Ysay 56 - An Bibel Kernewek 20234 (Kernewek Kemmyn)

Selwyans rag Oll an Poblow

¹ Yndellma y lever an Arloedh: Gwithewgh gwirvreus ha gwrewgh ewnder, rag ow selwyans a dheu a verr spys ha'm ewnder a vydh diskudhys.

² Gwynnvys an gour a wra hemma, ha mab an den a gyv dalghenn ynno, neb a with an sabot heb y dhisakra, ha neb a with y leuv dhiworth gul oll drog.

³ Na leveres mab an estren neb re junys y honan dhe'n Arloedh, ‘An Arloedh a'm diberth yn sur dhiworth y bobel’; ha na leveres spadhesik, ‘Otta, gwydhenn sygh ov vy.’

⁴ Rag yndellma y lever an Arloedh: Dhe'n spadhesigyon hag a with ow sabotys, ha dewis an pyth yw plegadow dhymm, ha synsi fast ow hevambos,

⁵ my a re dhedha y'm chi hag y'm fosow men-kov ha hanow gwell ages mebyon ha myrghes; my a re dhodho hanow a dhur bys vykken na vydh dileys.

⁶ Ha mebyon an estren a jun dhe'n Arloedh dh'y servya, ha dhe gara hanow an Arloedh dhe vos servysi dhodho, pubonan a with an sabot heb y dhisakra ha synsi fast ow kevambos –

⁷ my a wra aga dri dhe'm menydh sans, ha'ga lowenhe y'm chi a bysadow. Aga offrynnow leskys ha'ga sakrifisow a vydh kemmeradow war ow alter, rag ow chi a vydh gelwys chi a bysadow rag oll an poblow.

⁸ Yndellma y lever an Arloedh Duw, neb a guntell an re skattrys a Ysrael: My a guntell ynwedh erell dhedha, dres an re kuntellys dhedha seulabrys.

Kuhudhans Duw Erbynn an Rewloryon Dhrog

⁹ Oll hwi bestes an gwel, oll hwi miles y'n gwylvos, dewgh dhe dhybri.

¹⁰ Y woelyadoryon yw dall, i oll yw heb godhvos; i oll yw keun avlavar na yllons hartha, owth hunrosa, ow krowedha, ow kara koska.

¹¹ Keun krev aga ewl yns i, nevra ny gevons lowr. I yw bugeledh na wodhons konvedhes; i oll re dreylyas dh'aga fordh aga honan, pubonan dh'y brow y honan, onan hag oll.

¹² ‘Dewgh’, yn-medhons, ‘gesewgh vy dhe gavoes gwin! Evyn agan gwalgh a gorev. An vorow a vydh avel hemma, po brassa hwath.’