Gníoṁarṫa 1 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL I. Deasgaḃáil Ċríost. Maitias dá ṫoġaḋ i n-inead Iúdáis.

¹ Do ḋeineas an ċéad ċainnt, a Ṫeoṗiluis, ar na neiṫiḃ go léir a ṫusnuiġ Íosa ar ḋéanaṁ agus ar ṫeaġasg,

² Go dtí an lá nar deasgaḃálaḋ é tar éis a aiṫeanta ṫaḃairt do sna h-Aspolaiḃ a ṫoiġ sé, tríd an Spioraid Naoṁ.

³ Agus tar éis é féin a ṫaisbeáint beó ḋóiḃ i ndiaiḋ a ṗáise, le mórán deasḃuiṫe, i gcaiṫeaṁ daċad lá, ’ġá ṫaḃairt féin le feisgint dóiḃ agus ag laḃairt leó ar ríġeaċt Dé.

⁴ Agus d’iṫ sé bia ’n-a dteannta agus d’órduiġ sé ḋóiḃ gan imṫeaċt a’ Ierúsalem aċ fanṁainṫ le geallṁaint an Aṫar, an ġeallṁaint, (ar seisean) a ċloiseaḃair ó m’ béal-sa:

⁵ Gur ḋein Eóin baiste le h-uisge aċ go ndéanfar siḃse do ḃaiste leis an Spioraid Naoṁ laistiġ de ḃeagán laeṫanta.

⁶ Agus an méid a ḃí i ḃfoċair a ċéile ḋíoḃ do ċuireadar ceist ċuige agus duḃradar: A Ṫiġearna, an sa n-aimsir seo a ṫaḃarfair an ríġeaċt ṫar n-ais d’Israél?

⁷ Aċ duḃairt sé leó: Ní h-agaiḃse atá fios d’ḟáġail ar na h-aimsiriḃ ’ná ar na tráṫanaiḃ a ċimeád an t-Aṫair fé n-a ċóṁaċt féin.

⁸ Aċ glacfaiḋ siḃ neart an Spioraid Naoiṁ ag túirliocan ionaiḃ, agus beiḋ siḃ i nḃúr luċt fiadnaise ḋóṁsa i n-Ierúsalem agus i n-Iudéa go léir agus i Samaría, agus go h-imeall an doṁain ar fad.

⁹ Agus nuair a ḃí an ċainnt sin ráiḋte aige do tógaḋ suas é os cómair a súl agus do ġlac sgamall as a raḋarc é.

¹⁰ Agus an ḟaid a ḃíodar ag féaċaint air agus é ag imṫeaċt suas an neaṁ, féaċ, ḃí beirt ḟear ’n-a seasaṁ ’n-a n-aice agus éadaċ geal orṫa, Agur duḃradar:

¹¹ A ḟeara Ġaililiaċa, cad ad áil liḃ i nḃúr seasaṁ ag féaċaint suas ċun neiṁe? Íosa so atá tógta suas ar neaṁ uaiḃ, tiocfaiḋ sé ar an gcuma gcéadna, fé mar a ċonacaḃair ag dul suas ar neaṁ é.

¹² Ansan do ṫánadar ṫar n-ais go Ierúsalem ó’n gcnuc ar a dtugtar Oliḃet, cnoc atá i ngiorraċt siuḃal lae sabbóide do Ierúsalem.

¹³ Agus nuair a ṫánadar isteaċ ċuadar suas go dtí an seómra uaċtáraċ mar a raiḃ Peadar agus Eóin ag fanṁaint, agus Séamus agus Aindrias, Pilib agus Tomás, Bartolomaeus agus Maitiú, Séamus Alṗéis agus Símón Sélotés agus Iúdás mac Séamuis.

¹⁴ Ḃíodar san go léir ag leanṁaint do ṫoil a ċéile i n-úrnuiġṫe mar aon leir na mnáiḃ agus le Muire Máṫair Íosa agus le n-a ḃráiṫriḃ.

¹⁵ Ins na laeṫiḃ sin d’éiriġ Peadar ameasg na mbráiṫre agus duḃairt sé (agus ḃí tímpall le céad agus fiċe duine cruinniġṫe ann):

¹⁶ A ḟeara, a ḃráiṫre, ní foláir cóṁlíonaḋ an Scriptiúra do ṫargair an Spioraid Naoṁ tré ḃéal Dáiḃid i dtaoḃ Iúdáis, an fear a ṫreóruiġ an ṁuinntir a ġaiḃ Íosa,

¹⁷ an fear a h áiriṁeaḋ orainne agus go raiḃ páirt aige sa t-seirḃís seo.

¹⁸ Do fuair an fear san talaṁ le tuarasdal a ḋroċ-ġníṁ, agus do croċaḋ é agus do sgoilt air ’n-a lár agus do ṫuit na h-inní go léir amaċ as.

¹⁹ Agus ṫáinig fios an níḋ sin d’á ḃfuil de ḋaoine i n-Ierúsalem, i dtreó gur tugaḋ ar an bpáirc sin, ’n-a dteangain sin, “Haceldama,” ’sé sin; páirc na fola.

²⁰ Agus tá sgríoḃṫa i leaḃar na Salm: “Deintear fásaċ d’á n-áit cóṁnuiġṫe, agus ná bíoḋ duine a ḋéanfaiḋ cómnuiġe ann,” agus, “Tugtar a ċaṫaoír easboig do ḋuine eile.”

²¹ Ní foláir d’á ḃríġ sin, as na fearaiḃ seo atá i gcóṁluadar linne i gcaiteaṁ na h-aimsire go léir ’na raiḃ an Tiġearna Íosa isteaċ agus amaċ i n-ár measg,

²² Ag tusnú ó’n mbaiste a ḋein Eóin go dtí an lá do tógaḋ suas uainn é, duine acu san do ḃeiṫ i n’fínné ar a aiseiriġe i n-aonḟeaċt linne.

²³ Ansan do ṡocaruiġdar ar ḃeirt, ar Ióseṗ ar a dtugtí Barsabas agus go mba ṡloinne ḋó Iústus. agus ar Ṁaitias.

²⁴ Agus ḋeineadar úrnuiġṫe agus duḃriadar: Déinse, a Ṫiġearna, ó’s agat atá fios croiḋe gaċ duine, a ṫaisbeáint cia’cu de’n ḃeirt seo is roga leat,

²⁵ Ċun go nglacfaḋ sé an t-inead seirḃíse agus aspolaċta so do ċaill Iúdás, ionus go raġaḋ sé i n’ áit féin.

²⁶ Ansan do ċuireadar ar ċrannaiḃ dóiḃ é, agus do ṫuit an crann ar Ṁaitias agus do h-áiriṁeaḋ é i dteannta an aoinnedéag Aspol.