Ysay 7 - An Bibel Kernewek 20234 (Kernewek Kemmyn)

Ysay a Golonnekha Myghtern Ahaz

¹ Yn dydhyow Ahaz mab Yotham mab Uzzia, myghtern Yuda, Resin myghtern Aram ha Pekagh mab Remalia myghtern Ysrael a yskynnas dhe Yerusalem dhe werrya er hy fynn, mes ny allas hy fetha.

² Y feu derivys dhe ji Davydh, ow leverel, ‘Aram yw keffrysyas Efraym’; ha'y golonn ha kolonn y bobel a grenas kepar dell gren gwydh an koes a-rag an gwyns.

³ Ena an Arloedh a leveris dhe Ysay, Ke yn-rag dhe vetya Ahaz, ty ha Shear-yashub dha vab, orth penn dowrbons an poll gwartha, ryb fordh Park an Troghyer.

⁴ Ty a lever dhodho, Bydh war, hag omwith kosel. Na borth own, na vydh digolonnek drefenn an dhew stokk ma a yttewi ow megi, drefenn sorr fers Resin hag Aram ha mab Remalia.

⁵ Rag Aram re vrasas droktra er dha bynn, gans Efraym ha Remalia, ow leverel,

⁶ Yskynnyn ni erbynn Yuda ha'y broweghi, hy skwardya a-les ha'y hemmeres dre nerth ragon ni agan honan, ha gul mab Tabeel myghtern warnedhi.

⁷ Ytho yndellma y lever an Arloedh Duw: Ny sev, ha ny hwyrvydh;

⁸ rag penn Aram yw Damaskus ha penn Damaskus yw Resin; hag a-ji dhe bymp blydhen ha tri-ugens Efraym a vydh terrys dhe demmyn ma na vydh pobel na fella.

⁹ Penn Efraym yw Samaria, ha penn Samaria yw mab Remalia. Mar ny gryssowgh ena ny vydhowgh fastys.

Ysay a Re Tokyn Immanuel dhe Ahaz

¹⁰ Ha'n Arloedh a gewsis arta dhe Ahaz ow leverel:

¹¹ Ty govynn tokyn dhiworth an Arloedh dha Dhuw, bedhes po down avel ifarn, po y'n ughelder a-vann.

¹² Mes Ahaz a leveris, ‘Ny wovynnav, na ny vynnav previ an Arloedh.’

¹³ Ena yn-medh ev: ‘Goslowewgh, chi Davydh! A'n synsowgh tra vyghan hwi dhe skwitha tus, mes hwi a vynn ynwedh skwitha ow Duw?

¹⁴ Rakhenna, an Arloedh y honan a re dhywgh tokyn. Awotta, an wyrghes a omdhek ha dineythi mab ha hi a'n henow Immanuel.

¹⁵ Kowles ha mel y teber bys pan woer denagha an drog ha dewis an da.

¹⁶ Rag kyns an maw dhe wodhvos denagha an drog ha dewis an da, an tir a vydh forsakys, mayth owgh hwi ownek a-rag y dhew vyghtern.

¹⁷ An Arloedh a dhre warnas ha war dha bobel ha war ji dha das dydhyow na dheuth a-dhia'n jydh may tibarthas Efraym dhiworth Yuda: myghtern Assyria hogen.’

¹⁸ Y'n jydh na an Arloedh a hwiban dhe'n gelyonenn usi yn penn pella goverow Ejyp ha dhe'n wenenenn usi yn pow Assyria;

¹⁹ hag i oll a dheu ha powes war an nansow klegerek ha war folsyow an karregi, war oll prysk an spern ha war bub dowrva.

²⁰ Y'n jydh na an Arloedh a dregh der altenn a veu gobrenys a-dreus dhe'n avon – dre vyghtern Assyria – gols an penn, blew an diwarr, ha hi a remov an varv ynwedh.

²¹ Y'n jydh na gour a vag denewes ha dew dhavas.

²² Drefenn an lanwes a leth a rons, ev a dheber kowles. Rag pubonan yw gesys y'n tir a dheber kowles ha mel.

²³ Y'n jydh na pub tyller mayth esa mil winbrenn ynno, hag a dylis mil shekel arghans, a vydh spedhas ha spern.

²⁴ Gans sethow ha gans gwarak tus a dheu di, rag y fydh oll an tir spedhas ha spern.

²⁵ Oll an brennow o kravellys gans kravell, ny edh ena rag own a spedhas ha spern; y fydhons tylleryow mayth yw chatel dannvenys dhe wari, ha trettys gans deves.