Zekaria 9 - An Bibel Kernewek 20234 (Kernewek Kemmyn)

Breus erbynn an Eskerens

¹ Begh ger an Arloedh war dir Hadrak ha Damaskus a vydh y bowesva; rag war an Arloedh y fydh dewlagas tus, hag oll loethow Ysrael.

² Hamath ynwedh, usi war hy or; Tyr ynwedh ha Sidon, mar skiansek kyn fons.

³ Tyr re dhrehevis dinas rygdhi; re vernyas arghans avel doust, hag owr pur avel leys an stretys.

⁴ Mes an Arloedh a wra hy fesya ha tewlel hy nerth y'n mor, ha hi a vydh devorys gans tan.

⁵ Ashkelon a'n gwel, ha perthi own, Gaza ynwedh, ha hi a wra gwynnel gans angoes, hag Ekron, rag hi a vydh toellys a'y govenek. Gaza a gyll hy myghtern, hag Ashkelon ny vydh annedhys.

⁶ Pobel gemmyskreydh a wra annedhi Ashdod, ha my a dregh dhe-ves goeth an Filistysi.

⁷ My a gemmer y woes yn-mes a'y anow, ha'y daklow kasadow dhiworth y dhyns; ev ynwedh a vydh remenant rag agan Duw, hag ev a vydh avel kordh yn Yuda, hag Ekron a vydh avel an Yebusysi.

⁸ My a wra kampya ryb ow chi avel gwithyas, ma na dremenno denvyth na dehweles. Ny dremen mester kethneth arta dresta, rag lemmyn my re welas gans ow dewlagas.

Devedhyans an Myghtern

⁹ Lowenha yn feur, myrgh Sion! Garm, myrgh Yerusalem! Awotta dha vyghtern a dheu dhis, gwiryon ha trygh, uvel hag ow marghogeth war asen, war ebel mab asen.

¹⁰ My a dhistru an charett dhiworth Efraym ha'n margh dhiworth Yerusalem, Gwarak an gas a vydh distruys. Ev a gews kres dhe'n kenedhlow. Y rewl a wra drehedhes a vor dhe vor, ha dhiworth an avon bys pennow an norvys.

¹¹ Ha ty, drefenn goes dha gevambos, my a wra delivra dha brisnoryon mes a bytt heb dowr.

¹² Dehwelewgh dh'agas skons, prisnoryon govenek; hwath hedhyw my a dheriv y restoryav dewblek dhis.

¹³ My a wra plegya Yuda avel gwarak ha gorra Efraym ynni avel seth. My a dhifun dha vebyon, A Sion, erbynn dha vebyon, A Bow Grek, ha my re'th wrug avel kledha kasor.

¹⁴ Ena an Arloedh a omdhiskwedh a-ughta; y seth a yn-mes avel lughes. An Arloedh Duw a hwyth an hirgorn, ha mos yn-rag yn korwynsow an dyghow,

¹⁵ hag Arloedh an luyow a vydh skoes warnedha. I a wra dybri, ha stankya yn-nans an veyn-dowlbrenn. I a wra eva ha garma kepar ha gans gwin, ha bos lenwys avel bolla-offrynn, avel kern an alter.

¹⁶ An Arloedh aga Duw a wra aga sawya y'n jydh na avel flokk y bobel; rag i a vydh avel meyn drudh yn kurun, ow sterenni yn y dir.

¹⁷ Ass yw meur y dhader, hag ass yw meur y dekter! Greun a wra dhe'n wer yowynk seweni, ha gwin nowydh an myrghes.