Ysay 9 - An Bibel Kernewek 20234 (Kernewek Kemmyn)

Reyn an Myghtern a Dheu

¹ Mes ny vydh tewlder rygdhi hi neb a veu yn ahwer. Yn termyn kyns ev a wrug bismer dhe bow Zebulun ha pow Naftali, mes wortiwedh ev a wra enora fordh an mor, war an tu arall dhe'n Yordan, Galile an kenedhlow.

² An bobel a gerdhi yn tewlder re welas golow meur; an re trigys yn tir skeus ankow – golow re splannas warnedha.

³ Ty re gressyas an genedhel, ty re veurhas an lowena; i a lowenha a-ragos kepar hag yn lowender an goeldheys, kepar dell yw tus fest heudhik pan rannons preydh.

⁴ Rag ty re dorras yew y vegh, ha lorgh y dhiwskoedh, an welenn a wre y gonstryna, kepar hag yn dydh Midyan.

⁵ Rag pub botasenn ow trettya yn tervans an gas, ha pub mantell rolys a-dro yn goes a vydh leskys, keunys dhe'n tan.

⁶ Rag flogh re beu genys dhyn, mab re beu res dhyn; ha war y dhiwskoedh yma arloettys. Hag ev a vydh henwys Kusulyador Marthys, Duw Galloesek, Tas bys Vykken, Pennsevik Kres.

⁷ Dhe ynkressyans an arloettys ha dhe gres ny vydh finweth, rag tron Davydh ha rag y vyghterneth, dh'y fastya ha dh'y skoedhya gans gwirvreus hag ewnder alemma rag ha bys vykken. Gwres Arloedh an luyow a wra hemma.

Breus erbynn Balghder hag Arwask

⁸ An Arloedh re dhannvonas ger dhe Yakob; y koedh war Ysrael.

⁹ Oll an bobel a'n godhvydh, Efraym hag annedhysi Samaria; neb a leveris gans goeth ha balghder a golonn:

¹⁰ ‘Brykkys re goedhas, mes ni a dhastrehav gans meyn treghys; sykaminwydh re beu treghys dhe'n dor, mes ni a worr kederwydh yn aga le.’

¹¹ Ytho an Arloedh a dhrehevis envi er aga fynn, ha provokya aga eskerens,

¹² Aram a-rag ha'n Filistysi a-dryv; hag i re dhevoryas Ysrael gans anow igor. Yn despit dhe oll hemma ny dreylyas y sorr, ha'y leuv yw hwath ystynnys.

¹³ Mes ny dreylyas an bobel dhe neb a's gweskis, na ny hwilsons Arloedh an luyow.

¹⁴ Ytho an Arloedh a dregh dhe-ves dhiworth Ysrael penn ha lost, skorrenn ha korsenn yn unn jydh.

¹⁵ An henavek ha'n den ughel, ev yw an penn, ha'n profoes ow tyski gow, ev yw an lost.

¹⁶ An re a led an bobel ma y's gwrons dhe wandra, ha'n re ledys yw sowdhenys.

¹⁷ Rakhenna an Arloedh ny lowenha yn aga gwer yowynk, na kemmeres truedh a'ga omdhivasow ha gwedhwesow; rag pubonan yw ansans ha drog, ha pub ganow a gews follneth. Yn despit dhe oll hemma ny dreylyas y sorr, ha'y leuv yw hwath ystynnys.

¹⁸ Ytho kammhynseth a lesk avel tan, ow tevorya spedhas ha spern, ha leski prysk an koes, ha troyllya yn-bann yn koloven mog.

¹⁹ Dre sorr Arloedh an luyow an tir a vydh kowlleskys, ha'n bobel a vydh avel keunys rag an tan; denvyth ny gemmer truedh a'y vroder.

²⁰ A-dhyghow den a dhevor ha hwath nownek vydh; a-gledh den a dheber ha ny vydh gwalghys. Pubonan a dheber kig y gentrevek.

²¹ Manasse erbynn Efraym, hag Efraym erbynn Manasse; war-barth y fydhons erbynn Yuda. Yn despit dhe oll hemma ny dreylyas y sorr, ha'y leuv yw hwath ystynnys.