Zekaria 13 - An Bibel Kernewek 20234 (Kernewek Kemmyn)

Glanheans a Beghadow

¹ Y'n jydh na y fydh fenten igerys dhe ji Davydh ha dhe drigoryon Yerusalem rag pegh ha mostedhes.

² Y'n jydh na, yn-medh Arloedh an luyow, my a wra dilea henwyn an imajys dhiworth an tir, ha ny vydhons kovhes byth moy; ynwedh my a wra gorra dhe-ves a'n tir an brofoesi ha'n spyrys avlan.

³ Mar kwra nebonan profoesa hwath, ena y das ha'y vamm a'n dineythis a lever dhodho, ‘Ny vewydh; rag ty re wowleveris yn hanow an Arloedh.’ Y das ha'y vamm a'n dineythis a wra y wana pan wra ev profoesa.

⁴ Y'n jydh na, pub profoes a vydh methek a'y welesigeth, pan wra ev profoesa. Ny wisk mantell blew rag may toello.

⁵ Ev a lever, ‘Nyns ov vy profoes, tiek ov vy; rag den a'm prenas dhiworth ow yowynkneth.’

⁶ Nebonan a lever dhodho, ‘Pyth yw an goliow ma yntra dha dhiwla?’ Ena ev a lever, ‘An goliow a gemmeris yn chi ow howetha.’

An Bugel Gweskys, ha'n Flokk Skattrys

⁷ ‘Difun, A gledha, erbynn ow bugel, erbynn an den yw ow howeth!’ yn-medh Arloedh an luyow. Gwask an bugel, ha'n deves a vydh skattrys, ha my a dreyl ow leuv erbynn an re vyghan.

⁸ Yn oll an tir, yn-medh an Arloedh, diw rann a vydh treghys dhe-ves hag y ferwons; mes an tressa a vydh gesys ynno.

⁹ My a dhre an tressa rann dre'n tan, ha'ga furhe dell yw purhes an arghans, a'ga frevi dell yw prevys an owr. Ev a wra gelwel war ow hanow, ha my a worthyp dhodho; my a lever, ‘Ev yw ow fobel’, hag ev a lever, ‘An Arloedh yw ow Duw.’