Ysay 6 - An Bibel Kernewek 20234 (Kernewek Kemmyn)

Gwelesigeth a Dhuw y'n Tempel

¹ Y'n vlydhen may ferwis myghtern Uzzia, my a welas an Arloedh esedhys yn se, ughel ha drehevys, ha lostennow y bows a lenwis an tempel.

² Yth esa serafyn ow sevel a-ughto, hwegh askell dhe bubonan anedha: gans diw ev a gudha y fas, ha gans diw ev a gudha y dreys, ha gans diw ev a nija.

³ An eyl a elwi dh'y gila, ow leverel, ‘Sans, sans, sans, Arloedh an luyow, oll an norvys yw leun a'y glori.’

⁴ Ha peulyow an treudhow a grenas orth lev neb a elwi, ha'n chi a veu lenwys a vog.

⁵ Ena my a leveris, ‘Go-vy! diswrys ov vy, rag gour avlan y dhiwweus ov vy, ha trigys esov yn mysk pobel avlan hy diwweus; rag ow dewlagas re welas an Myghtern, Arloedh an luyow.’

⁶ Ena onan a'n serafynyon a nijas bys dhymm, hag yn y dhorn regydhenn re gemmersa gans gevel a-dhiwar an alter.

⁷ Ev a dochyas ow ganow, ha leverel, ‘Awotta, homma re dochyas dha dhiwweus ha treylys dhe-ves yw dha anewnder, ha gevys yw dha begh.’

⁸ Ha my a glewas lev an Arloedh ow leverel, ‘Piw a dhannvonav, ha piw a ragon ni?’ Ena my a leveris, ‘Ottavy, dannvon vy!’

⁹ Hag yn-medh ev, ‘Ke, ha lavar dhe'n bobel ma, “Klewewgh devri, mes na gonvedhewgh; gwelewgh devri, mes na aswonnewgh.”

¹⁰ Gwra kolonn an bobel ma tew, ha gwra aga diwskovarn poes, ha sel aga dewlagas, ma na glewons der aga dewlagas ha gweles der aga diwskovarn ha konvedhes der aga holonn, hag i a dreyl ha bos sawys.’

¹¹ Ena my a leveris, ‘Pes termyn, A Arloedh?’ Hag ev a leveris, ‘Bys pan vydh sitys diswrys, heb annedhyas, ha chiow heb den, ha'n tir distruys ha difeyth;

¹² bys pan wra an Arloedh dannvon tus pell dhe-ves, ha bos tylleryow forsakys pals yn mysk an tir.

¹³ Ha kyn fo an degves rann gesys ynno, y fydh leskys arta, kepar ha terebinthenn po derwenn a as kyf pan yw treghys dhe'n dor.’ An has sans yw hy hyf.