Gníoṁarṫa 9 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL IX. Iompáil ṗóil ċun an ċreidiṁ, agus a ḋíoġras. Énéas d’á leiġeas ag Peadar, ⁊ Taibíta dá tógaint aige ón mbás.

¹ Agus ṫáinig Saul, agus é ag síorṡéide ḃagarṫa ḃáis i n-aġaiḋ deisgiobul an Tiġearna, ag triall ar ṗrúnsa na sagart,

² Agus d’iarr sé air leitreaċa ṫaḃairt dó go Damascus, ċun na sinagóg, i dtreó dá ḃfaġaḋ sé aon daoine, fir ’ná mná, de ’n tslíġ sin, go dtaḃarfaḋ sé leis iad gaḃṫa go Ierúsalem.

³ Agus ag cur na slíġe ḋé ḋó do ṫárla go dtáinig sé i gcóṁgar do Ḋamascus, agus go h-obann do las solus ó neaṁ ’n-a ṫímpul.

⁴ Agus ṫuit sé ċun tailiṁ agus d’airiġ sé an guṫ ġá ráḋ leis: A Ṡaul, a Ṡaul, cad ċuige go ḃfuilir am ġéarleanṁaint?

⁵ Agus duḃairt seisean: Cia h-é ṫu, a Ṫiġearna? agus eisean: Mise Íosa ’na ḃfuilirse am ġéarleanṁaint, is cruaiḋ ort ḃeiṫ a’ speaċuíol i n-aġaiḋ an ṗriocaire.

⁶ Agus duḃairt seisean agus é ag criṫ le h-uaṫḃás: A Ṫiġearna, cad is toil leat a ḋéanfainn?

⁷ Agus duḃairt an Tiġearna leis: Eiriġ agus imṫiġ isteaċ sa ċaṫair agus neósfar sa n-áit sin duit cad tá agat le déanaṁ. Agus na fir a ḃí le n-a ċois ḃíodar ’n-a seasaṁ agus uaṫḃás orṫa, agus iad ag éisteaċt leis an nguṫ agus ná feacadar aoinne.

⁸ Agus d’éiriġ Saul de’n talaṁ agus d’osgail sé a ṡúile aċ ní ḟeacaiḋ sé aon níḋ. Agus do rugadar ar láṁ air agus do ṡeoladar isteaċ i nDamascus é.

⁹ Agus ḃí sé ansan trí lá gan radarc, agus níor ċaiṫ sé bia ’ná deoċ.

¹⁰ Agus ḃí i nDamascus duine de ḋeisgiobulaiḃ an Tiġearna agus Ananías ab ainim dó, agus duḃairt an Tiġearna leis, i n-aising: A Ananíais! Agus duḃairt seisean: Táim anso, A Ṫiġearna!

¹¹ Agus duḃairt an Tiġearna leis: Eiriġ agus imṫiġ go dtí an tsráid ar a dtugtar an Díreaċ, agus loirg, i dtiġ Iúdáis, fear ó Ṫarsus gur b’ainim dó Saul; mar, féaċ, tá sé ag guiḋe Dé.

¹² (Agus ċonnaic sé ar fear d’an ḃ’ainim Ananías agus é ag teaċt isteaċ ag triall air agus ag cur a láiṁe air ċun raḋairc a ṫaḃairt dó.)

¹³ Aċ d’ḟreagair Ananías: A Ṫiġearna, d’airiġeas i dtaoḃ an ḟir sin, ó n-a lán, méid na n-olc atá déanta aige do d’naoiṁ i n-Ierúsalem:

¹⁴ Agus tá úġdarás anso aige ó uaċtaránaiḃ na sagart ċun na ndaoine a ġlaoḋann ar t’ainimse do ġaḃáil.

¹⁵ Duḃairt an Ṫiġearna leis: Imṫiġ ort, óir is árṫaċ toġṫa an fear san agamsa ċun m’ainime ḃreiṫ i láṫair geinte agus ríġṫe agus clainne Israéil.

¹⁶ Mar taisbeánfadsa dó cad iad na néiṫe móra atá le fulang aige ar son m’ainime.

¹⁷ Agus d’imṫiġ Ananías agus ċuaiḋ sé isteaċ sa tiġ agus ċuir sé a láṁ air agus duḃairt sé: A Ṡaul, a ḃráṫair, an Tiġearna Íosa a ṫaisbeáin é féin duit ar an slíġ agus tu ag teaċt, do ċuir sé mise ċuġat ionus go ḃfeicfá agus go líonfí de’n Spioraid Naoṁ ṫu.

¹⁸ Agus láiṫreaċ do ṫuit mar ḃeaḋ gáinní d’á ṡúiliḃ agus fuair sé a raḋarc agus d’éiriġ sé agus do baisteaḋ é.

¹⁹ Agus ċaiṫ sé bia agus ṫáinig neart dó. Agus d’ḟan sé raint laeṫanta i ḃfoċair na ndeisgiobul a ḃí i nDamascus.

²⁰ Agus láiṫreaċ, ins na sinagógaiḃ, ḃí sé ag seanmóin i dtaoḃ Íosa, gur b’ é Mac Dé é.

²¹ Agus ḃí uaṫḃás ar a raiḃ ag éisteaċt leis, agus deiridís: Náċ é seo an fear a ḃí ag déanaṁ íde i n-Ierúsalem ar an muinntir a ġlaoḋaḋ ar an ainim sin, agus náċ é gnó a ṫug anso é ná ċun iad do ḃreiṫ leis gaḃṫa ag triall ar uaċtaránaiḃ na sagart?

²² Aċ ḃí Saul ag neartú go mór agus é ag cur na n-Iúdaċ ar mearaíḋe, a raiḃ i nDamascus díoḃ, toisg é ḃeiṫ ġá ḋeiṁniú gur ḃ’ é sin an Críost.

²³ Agus nuair a ḃí a lán laeṫanta caiṫte ḋein na Iúdaíġ a ḃeartú, do ṫoil a ċéile, go marḃóċaidís é.

²⁴ Aċ do fuair Saul eólus ar iad a ḃeiṫ ar a ṫí. Agus ḃí luċt cimeádta acu ar na geataíḃ do ló agus d’oiḋċe, ċun go marḃóċaidís é.

²⁵ Aċ do ṫóg na deisgiobuil é sa n-oiḋċe agus ċuireadar síos de ḋruim an ḟalla é i gciseán.

²⁶ Agus ṫáinig sé go Ierúsalem agus ṁeas sé dul leis na deisgiobuil, aċ ḃí eagla acu go léir roimis agus ní ċreidfidís gur ḋeisgiobul é.

²⁷ Aċ do ṫóg Barnabas é agus do rug sé ag triall ar na h-Aspoil é agus d’inis sé ḋóiḃ conus mar a ċonnaic sé an Tiġearna ar an slíġ agus gur laḃair sé leis, agus conus mar a ḋein sé oḃair ċalma i n-ainim Íosa, i nDamascus.

²⁸ Agus ḃí sé ’n-a ḃfoċair, ag gaḃáil amaċ agus ag gaḃáil isteaċ i n-Ierúsalem agus obair ċalma aige ’á ḋéanaṁ i n-ainim an Tiġearna.

²⁹ Do laḃraḋ sé mar an gcéadna leis na geintiḃ agus ḃíoḋ sé ag díospóireaċt leis na Gréagaiġ; agus ḃíodar san a d’iarraiḋ é ċur ċun báis.

³⁰ Fuair na bráiṫre an níḋ sin amaċ agus do rugadar go Caesaréa é agus ċuireadar as san go Tarsus é.

³¹ Agus ḃí síoṫċáin ag an eaglais ar fuid Iúdaéa go léir agus as fuid Ġalillí agus Ṡamaría, agus ḃí sí ag dul ar aġaid ag gluaiseaċt i n-eagla an Tiġearna, agus í dá líonaḋ le sólás an Spioraid Naoiṁ.

³² Agus do ṫárla, nuair a ḃí Peadar ag taḃairt a ċuard sa tímpal orṫa, go dṫáinig sé ċun na naoṁ a ḃí ’n-a gcoṁnuíġe i Lidda.

³³ Agus fuair sé sa n-áit sin duine d’ár ḃ’ainim Énéas, a ḃí gan lúṫ a ġéag agus a ḃí ar a leaḃaiḋ ar feaḋ oċt mblian.

³⁴ Agus duḃairt Peadar leir: A Énéis, tá an Tiġearna Íosa Críost ag taḃairt sláinte ḋuit. Éiriġ agus córuiġ do leabaiḋ! Agus d’éiriġ sé láiṫreaċ.

³⁵ Agus ċonnaic muinntir Lidda go léir é agus muinntir Ṡaróna, agus d’iompuiġdar ċun an Tiġearna.

³⁶ Agus ḃí i n-Ioppé bandeisgiobul agus Taibíta ab ainim di, nú, ar ṁíniú, Dorcas. Agus ḃí a lán deaġ-ġnióṁarṫa agus a lán déarca aici sin ’á déanaṁ.

³⁷ Agus do ṫárla ins na laeṫiḃ sin gur buaileaḋ breóite í agus go ḃfuair sí bás. Agus do níġdar í agus ċuireadar sa tseómra uaċtaraċ í.

³⁸ Aċ, ó ḃí Lidda cóṁgasaċ do Ioppé agus gur airiġ na deisgiobuil Peadar a ḃeiṫ sa n-áiṫ sin, ċuireadar beirt ḟear ċuige ’ġá ráḋ leis: Ná déin ríġneas gan teaċt ag triall orainn.

³⁹ Agus d’eiriġ Peadar agus ṫáinig sé leó. Agus nuair a ṫáinig sé ann do rugadar suas é go dtí an seómra mór, agus ḃí na baintrneaċa ’n-a seasaṁ ’n-a ṫímpal agus iad ag sile deór agus iad ag taisbeáint na gcótaí agus na mball éadaiġ dó a ḋeineaḋ Dorcas dóiḃ.

⁴⁰ Annsan do ċuir Peadar na daoine go léir amaċ as an seómra agus do leig sé é féin ar a ġlúiniḃ agus ḋein sé úrnuiġṫe, agus d’iompuiġ sé ċun an ċuirp agus duḃairt sé: A Ṫaibíta, éiriġ! Agus d’osgail sisi a súile agus ċonnaic sí Peadar agus d’éiriġ sí aniar.

⁴¹ Agus ṫug sé a láṁ di agus ċuir sé ’n-a seasaṁ í. Asus do ġlaoiḋ sé isteaċ na naoiṁ agus na baintreaċa agus ṫug sé suas dóiḃ í ’n-a beaṫaiḋ.

⁴² Ansan do h-innseaḋ é ar fuaid Ioppé go léir agus do ċreid a lán daoine sa Tiġearna.

⁴³ Agus do ṫuit amaċ gur ḟan sé mórán laeṫanta i n-Ioppé, i dtiġ fir gur ḃ’ ainim dó Símón, fear leaṫair do leasú.