Gníoṁarṫa 25 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL XXV. Caesar ḋá ġairm ag Pól. Is áil le h-Agrippa, an Rí, eirteaċt leis.

¹ Trí lá tar éis teaċt d’ Ḟéstus sa ċeanntar ċuaiḋ sé suas ó Ċaesaréa go Ierúsalem.

² Agus ṫáinig uaċtaráin na sagart agus uaisle na nIúdaċ ag triall air i gcoinniḃ Ṗóil agus ḃíodar a d’iarraiḋ aċainíġe air,

³ A d’iarraiḋ go mbead sé fáḃraṁail dóiḃ ’n-a ċoinniḃ, go n-órdóċaḋ sé é ṫaḃairt go Ierúsalem, agus ḃí ceilg déanta acu ċun go marḃóċaidís é ar an slige.

⁴ Aċ duḃairt Féstus go gciméadfí Pól i gCaesaréa agus go mbeaḋ sé féin ag dul ann go luaṫ.

⁵ Agus, ar seisean, na daoine ar ḃúr measg-sa atá ábalta air, téidís síos i n-aonḟeaċt liom agus má tá coir déanta ag an nduine cuiridís ’n-a leiṫ í.

⁶ Níor ḟan sé ’n-a measg aċ oċt lá nú deiċ lá ’n-a ḋiaiḋ san, agus ċuaiḋ sé síos go Caesaréa agus an lá n-a ḋiaiḋ san do ṡuiḋ sé sa tribúnal agus d’órduiġ sé Pól a ṫaḃairt ’n-a láṫair.

⁷ Do ṫugaḋ, agus do ṡeasaiṁ ’n-a ṫimpal na daoine ṫáinig anuas o Ierúsalem, agus ċuireadar a lán neiṫe troma’n-a leiṫ, aċ níor ḟéadadar iad a ḋeiṁniú,

⁸ Mar ḋein Pól iad do ḟreagairt: Ní’l coir déanta agam i n-aġaid dliġe na nIúdaċ, ná i n-aġaiḋ an teampuill, ná i n-aġaiḋ Ċaesair.

⁹ Ba ṁian le Féstus, áṁ, comaoine ċur ar na Iúdaíġ agus duḃairt sé, ag freagairt Ṗóil: an maiṫ leat dul suas go Ierúsalem agus go dtaḃarfí breiṫ ort ansan am láṫair-se, i dtaoḃ na neiṫ seo? Annsan duḃairt Pól: Táim am ṡeasam ag tribiúnal Ċaesair.

¹⁰ Is ann is ceart breiṫ do ḃreiṫ orm. Ni’l coir déanta i n-aġaiḋ na nIúdaċ agam, mar is eól duit-se go dianṁaiṫ.

¹¹ Má tá coir déanta agam, ná aon níḋ do ṫuillfeaḋ ḃás, ní’l aon ċur i gcoinniḃ an ḃáis agam; aċ mura ḃfuil aon níḋ aṁlaiḋ, de sna neiṫiḃ seo atá acu á ċur am leiṫ. ní’l ar ċumas aon duine me ṫaḃairt suas dóiḃ. Gairmim Caesar.

¹² Ansan do laḃair Féstus leis an gcóṁairle, agus d’ḟreagair sé: Do ġairmis Caesar; go Caesar a raġair.

¹³ Agus nuair a ḃí rainnt laeṫanta curṫa ḋíoḃ acu ċuaiḋ Agrippa, an rí, agus Bernícé, síos go Caesaréa, ag fáiltiú roiṁ Ḟéstus.

¹⁴ Ḋeineadar riġneas ann ar feaḋ mórán laeṫanta agus d’innis Féstus do’n rí i dtaoḃ Ṗóil: Fear, ar seisean, a ḋ’ḟág Féilics anso ’n-a ṗriosúnaċ,

¹⁵ Agus nuair a ḃíos i nIerúsalem ṫáinig uaċtaráin agus seanóirí na nIúdaċ ċúġam ġá iarraiḋ orm é ḋaoraḋ ċun báis.

¹⁶ Duḃart leó náċ é béas na Róṁánaċ aon duine ḋaoraḋ ċun báis gan luċt a ċionntuiġṫe ṫaḃairt os a ċóṁair agus caoi ṫaḃart dó ar é féin do ċosaint agus ar é féin do ġlanaḋ ar na coirṫe.

¹⁷ Aċ do ṫánadar anso láiṫreaċ, agus amáireaċ a ḃí ċúġainn do ṡuídeas sa tribiúnal agus d’órduiġeas an fear a ṫaḃairt am láṫair.

¹⁸ Ansan d’eiriġ na cionntuiġṫeóirí aċ níor ċuireadar aon rud ’n-a leiṫ n-ar ḟéadas aon droċ-níḋ ḋ’feisgint ann.

¹⁹ Aċ ḃí ceisteana éigin acu ’n-a ċoinniḃ a ḃain le pé deismireaċt creidiṁ atá acu féin, agus i dtaoḃ Íosa éigin a fuair bás agus go raiḃ Pól ’ġá ráḋ é ḃeiṫ ḃeó.

²⁰ Níor ṁaiṫ liom féin aon ḃaint a ḃeiṫ agam le níḋ de’n tsórd san agus d’ḟiafraiġeas de ar ṁaiṫ leis dul go Ierúsalem ċun go dtaḃarfí breiṫ air ins na neiṫiḃ sin.

²¹ Aċ do ḋein Pól gairm, go gcimeádfí é ċun go n-aireó-ċaḋ Augustus a ċúis, agus d’orduíġeas é ċimeáḋ go gcuirfead ag triall ar Ċaesar é.

²² Ansan duḃairt Agrippa le Féstus: Ba ṁaiṫ liom féin, leis, an fear san do ċloisint. Cloisfir amáireaċ é, ar seisean.

²³ Amáireaċ a ḃí ċúġainn ṫáinig Agrippa agus Bernicé agus leaṫaḋ mór fuṫa, agus ċuadar isteaċ sa halla éisteaċta, iad féin agus na tribiúin agus maiṫe móra na caṫaraċ, agus d’órduiġ Féstus Pól a ṫaḃairt ’n-a laṫair.

²⁴ Ansan duḃairt Festus: Á rí Agrippa agus a ḟeara uile atá againn anso, ċíonn siḃ an duine sin. Nuair a ḃíos i nIerúsalem ṫainig an pobul Iúdaċ go léir ċúġam ’ġá iarraid orm agus ’ġá ráḋ i nguṫanaiḃ árda nár ċeart é ḃeiṫ beó a ṫuille.

²⁵ Aċ níor ḟéadar féin a d’ḟeisgint go raiḃ aon rud déanta aige do ṫuillfeaḋ bás. Aċ do ġairm sé féin Augustus agus tá socair agam ar é do ċur ċuige.

²⁶ Ní’l aon níd cruinn agam, áṁ, le sgrí ’n-a ṫaoḃ ag triall ar mo ṫiġearna. Uime sin do ṫugas anso ċúġaiḃ-se é, agus ċúgat-sa go mór mór, a rí Agrippa, go gceisteóċaḋ siḃ é agus go mbeaḋ rud agam a sgrífinn.

²⁷ Óir measaim gur obair ṁíréasúnta cime ċur uaim agus gan a ḋ’innsint cad ’tá ’n-a ċoinniḃ.