Eoin 9 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL IX. Raḋarc ag Críost ’á ṫaḃairt do’n duine do rugaḋ ’n-a ḋall.

¹ Agus ag gaḃáil na slíġe ḋó do ċonaic Íosa duine a ḃí ’n-a ḋall, agus gur dall a rugaḋ é.

² Agus d’ḟiafraiġ a ḋeisgiobuil de: a Rabbí, cé’cu a ḋein peaca, é seo nó a aṫair ’s a ṁáṫair, treás gur rugaḋ ’n-a ḋall é?

³ D’ḟreagair Íosa: Níor ṗeacaiġ sé seo ná a aṫair ná a ṁáṫair; aċ ċun go dtaisbeánfaí oibreaċa Dé ann.

⁴ Tá orm-sa oibreaċa an t-é a ċuir uaiḋ mé do ḋéanaṁ an ḟaid atá an lá ann; tá an oiḋċe ag teaċt nuair náċ féidir d’aoinne obair a ḋéanaṁ.

⁵ An ḟaid atáim ar an saoġal is mé solus an tsaoġail.

⁶ Nuair aduḃairt sé an ċaint sin do ċuir sé seile ar an dtalaṁ, agus ḋéin sé laṫaċ leis an seile, agus ċimil sé an laṫaċ de ṡúiliḃ an daill,

⁷ Agus duḃairt sé leis: Imṫiġ agus niġ i loċán Silóé, (a míníġṫear: Teaċtaire). D’imṫiġ sé agus do niġ, agus ṫáinig sé ṫar n-ais agus raḋarc aige.

⁸ Ansan duḃairt a ċóṁarsain agus na daoine a ċonaic roimis sin é agus é a d’iarraiḋ déarca: Náċ é seo an fear a ḃíoḋ ’n-a ṡuiḋe ag lorg déarca? Agus duḃairt daoine: Isé é.

⁹ Duḃairt daoine eile, áṁṫaċ: Ní h-é é, aċ is cosṁail leis é. Aċ duḃairt an duine féin: Is mé é.

¹⁰ Agus duḃradar leis: Conus a h-osglaḋ do súile ḋuit?

¹¹ D’ḟreagair sé: An fear san an a dtugtar Íosa, ḋein sé laṫaċ agus ċimil sé de m’ ṡúiliḃ é, agus duḃairt sé liom, Imṫiġ go loċán Silóé agus niġ.

¹² Agus d’imṫiġeas, agus do níġeas, agus ċím. Agus duḃradar leis: Cá ḃfuil an fear san? Duḃairt seisean: Ní ḟeadar.

¹³ Ṫugadar ċun na ḃFairisíneaċ an fear a ḃí roiṁe sin ’n-a ḋall.

¹⁴ Agus sa tsabbóid ab eaḋ é nuair a ḋein Íosa an laṫaċ agus d’osgail sé súile an duine.

¹⁵ Agus airís d’ḟiafraiġ na Fairisíniġ dé conus a fuair sé a raḋarc. Agus duḃairt seisean leó: Ċuir sé laṫaċ ar mo ṡúiliḃ, agus do níġeas iad, agus ċím.

¹⁶ Agus duḃairt cuid de sna Fairisíniġ; Ní h-ó Ḋia an fear so ná coimeádann an tsabbóid. Agus duḃairt tuille acu: Conus is féidir do ḋuine ṗeacaṁail na mírḃúiltí seo déanaṁ? Agus ḃí siosma eatarṫa.

¹⁷ Agus duḃradar airís leis an ndall: Cad deirir-se leis an t-é sin a ḋ’osgail do ṡúile? Duḃairt seisean: Fáiḋ iseaḋ é.

¹⁸ Agus níor ċreid na Iúdaiġ go raiḃ sé ’n-a ḋall agus go ḃfuair sé a raḋarc, go dtí gur ġlaoḋadar ar aṫair agus ar ṁáṫair an t-é sin go raiḃ a raḋarc fáġalta aige.

¹⁹ Agus ċeistiġeadar iad, agus duḃradar: An é seo ḃúr mac adeir siḃ a rugaḋ ’n-a ḋall? Conus a ṫárla go ḃfuil raḋarc anois aige?

²⁰ D’ḟreagair aṫair agus máṫair an ḟir iad, agus duḃradar: Tá ḟios againn gur mac dúinn é seo, agus gur dall a rugaḋ é;

²¹ Aċ ċonus do ṫárla raḋarc a ḃeiṫ anois aige ní h-eól dúinn, ná ní h-eól dúinn cé ḋ’osgail a ṡúile; fiafraiġiḋ de féin é; tá aos aige; laḃraḋ sé féin air féin.

²² Duḃairt an t-aṫair agus an ṁáṫair na neiṫe sin mar ḃí eagla na n-Iúdaċ orṫa, óir ḃí socair ag na Iúdaiġ an uair sin, aoinne a déarfaḋ gur ḃ’ é Críost é, é ċur amaċ as an sinagóig.

²³ Mar ġeall air sin iseaḋ aduḃairt an t-aṫair agus an máṫair, Tá aos aige, deiniḋ é féin do ċeistiú.

²⁴ Ansan do ġlaoḋadar airís ar an nduine a ḃí ’n-a ḋall, agus duḃradar leis: Taḃair glóire do Ḋia. Is eól dúinne gur peacaċ an duine sin.

²⁵ Duḃairt seisean leó: Má’s peacaċ é ní ḟeadar-sa san. Tá ḟios agam aon níḋ aṁáin, go raḃas am’ ḋall agus go ḃfuil raḋarc anois agam.

²⁶ Agus duḃradar-san leis: Cad a ḋein sé leat? Conus a ḋ’osgail sé do ṡuíle ḋuit?

²⁷ D’ḟreagair sé iad: D’innseas ċeana ḋaoiḃ é agus d’aireaḃair mé. Cad ab áil liḃ ’ġá aireaċtaint airís? An aṁlaiḋ ba ṁaiṫ liḃ-se, leis, ḃeiṫ i nḃúr ndeisgiobuil aige?

²⁸ Ansan do ṫugadar droċ-ċaint dó agus duḃradar: Bí-se ad’ deisgiobul aige; is do Ṁaois is deisgiobuil sinne.

²⁹ Is eól dúinne gur laḃair Dia le Maois, aċ an fear so, ní h-eól dúinn cá dtáinig sé.

³⁰ D’ḟreagair an fear agus duḃairt sé leó: Go deiṁin is iongantaċ an sgéal é sin, gan a ḟios a ḃeiṫ agaiḃ-se cá dtáinig sé, agus d’osgail sé mo ṡúile ḋóṁ-sa:

³¹ Tá ḟios againn, áṁṫac, ná h-éisteann Dia le luċt peacaí ḋéanaṁ; aċ má ṫugann duine onóir do Ḋia agus má ḋeineann sé toil Dé, éisteann Dia leis an nduine sin.

³² Níor h-airiġeaḋ riaṁ ó ṫusaċ an doṁain gur osgail aoinne a ṡúile do ḋuine a rugaḋ ’n-a ḋall.

³³ Mura mbeaḋ gur ó Ḋia an duine seo ní ḟéadfaḋ sé aon níḋ a ḋéanaṁ.

³⁴ D’ḟreagradar agus duḃradar leis: I bpeacaíḃ a geineaḋ tu ar fad, agus an ndeineann tú sinne do ṫeagasg? Agus do ċomáineadar amaċ é.

³⁵ D’airiġ Íosa gur ċaiṫeadar amaċ é; agus nuair a fuair sé é duḃairt sé leis: An gcreideann tusa i Mac Dé?

³⁶ D’ḟreagair seisean agus duḃairt: Cé h-é sin, a Ṫiġearna, go gcreidead ann?

³⁷ Agus duḃairt Íosa leis: Ċonaicís é, agus an t-é atá ag caint leat isé é.

³⁸ Ansan duḃairt seisean: Creidim, a Ṫiġearna. Agus do ṡléaċt sé ḋó, ’ġá aḋraḋ.

³⁹ Agus duḃairt Íosa: Ag taḃairt breiṫeaṁantais a ṫánag-sa ar an saoġal so; i dtreó go ḃfeicfeaḋ an ṁuintir ná feiceann, agus go ndallfaí an ṁuintir a ċíonn.

⁴⁰ Agus d’airiġ cuid de sna Fairisíniġ a ḃí i n’ḟoċair é, agus duḃradar leis: An aṁlaiḋ atáimíd-ne dall, leis?

⁴¹ Duḃairt Íosa leó: Dá mbeaḋ siḃ dall ní ḃeaḋ peaca oraiḃ. Aċ anois abrann siḃ, Tá raḋarc againn: Leanann ḃúr bpeaca oraiḃ.