Eoin 6 - Na Ċeiṫre Soisgéil agus Gníoṁarṫa na n-Aspol 1915 1921 (Peadar Ua Laoghaire)

CAIBIDIOL VI. Bia á ṫaḃairt ag Críost do ċúig ṁíle duine a’ ċúig bulógaiḃ. É ag siúḃal ar an ḃfaraige. É ag laḃairt ar arán na beaṫa.

¹ Tar éis na neiṫe sin d’imṫiġ Íosa treasna mara Ġaililí, ’sé sin Tiberias,

² Agus do lean sluaġ ṁór daoine é, mar do ċonacadar na mírḃúiltí a ḃí aige ’á ḋéanaṁ ar easlánaiḃ.

³ Agus d’imṫiġ Íosa an cnoc suas agus do ṡuiḋ sé i ḃfoċair a ḋeisgiobul.

⁴ Agus ḃí an Ċáisg, lá féile na n-Iúdaċ, ana-aċmair.

⁵ Nuair a ḋ’árduiġ Íosa a ṡúile, agus nuair a ċonaic sé go raiḃ camṫa mór daoine tagaiṫe ċuige, duḃairt sé le Pilib: Cá gceannóċaimíd arán i dtreó go n-íosfid siad so rud?

⁶ ’Ġa ḃraṫ, áṁṫaċ, iseaḋ aduḃairt sé an ċaint sin, óir ḃí ḟios aige féin cad a ḃí beartuiġṫe aige a ḋéanaṁ.

⁷ D’ḟreagair Pilib é: Ní ḃeaḋ i luaċ ḋá ċéad pingin de ḃulógaiḃ oiread agus ṫaḃarfaḋ blúire beag do’n duine acu.

⁸ Duḃairt duine ḋá ḋeisgiobuil leis, Aindrias, drioṫáir Ṡímóin Peadar:

⁹ Tá buaċaill anso agus tá ċúig bulóga eórnan aige agus ḋá iasg; aċ cad é an ḟaid le dul an méid sin ar oiread daoine?

¹⁰ Ansan duḃairt Íosa: Cuiriḋ na daoine ’n-a suiḋe. Ḃí mórán féir sa n-áit. Ṡuiḋ na daoine síos, tímpal ċúig ṁíle duine.

¹¹ Ansan do ṫóg Íosa an t-arán agus ġaiḃ sé buiḋeaċas agus do rainn sé é ar na daoine agus iad ’n-a suiḋe, agus na h-éisg ar an gcuma gcéadna, go raḃadar go léir sásta.

¹² Nuair a ḃíodar lán-tsásta duḃairt sé le n-a ḋeisgiobuil: Bailíġiḋ an mion-arán atá fágṫa, sar a raġaḋ sé amú.

¹³ Do ḃailíġeadar, agus do líonadar ḋá ċiseán déag de’n ṁion-arán a ḃí as na ċúig bulógaiḃ eórnan i ndiaiḋ na ndaoine do ċaiṫ an bia.

¹⁴ Ansan, nuair a ċonaic na daoine sin gur ḋein Íosa an ṁírḃúilt, duḃradar: Gan aṁras isé an fear so an fáiḋ atá le teaċt sa doṁan.

¹⁵ Nuair a ḃí ḟios ag Íosa, áṁṫaċ, go raḃadar ċun teaċt agus breiṫ air agus rí a ḋéanaṁ de, d’imṫiġ sé uaṫa airís fé’n gcnoc i n’ aonar.

¹⁶ Agus nuair a ḃí sé ’n-a ṫráṫnóna do ċuaiḋ a ḋeisgiobuil síos ċun na faraige.

¹⁷ Agus ċuadar ar bórd na luinge, agus ċuadar treasna na faraige go Caṗarnaum; agus ḃí an doirċeaċt ann feasda, agus ní raiḃ Íosa tagaiṫe ċúċa.

¹⁸ Agus d’eiriġ gaoṫ ṁór, agus ḃí an ḟaraige ag eiriġe árd.

¹⁹ Agus nuair a ḃí ċúig stada fiċid nó deiċ stada fiċid d’iomraṁ déanta acu do ċonacadar Íosa agus é ag siuḃal ar an ḃfaraige, i n-aice na luinge, agus ṫáinig sgannraḋ orṫa.

²⁰ Agus duḃairt sé leó: Mise atá ann; ná bíoḋ eagal oraiḃ.

²¹ Ansan dob’ áil leó é ṫeaċt ċúċa isteaċ sa luing, agus láiṫreaċ, ḃí an long ag an dtír go raḃadar ag dul ann.

²² Amáireaċ a ḃí ċúgainn do ċonaic an tsluaġ daoine a ḃí ’n-a seasaṁ ar an dtaoḃ eile de’n ḟaraige ná raiḃ aon long eile ann aċ an t-aon long aṁáin agus ná deaġaiḋ Íosa i n aonḟeaċt le n-a ḋeisgiobuil sa luing sin, agus nár imṫiġ inti aċ a ḋeisgiobuil aṁáin;

²³ Ṫáinig, áṁṫaċ, loingeas eile ó Ṫiberias i n-aice na h-áite ’n-ar h-iṫeaḋ an t-arán, nuair a ġaiḃ an Tiġearna buiḋeaċas;

²⁴ Agus nuair a ċonaic an tsluaġ ná raiḃ Íosa ná a ḋeisgiobuil sa n-áit, ċuadar ar bórd na long agus ṫánadar go Caṗarnaum ag lorg Íosa.

²⁵ Agus nuair a fuaradar é lastall de’n ḟaraige duḃradar leis: A Ṁáiġistir, conus a ṫáinís ċun na h-áite seo?

²⁶ D’ḟreagair Íosa iad agus duḃairt sé: Go deiṁin deiṁin adeirim liḃ, táṫaoí a’m lorg-sa, agus ní mar ġeall ar na mírḃúiltíḃ a ċonacaḃair é, aċ mar ġeall ar na bulógaiḃ a ḋ’iṫeaḃair agus do ṡásaiṁ siḃ.

²⁷ Ná saoṫruiġiḋ an bia a ṫéiġeann ar neaṁníḋ, aċ saoṫruiġiḋ an bia marṫanaċ a ṫugann beaṫa ṡíoruiḋe, an bia a ṫaḃarfaiḋ Mac an Duine ḋaoiḃ. Óir is air sin a ċuir Dia, an t-Aṫair, séala.

²⁸ Ansan duḃradar leis: Cad tá le déanaṁ againn ionus go ndéanfaimís obair Dé?

²⁹ D’ḟreagair Íosa agus duḃairt sé leó: Sidí obair Dé, go gcreidfeaḋ siḃ san t-é a ċuir Dia uaiḋ.

³⁰ Agus duḃradar leis: Má ’seaḋ cad é an cóṁarṫa atá agat-sa ḋ’á ḋéanaṁ, ionus go ḃfeicfimís é agus go gcreidfimís ionat? Cad ’tá agat ḋ’á oibriú?

³¹ D’iṫ ár n-aiṫreaċa manna sa ḃfásaċ, mar atá sgríoḃṫa: Ṫug sé arán ó neaṁ dóiḃ le n-iṫe.

³² Ansan duḃairt Íosa leó: Go deiṁin deiṁin adeirim liḃ, ní h-é Maois a ṫug arán ó neaṁ daoiḃ, aċ isé m’ Aṫair-se a ṫugann ḋaoiḃ an t-arán fírinneaċ ó neaṁ.

³³ Óir isé arán Dé an t-arán a ṫagann anuas ó neaṁ agus a ṫugann beaṫa do’n doṁan.

³⁴ Agus duḃradar leis: A Ṫiġearna, taḃair dúinn an t-arán san i gcóṁnuiġe.

³⁵ Ansan duḃairt Íosa leó: Mise arán na beaṫa; an t-é a ṫiocfaiḋ ċúġam-sa ní ḃeiḋ ocras air; agus an t-é a ċreidfiḋ ionam-sa ní ḃeiḋ tart air ċoiḋċe.

³⁶ Aċ duḃart liḃ go ḃfeac-aḃair mé agus ná creideann siḃ.

³⁷ Gaċ níḋ d’á ḃfuil taḃarṫa ḋóṁ-sa ag m’ Aṫair tiocfaiḋ sé ċúġam, agus an t-é a ṫiocfaiḋ ċúġam ní ċaiṫfead amaċ é.

³⁸ Óir ní ċun mo ṫoile féin a ḋéanaṁ a ṫánag anuas ó neaṁ, aċ ċun go ndéanfainn toil an t-é a ċuir uaiḋ mé.

³⁹ Agus sidé toil an Aṫar a ċuir uaiḋ mise, ná leigfinn aon níḋ ḋ’ár ṫug sé ḋom a ċailleaṁaint, aċ go ndéanfainn é ṫógáil suas an lá déanaċ.

⁴⁰ Agus sidé toil m’ Aṫar, a ċuir uaiḋ me, gaċ duine a ċionn an Mac agus a ċreideann ann, an ḃeaṫa ṡíoruiḋe ḃeiṫ aige agus déanfad-sa é ṫógáil suas an lá déanaċ.

⁴¹ Agus ḃí na Iúdaiġ ag gluaireán ’n-a ċoinniḃ toisg go nduḃairt sé: Is mise an t-arán beó a ṫáinig anuas ó neaṁ,

⁴² Agus duḃradar: Náċ é seo Íosa mac Ióseṗ go ḃfuil aiṫne againn ar a aṫair agus ar a ṁáṫair? Conus, d’á ḃríġ sin, is féidir dó so a ráḋ, Do ṫánag anuas ó neaṁ?

⁴³ Ansan d’ḟreagair Íosa iad agus duḃairt sé leó: Ná bíḋiḋ ag gluaireán eadraiḃ féin:

⁴⁴ Ní ḟéadfaiḋ aoinne teaċt ċúġam-sa gan an t-Aṫair a ċuir uaiḋ mé ’ġá ṫarang ċúġam, agus déanfad-sa é ṫógáil suas an lá déanaċ.

⁴⁵ Tá sgríoḃṫa ins na fáiḋiḃ: Agus beid siad go léir d’á dteagasg ag Dia. Gaċ duine a ċlois ó’n Aṫair agus d’ ḟoġluim, tagann sé ċúġam-sa.

⁴⁶ Ní h-é go ḃfeacaiḋ aoinne an t-Aṫair aċ an t-é atá ó Ḋia, do ċonaic sé sin an t-Aṫair.

⁴⁷ Go deiṁin deiṁin adeirim liḃ, An t-é a creideann ionam-sa tá an ḃeaṫa ṡíoruiḋe aige.

⁴⁸ Is mise arán na beaṫa.

⁴⁹ D’iṫ ḃúr n-aiṫreaċa an manna sa ḃfásaċ, agus fuaradar bás.

⁵⁰ Sidé an t-arán a táinig anuas ó neaṁ, i dtreó má iṫeann aoinne é ná faġaiḋ sé bás.

⁵¹ Is mise an t-arán beó a ṫáinig anuas ó neaṁ.

⁵² Má iṫeann aon duine an t-arán so, mairfiḋ sé ar feaḋ na síoruiḋeaċta; agus an t-arán a ṫaḃarfad-sa uaim isé mo ċuid feóla féin é ċun beaṫa an doṁain.

⁵³ Ansan ḃí na Iúdaiġ ag aiġneas eatarṫa féin, agus deiridís: Conus is féidir dó so a ċuid feóla féin a ṫaḃairt le n-iṫe ḋúinn?

⁵⁴ Agus duḃairt Íosa leó: Go deiṁin deiṁin adeirim liḃ, mura n-iṫiḋ siḃ feóil Ṁic an Duine agus mura n-ólaiḋ siḃ a ċuid fola ní ḃeiḋ beaṫa agaiḃ ionaiḃ.

⁵⁵ An t-é a d’iṫeann mo ċuid feóla-sa agus a ḋ’ólann mo ċuid fola, tá beaṫa ṡíoruiḋe aige, agus déanfad-sa é ṫógáil suas an lá déanaċ.

⁵⁶ Óir is bia go fíor mo ċuid feóla, agus is deoċ go fíor mo ċuid fola.

⁵⁷ An t-é a ḋ’iṫeann mo ċuid feóla agus a ḋ’ólann mo ċuid fola, cóṁnuiġeann sé ionam-sa agus cóṁnuiġim-se ann.

⁵⁸ Fé mar a ċuir an t-Aṫair atá beó mise uaiḋ agus go ḃfuilim-se beó ó’n Aṫair, mar an gcéadna an t-é a ḋ’iṫeann mise, beiḋ sé beó de m’bárr-sa.

⁵⁹ Sidé an t-arán a ṫáinig anuas ó neaṁ. Ní h-ionan agus mar a ḋ’iṫ ḃur n-aiṫreaċa manna, agus go ḃfuilid siad marḃ. An t-é a ḋ’iṫeann an t-arán so mairfiḋ sé ar feaḋ na síoruiḋeaċta.

⁶⁰ Duḃairt sé an ċaint sin i gCaṗarnaum agus é ag teagasg sa tsinagóig.

⁶¹ Agus a lán d’á ḋeisgiobuil, nuair airiġeadar an ċaint, duḃradar: Is cruaiḋ an ċaint í sin, agus cé ḟéadfaḋ éisteaċt léi?

⁶² Agus do ṫuig Íosa ann féin go raiḃ a ḋeisgiobuil ag gluaireán mar ġeall ar an níḋ sin, agus duḃairt sé leó: An dtugann an méid sin sgannal daoiḃ?

⁶³ Aċ má ḟeiceann siḃ Mac an Duine ag dul suas mar a raiḃ sé an dtúis?

⁶⁴ Isé an spioraid a ḋeineann beóḋaḋ. Ní ḋeineann an ḟeóil tairḃṫe ar biṫ. Na focail atá ráiḋte agam liḃ, spioraid agus beaṫa iseaḋ iad.

⁶⁵ Aċ tá cuid agaiḃ-se ná creideann. Óir ḃí ḟios ag Íosa ó ṫusaċ cé’r ḃ’iad nár ċreid, agus cé ḋéanfaḋ é ḋíol.

⁶⁶ Agus duḃairt sé: Uime sin iseaḋ aduḃart liḃ na féadfaḋ aoinne teaċt ċúġam mura mbeaḋ taḃarṫa ag m’Aṫair dó teaċt.

⁶⁷ Ansan do ṫarraing a lán d’á ḋeisgiobuil siar, agus níor ṡiuḃladar leis a ṫuille.

⁶⁸ Duḃairt Íosa d’á ḃríġ sin leis an dáréag: An maiṫ liḃ-se, leis, imṫeaċt?

⁶⁹ Agus d’ḟreagair Símón Peadar é: A Ṫiġearna, cé ċuige go raġaimíd? Is agat-sa atáid bréiṫre na beaṫa síoruiḋe.

⁷⁰ Agus creidimíd-ne agus tá ḟios againn gur tu Críost Mac Dé.

⁷¹ D’ḟreagair Íosa iad: Nár ḋeinear-sa an dáréag agaiḃ do ṫoġaḋ?

⁷² Agus tá duine agaiḃ ’n-a ḋiaḃal. Agus is ar Iúdás, mac Ṡímóin, Iscariót, a ḃí sé ag caint. Óir isé sin a ḃí ċun é ḋíol, agus gur ḋuine de’n dáréag é.