Ysay 53 - An Bibel Kernewek 20234 (Kernewek Kemmyn)

¹ Piw re grysis an pyth re glewsyn? Ha piw dhodho y feu diskwedhys bregh an Arloedh?

² Rag ev a devis a-ragdho avel losowenn yowynk, hag avel gwreydhenn yn-mes a dir sygh; ny'n jevo na furv na reowta, rag may firren orto, na travyth yn y semlans, rag ma'gan bo hwans anodho.

³ Dispresys o ha skonys gans tus, gour a dhuwon hag a aswonni galar, hag avel onan may hwra tus kudha aga fas dhiworto; dispresys o, ha ny wrussyn vri anodho.

⁴ Yn sur ev re borthas agan galarow, ha re dhug agan duwon; saw ni a dybi y vos plagys, gweskys gans Duw, hag iselhes.

⁵ Mes rag agan kammweythresow y feu ev goliys, brewys rag agan peghosow; ev a borthas an geredh a dhre dhyn kres, ha gans y strokosow sawys on.

⁶ Ni oll avel deves re wandras; pubonan ahanan re dreylyas dh'agan fordh agan honan, ha'n Arloedh re worras warnodho an kammweyth ahanan ni oll.

⁷ Arweskys veu ha tebeldhyghtys, byttegyns ny igoras y anow;

⁸ ev a veu ledys dhe-ves dre gonstrynans wosa drogvreus. Piw a wra vri a'y denkys? Rag treghys veu yn-mes a dir an re vew; rag kammweyth ow fobel y feu gweskys.

⁹ I a ros dhodho bedh gans an debeles, ha gans felons yn y vernans, kyn na wrug garowder vyth, ha ny veu toell vyth yn y anow.

¹⁰ Mes an Arloedh a vynnas y vrewi; ha gul dhodho godhevel; mar kwra dh'y enev bos offrynn kammweyth, ev a wel y has, ha gul dh'y dhydhyow bos hir, ha bodh an Arloedh a sewen yn y leuv.

¹¹ Wosa godhevyans y enev, ev a wel golow, ha kontentys vydh; der y wodhvos ow gwas gwiryon a ewnha lies, hag ev a dheg aga hammweythresow.

¹² Rakhenna my a re dhodho rann gans an tus vras, ha gans an tus alloesek ev a rann an preydh; rag ev a dhinewis y vewnans bys ankow, ha reknys veu yn mysk an dhrogoberoryon. Ev a dhug peghes tus pals, hag a bledyas a-barth an dhrogoberoryon.