Zekaria 6 - An Bibel Kernewek 20234 (Kernewek Kemmyn)

Gwelesigeth an Peswar Charett

¹ Arta my a dhrehevis ow dewlagas ha mires, hag awotta peswar charett a dheuth yn-mes dhiworth an bolgh yntra dew venydh, ha'n menydhyow a veu menydhyow a vrons!

² An kynsa charett a'n jeva mergh rudh, an nessa a'n jeva mergh du,

³ an tressa charett a'n jeva mergh gwynn, ha'n peswora a'n jeva mergh brithek; nerthek vons.

⁴ My a wovynnas an el esa ow kewsel orthiv, ‘Pandra yns i, ow arloedh?’

⁵ An el a worthybis dhymm, ‘An re ma yw an peswar gwyns a nev esa ow mos yn-mes dhiworth aga savla a-rag Arloedh oll an norvys.

⁶ Yma an charett gans mergh du ow mos yn-mes dhe'n tir kledh, an vergh gwynn eth yn-mes war aga lergh, ha'n vergh brithek eth yn-mes dhe dir an dyghow.’

⁷ Pan eth an vergh nerthek yn-mes, i a vynnas gwandra der an norvys. Hag ev a leveris, ‘Kewgh dhe wandra der an norvys!’ Ytho i a wandras der an norvys.

Kurunans an Arghoferyas Yoshua

⁸ Ena ev a'm gelwis ha kewsel orthiv, ‘Mir, an re na esa ow mos yn-mes dhe'n tir kledh re ros powes dhe'm spyrys yn tir kledh.’

⁹ Ger an Arloedh a dheuth dhymm, ow leverel:

¹⁰ Kemmer dhiworth an dhivresow, dhiworth Helday, Tobia, ha Yedaya; ha ty ke y'n keth jydh na dhe ji Yosia mab Sefania.

¹¹ Kemmer arghans hag owr ha gwra kurun, ha'y gorra war benn Yoshua mab Yehosadak, an arghoferyas.

¹² Lavar dhodho, Yndellma y lever Arloedh an luyow: Awotta'n gour, Skorrenn y hanow, hag ev a dyv a-dhiworth y le ha drehevel tempel an Arloedh.

¹³ Ev a wra drehevel tempel an Arloedh, hag ev a dheg an meuredh hag esedha ha governa war y se. Ev a vydh oferyas war y se, hag y fydh kusul kres ynter an dhew.

¹⁴ An gurun a vydh avel kovadh dhe Helem, dhe Tobia, dhe Yedaya ha dhe Hen mab Sefania yn tempel an Arloedh.

¹⁵ An re neb yw pell a dheu hag i a dhrehav tempel an Arloedh, ha hwi a woer Arloedh an luyow ow dannvon dhywgh. Homma a hwyrvydh mar koslewowgh yn tiwysyk orth an Arloedh agas Duw.