ṫuigeadar-san an focal a laḃair sé leó.

⁵¹ Agus d’ḟill sé anuas leó agus ṫáinig sé go Nasaret, agus ḃí sé úṁal dóiḃ. Agus do ċoimeád a ṁáṫair na focail sin go léir ’n-a croiḋe féin.

⁵² Agus do ċuaiḋ Íosa ar aġaiḋ i n-eagna agus i n-aois, agus i ngrásta i láṫair Dé agus daoine.