Ysay 63 - An Bibel Kernewek 20234 (Kernewek Kemmyn)

Dial war Edom

¹ ‘Piw yw hemma ow tos dhiworth Edom, yn dillas rudhgogh dhiworth Bosra? Piw yw hemma gwiskys yn splannder, ow kerdhes yn-rag yn y alloes bras?’ ‘My y'th yw, ow kewsel yn ewnder, galloesek dhe sawya.’

² ‘Prag yth yw dha wiskas rudh, ha'th tillas avel nebonan ow trettya yn gwinwask?’

³ ‘My re drettyas an winwask ow honan; dhiworth an kenedhlow nyns esa denvyth genev. My a's trettyas y'm sorr ha'ga stankya y'm konnar; aga sugen a lagennas war ow gwiskas, ha namma oll ow dillas.

⁴ Rag yth esa dydh dial y'm kolonn, ha blydhen ow daspren re dheuth.

⁵ My a viras, mes nyns esa denvyth ow kweres; skruth a'm kemmeras, nag esa denvyth ow skoedhya; ytho ow bregh ow honan a wrug delivrans, ha'm sorr a'm skoedhyas.

⁶ My a drettyas poblow y'm sorr, ha'ga medhwi y'm konnar, ha dinewi aga sugen war an dor.’

Tregeredh an ARLOEDH

⁷ Meneges tregeredhow an Arloedh a wrav, ha gormoledhow an Arloedh, war-lergh pup-tra a wrug an Arloedh ragon, ha lies tra dha rag chi Ysrael a wrug ev ragdha war-lergh y druedhow ha war-lergh palster y dregeredh.

⁸ Ev a leveris, ‘Sur ow fobel yns i, mebyon na wra falsuri’; ytho ev a dheuth ha bos Selwador dhedha

⁹ yn oll aga anken. Nyns o kannas nag el mes y lok ev a's sawyas. Yn y gerensa hag yn y druedh ev a's dasprenas; ev a's drehevis ha'ga doen oll an dydhyow koth.

¹⁰ Mes i a rebellyas ha grevya y Spyrys sans; rakhenna ev a dreylyas dhe vos eskar dhedha, hag ev y honan a vatalyas orta.

¹¹ Ena ev a borthas kov a'n dydhyow koth, Moyses ha'y bobel. Ple'ma ev neb a's dros war-vann yn-mes a'n mor, gans bugeledh y flokk? Ple'ma ev neb a settyas y Spyrys Sans a-berth ynno,

¹² neb a wrug dh'y vregh gloryus mos orth leuv dhyghow Moyses, ow folsa dowrow a-ragdha, dhe wul ragdho hanow a dhur vys vykken,

¹³ neb a wrug dhedha kerdhes der an downderyow? Avel margh y'n gwylvos, ny drebuchyons;

¹⁴ avel best a dhiyskynn dhe'n nans, Spyrys an Arloedh a ros dhedha powes. Yndella ty a ledyas dha bobel, dhe wul dhis hanow gloryus.

Pysadow a Edrega

¹⁵ Mir dhiworth nev, ha gwel dhiworth trigva ughel dha sansoleth ha'th glori. Ple'ma dha dhiwysykter ha'th krevder, amovyans dha golodhyon ha'th truedh? Skonys yns dhymm.

¹⁶ Rag ty yw agan Tas, kyn na'gan goer Abraham ha na'gan aswonn Ysrael; ty yw an Arloedh agan Tas, agan Dasprenyas vynnari yw dha hanow.

¹⁷ Prag re'gan gwrussys dhe wandra dhiworth dha fordhow, A Arloedh, ha kaleshe agan kolonn ma na borthen own ahanas? Dehwel a-barth dha servysi, loethow dha eretons.

¹⁸ Rag termyn kott dha bobel sans a'n eritas, mes lemmyn agan eskerens re drettyas dha sentri yn-dann dreys.

¹⁹ Ni re beu a-henys kepar ha'n re na rewlsys warnedha, kepar ha'n re na veu dha hanow gelwys warnedha.