Ysay 8 - An Bibel Kernewek 20234 (Kernewek Kemmyn)

Mab Ysay avel Tokyn

¹ An Arloedh a leveris dhymm, Kemmer dhis rol-skrifa vras, ha skrif warnedhi gans pluvenn den: Maher-shalal-hash-baz.

² My a elow dhymm dustunioryon len, Uria an oferyas, ha Zekaria mab Yeberekia.

³ My a dheuth nes dhe'n brofoeses, ha hi a omdhuk ha dineythi mab. Ena an Arloedh a leveris dhymm, Hanw e Maher-shalal-hash-baz;

⁴ rag kyns an flogh dhe wodhvos gelwel ‘Ow thas’ hag ‘Ow mamm’, rychys Damaskus ha preydh Samaria a vydh degys dhe-ves a-rag myghtern Assyria.

⁵ An Arloedh a gewsis dhymm arta, ow leverel:

⁶ Drefenn an bobel ma dhe nagha dowrow Shiloagh, usi ow mos yn kosel, ha teudhi yn own a Resin mab Remalia;

⁷ rakhenna awotta'n Arloedh a dhre warnedha dowrow bras ha meur an avon, myghtern Assyria gans oll y wolewder. Ha hi a dheu yn-bann dres oll hy hanolyow, ha mos war oll hy glannow;

⁸ hi a dremen dre Yuda avel liv ha drehedhes bys an konna; hag ystynnans hy eskelli a lenow les dha dir, Immanuel.

⁹ Bedhewgh terrys, poblow, ha bedhewgh dralys; ha goslowewgh, oll hwi vroyow pell, Omwrogysewgh, ha bedhewgh dralys! Omwrogysewgh, ha bedhewgh dralys!

¹⁰ Omgusulyewgh war-barth, ha'n gusul a vydh lestys; leverewgh ger, ha ny sev, rag bos Duw genen.

¹¹ Rag an Arloedh a gewsis dhymm yndellma gans leuv grev, hag a'm gwarnyas ma na gerthen yn fordh an bobel ma, ow leverel:

¹² Na leverewgh ‘Bras!’ pup-prys may hwra an bobel ma leverel bras, ha na berthewgh own a'ga own, na vedhewgh dyegrys.

¹³ Hwi a sansha Arloedh an luyow, ev yw agas euth, hag ev yw neb a'gas ownekha,

¹⁴ Ev a vydh sentri, ha men trebuchya ha karrek koedha dhe dhew ji Ysrael, hag antell ha maglenn rag annedhysi Yerusalem.

¹⁵ Meur anedha a drebuch, ha koedha ha bos terrys; i a vydh maglennys, ha kemmerys.

Dyskyblon Ysay

¹⁶ Kolm an dustuni, sel an dyskans yn mysk ow dyskyblon.

¹⁷ My a worta an Arloedh neb a gudh y fas dhiworth chi Yakob, hag ynno y fydh ow govenek.

¹⁸ Awotta, my ha'n fleghes a wrug an Arloedh aga ri dhymm yw toknys ha marthusyon yn Ysrael dhiworth Arloedh an luyow usi trigys yn menydh Sion.

¹⁹ Mar leverons dhywgh, ‘Hwilewgh kusul a nygromonsoryon ha koelyogyon neb a hwyster ha hanasa; a ny goedh dhe bobel hwila aga Duw, hwila kusul an re varow a-barth an re vew

²⁰ rag dyskans ha dustuni?’ Yn sur mar leverons yndella, henn yw rag ny's teves golow banna.

²¹ Ev a dremen der an tir, duwenik ha nownek; ha rag bos dhedha nown, i a vydh serrys, hag ow mires war-vann i a volleth aga myghtern ha'ga Duw;

²² po ow mires orth an dor, otta anken ha tewlder, an tewolgow a ahwer; hag i a vydh herdhys yn tewlder tew.