Nwɛr a Luk 1 - Abanyom LP New Testament Portions

Ɛkuma nub

¹ Tiyɔfilɔs agbem anɛ agba nɔg ayɛlɛ nsɔl yi ɛlɔ lem na agira.

² Ɛyog nsɔl yifa na anyɔ anɛ ba akɔlɔ amir abɔ ayɛn nsɔl yi ɛlemɔ na ɛkuma nub na anɛ ba abongɔ alom Ɔsɔwɔ.

³ Mɛ ngba nar biji nkpele nsɔl fɛb na ɛkuma nub ntamɛ ntu ɛlama ndɛ mɛ nyɛlɛ nsɔl yifɔ jangjang mɔng ɛjɔlɔ Tiyɔfilɔs.

⁴ Mɛ nem jifa na ji wɔ ɔla kun ɛtete ɔbangɛ kpakpa nsɔl yi alɔ wa teb.

Nteb ɔteb atebe ɔgbɛl bi Jɔn nwura anɛ alib

⁵ Ngara yi Hɛrɔd ajɔlɔ ntol na Judiya ɛbɛl nemanjɔm Ɔsɔwɔ yɔ ajɔl wɛ kog arɛ Sakariya yɔ ajogɔ na ɔgu bi balemanjɔm Ɔsɔwɔ bi Abija. Nkal ɔwɛ Ɛlisabɛt ajog ɔgu bi Ɛrɔng.

⁶ Abɔ anɛ abalabal ajɔl ateng anɛ na libri Ɔsɔwɔ afɛng ajɔ bom ajing ya Tata na ajigi ayɛ.

⁷ Abɔ abɔn agbɛlam, ateb arɛ Ɛlisabɛt amalam ayibi ɔla. Abɔ anɛ abal abal agba kol.

⁸ Ɔfo brang ɛbɔngɛ balemanjɔm Ɔsɔwɔ ji Sakariya ajɔl na litom, ajɔl jege Ɔsɔwɔ mɔng nemanjɔm.

⁹ Mɔng ligbɛna li balemanjɔm Ɔsɔwɔ, atob lifanga ayege Sakariya arɛ asɔng na njo Ɔsɔwɔ ɔfo bifɔ aji sɔ nsɔl yi ɛkpenɔ ɛteng ɛlu akarɛ Ɔsɔwɔ.

¹⁰ Anɛ ajɔl kag ɔrɔ na ɛtegla na ji ajɔl sɔ nsɔl yi ɛkpenɔ ɛteng ɛlu.

¹¹ Na ngara yi fɔ nteb ɔteb a Tata alima aba naji Sakariya ayema na ɔbɔ bilom bi ɛkun Ɔsɔwɔ ji asɔga ateng a nsɔl ya akpenɔ ɛteng ɛlu.

¹² Sakariya agbɔ ɔjɔb ɛkokob ɛbɔbɛ na ji ayɛnɔ nteb ɔteb Ɔsɔwɔ.

¹³ Nteb ɔteb Ɔsɔwɔ abong atɔgɛ arɛ, “Sakariya! Ɔtɔb kpɛ bɛ, Ɔsɔwɔ agba yog ɔrɔ ɛba. Nkal ɔwa Ɛlisabɛt ala gbɛl mɔn yɔ ɔlom ɔlɛ gore mbeng a Jɔn.

¹⁴ Mɔn ɔfa ala jɔl ɛyɛbalitem na liranga akarɛ ɛgbem anɛ ala rang na ɔgbɛl ɛbɛ.

¹⁵ Ala jɔl ntakpa nɛ na libri Tata. Anim teg awɔ amum ayiayi ɛjɔl akora amum ɛkɔ ji mbara ɛtugi ɛla jɔl na nɛ na ngara yi alɛ gbɛl.

¹⁶ Jɔn alatu agbem anɛ ba Isrɛl afɛngɛ na ji Tata Ɔsɔwɔ abɔ.

¹⁷ Ala gbɔ Tata mba, na ɛkɔ na ɛtugi mɔng Ɛlayija, ateb ɛsi ɛjɛ, ala sibe ntem ba ndɛ atu abɔn. Anɛ ba akoresi ala lem abɔ atamɛ na anɛ ba akpenɔ ɛkukuna ji anɛ ba alema nɔba, ala tore anɛ abom Tata.”

¹⁸ Sakariya abong atɔg nteb ɔteb Ɔsɔwɔ, “Mɛ nalem nan nkun? Ateb mɛ na nkalɔma ɛgba kol.”

¹⁹ Nteb ɔteb Ɔsɔwɔ afanga wɛ, “Mɛ Gɛbrɛl, mɛ nyim na libri Ɔsɔwɔ.Wɛ atom mam arɛ ntebe wa ɛteng ɔteb.

²⁰ Na ji ɔdɛnɔ tamɛ ɔteb ɛbama ɔgbɔ ɛmum ɔnim kpɛ mal ɔbong ntɔga tɛtɛ ji ntɔgɔ wa ɛlem.”

²¹ Ɛbɔngɛ anɛ ba ajɔl seg Sakariya ɛkpɔ abɔ ɛsi na ji alɔ lɛna na Njo Ɔsɔwɔ.

²² Naji ajogɔ amalam abong ntɔga abɔ akukun arɛ agba yɛn amir na Njo Ɔsɔwɔ, wɛ ajɔl fuk abɔ amalam abong ntɔga.

²³ Naji litom Sakariya ɛlɔ mal na Njo Ɔsɔwɔ afɛngɛ njim na ɛtɛk.

²⁴ Naji jifɔ ɛlɔ seng Ɛlisabɛt ajɔl na ɔla, ategam ajog na ɛtekla na anwɛ arɔn, wɛ abong,

²⁵ “Tata agba lem jifa akam, agba mam teb ndɔn ɛyɛ agba mam yege ɛsɔnɛ na amir anɛ.”

Nteb ɔteb, atebe ɔgbɛl bi Jisɔs

²⁶ Naji ɔla Ɛlisabɛt ɛlɔ rir anwɛ aragra Ɔsɔwɔ atom nteb ɔteb a Gɛbrɛl na ɛkpa ɛgbɛ Nasarɛt na Ɛjiba Galili,

²⁷ naji nɛ yɔ adɛdɛ sib nɛnom, yɔ alagɔ nɔ bal Josɛf yɔ ajogɔ ɔgu bi Defid. Nɛ yɔ adɛdɛ sib nɛ akoga wɛ arɛ Meri.

²⁸ Nteb ɔteb akak Meri nyɔ abong, lifola Tata ɛre na na.

²⁹ Meri abɛl ɛkokob abangɛ alom ya nteb ɔteb abongɔ ɛfɛngɛ ɛkpɔ wɛ ɛsi bi nyɔ kag kag bifa ɛjogɔ.

³⁰ Fɔyɔ nteb ɔteb Ɔsɔwɔ atɔgɔ Meri arɛ, “Ɔtɔb kpɛ bɛ; Ɔsɔwɔ akpe ɛyɛbalitem na na.

³¹ Wɔ ɔla yibi ɔla ɔgbɛl mɔn yɔ ɔlom, ɔlɛ gore mbeng a Jisɔs.

³² Ala jɔl ntakpa nɛ ajɔ kogɛ Mɔn a Ɔsɔwɔ bi Ɛyurɔyura. Tata Ɔsɔwɔ alɛ kone ɔtol, mɔng nsɔjɛ yɔ ɔkol Defid.

³³ Ala fele anɛ ba Jɛkɔb na nsinsi ɛjiba ɔtol ɛbɛ ɛnim teg ɛbɛl nkulsi.”

³⁴ Meri abib nteb ɔteb Ɔsɔwɔ, “Mɛ nɛnom nka sibam, jifa ɛla lem nan ɛleba?”

³⁵ Nteb ɔteb Ɔsɔwɔ afanga wɛ, “Mbara Ɛtugi ala bole, ɛkɔ Ɔsɔwɔ ji ɛgalɔyura ɛla jɔl nana, ateb arɛ mbara mɔn yɔ ɔlom yɔ ɔla gbɛl alɛ kog arɛ mɔn Ɔsɔwɔ.

³⁶ Ɛjɔl Ɛlisabɛt nɛ a nub ɔwa ala gbɛl mɔn na ɔkol, ajɔl bong arɛ wɛ ngom batig ɔla ɛbɛ ɛgba rir anwɛ aragra.

³⁷ Ateb arɛ ɛjom sang ji Ɔsɔwɔ adɛ mal alem.”

³⁸ Meri afanga, “Mɛ ndɔgalitom a Tata yɔ nɔng ɛjɔl anɔ mɔng ɔbongɔ.” Nteb ɔteb Ɔsɔwɔ atumɛ asa.

Meri areb Ɛlisabɛt

³⁹ Na ngara yifɔ Meri asubi aji na ɛkpa ɛgbɛ ji ɛrenɔ na mfom a ɛwɔng ɛlagɛ ɛjiba Judiya.

⁴⁰ Ayɛl na ɛtɛk Sakariya aji kag Ɛlisabɛt nyɔ.

⁴¹ Naji Ɛlisabɛt ayogɔ nyɔ bi Meri akagɔ, mɔn a Ɛlisabɛt atumɛ na ala, Mbara Ɛtugi aror wɛ.

⁴² Ɛlisabɛt akɔn na nyura lilom atɔgɛ: “Na lirɔng abakal wɔ yɔ ɔgalɔ bɛl lifola, lifola ɛjɔl ɛkarɛ mɔn yɔ ɔla gbɛl!

⁴³ Fa ba ntakpa ɔfa yi nɔ ter ɛla ker nan nyɛn Tata aba rebam?

⁴⁴ Naji nyogɔ nyɔ ɛba, mɔn yɔ ayɔbɔ na ala atum na ɛyɛbalitem.

⁴⁵ Lifola ɛjɔl na nɛ yɔ akpenɔ ntamɛ arɛ ji Tata abongɔ ɛla lelem.”

Ɛsɛ ji Meri

⁴⁶ Meri abong, “Litem ɛlama jige Tata.

⁴⁷ Ɛtugi ɛjama ɛkpe ɛyɛba litem na Ɔsɔwɔ Nyanyangɛ ɔma.

⁴⁸ Ateb arɛ wɛ ali gbɔ nter ɛma nɛ a ndɔn a ndɔgalitom ɔwɛ, bɔm batig anɛ kpakpa alam kog arɛ lifola.

⁴⁹ Ateb Ɔsɔwɔ yɔ agalɔ jɔg agba lem atakpa nsɔl akam, mbeng ɛyɛ ajɔl mbara.

⁵⁰ Bɔm na ɛkuma nub ɛyeng ɔlome na ɛyeng nkulsi sang, wɛ abɛl ndɔn na anɛ ba abɛga wɛ.

⁵¹ Tata agba lem akpɔga ɛsi a nsɔl na abɔ ayɛ, agba yama anɛ ba atababiji na ntem abɔ.

⁵² Agba budi atakpa atol na nji abɔ, atab akugbɛn ayura.

⁵³ Akarɛ anɛ ba njal ateng a nsɔl, akam afang anɛ abɔ abɔ.

⁵⁴ Agba nyangɛ ndɔgalitom ɔwɛ Isrɛl, agbɔ nter ɛsig a nyɔ ji ndɔn.

⁵⁵ Asig Ɛbram nyɔ ndɔn na nub ɛyɛ na nsinsi.”

⁵⁶ Meri akar na Ɛlisabɛt mɔng anwɛ ara, nig afɛngɛ akuri na ɛtɛk.

Ɔgbɛl bi Jɔn nwura anɛ alib

⁵⁷ Na ngara yi ɔgbɛl bi Ɛlisabɛt ɛrirɔ, agbɛl mɔn yɔ ɔlom.

⁵⁸ Na ji anɛ ba nkɔn tɛk na abɔnyɛn ayogɔ arɛ Tata agba wɛ teb ntakpa ndɔn, abɛl ɛyɛbalitem na nɛ.

⁵⁹ Naji mɔn alɔ akar mfo ɛnigni, abɔ fɛb abal arɛ aba lemɛ ɔjangkon, agara arɛ akarɛ mbeng yi Sakariya, yi ndɛ.

⁶⁰ Ɛlisabɛt atɛn arɛ, “Mɔn ala nyina Mbeng a Jɔn.”

⁶¹ Abong atɔgɛ arɛ, “Mbeng yi fɔ Jɔn aream na nub ɛya.”

⁶² Akɔ abɔ abib Sakariya asɛba mbeng a mɔn yi akɔrɔ wɛ.

⁶³ Sakariya abib arɛ akarɛ ɛjom wɛ ayɛlɛ, ayɛlɛ arɛ, “Mbeng ɛyɛ anyina arɛ Jɔn.” Ɛkpɔ abɔ ɛsi!

⁶⁴ Fɔtutu Sakariya nyɔ ɛribi lirebe ɛfungi abɔm ntɔga mbonga, atiga Ɔsɔwɔ.

⁶⁵ Ɛkokob ɛjɔl na anɛ ba nkɔn tɛk, ɛteng ɛka jifa ɛnyada na bijiba bi ɛkonɔ na biwɔng bi Judiya.

⁶⁶ Nɛ yɔ ayogɔ abangɛ nsɔl yi ɛlemɔ akɛrɛ abib, “Bɛ ɛjom ji mɔn yɔfa abaga njɔla?” Na ɛtete ɔbɔ bi Tata ɛre nanɛ.

Ɛsɛ ji Sakariya

⁶⁷ Ndɛ Jɔn, Sakariya aror na Mbara Ɛtugi, abong alom Ɔsɔwɔ:

⁶⁸ “Baba wur ɛtig Tata Ɔsɔwɔ bi Isrɛl! ateb wɛ agba ba naji anɛ abɛ arɛ aba nyangɛ abɔ.

⁶⁹ Agba tom ntakpa Nyanyangɛ, yɔ arunɔ ɔgu bi ndɔgalitom ɔwɛ ntol a Defid.

⁷⁰ Agba sik nyɔ mba angɔ atɔg abara bayɛn amir Ɔsɔwɔ.

⁷¹ Ala wur nyangɛ na abɔ anɛ ba ajing abira na anɛ ba agbaga wur.

⁷² Asig nyɔ arɛ ala bɛl ndɔn na anɛ bakol ala tɔb agbɔ nter yi mbara ɛnwɔngɛ.

⁷³ Ɛsiga nyɔ ji akɔlɔ na nsɔjira Ɛbram:

⁷⁴ Ala wur yege na abɔ ya anɛ ba ɔjing abra, na ji ɛmal ɛrɔgɛ wɛ ɛdɛ bɛl ɛkokob.

⁷⁵ Na ji wur ɛla jɔl mbara na ntɔra ligbɛna na libri ɛlɛ na kpakpa afo a likpen ɛlira.

⁷⁶ “Wɔ mɔn ɔma ɔla jɔl nyɛn amir yɔ Ɔsɔwɔ bi Ɛyurɔyura; wɔ ɔlaji na osi bi Tata ɔji tore mba ɔbomɛ.

⁷⁷ Ala lem anɛ abɛ akun arɛ ala bɛl ɔnyangɛ, ala tum akarɛ abɔ na abeɔfɛm.

⁷⁸ Ateb arɛ Ɔsɔwɔ ɛbra akpe ndɔn. ji ɛla tɔna fɔ liro ɛlɛ ɛla ba na agra mɔng njol yi ayaga na libo.

⁷⁹ Liro ɛla jɔl ɛkarɛ anɛ ba arenɔ na ɛjingi na ɛtugi akuanɛ, ɛfɛng ɛbabɛ aja ayira atu na mba likɔna.”

⁸⁰ Mɔn ɔfɔ abenga akore na ɛtugi, ajɔl na ɛkpelele tɛtɛ aji teb ɛlɛ na ɛtekla ɛgor Isrɛl.