Ysay 51 - An Bibel Kernewek 20234 (Kernewek Kemmyn)

Selwyans Heb Diwedh rag Sion

¹ Goslowewgh orthiv, hwi hag a jas war-lergh ewnder, hwi hag a hwila an Arloedh. Mirewgh orth an garrek may fewgh treghys dhiworti, hag orth an mengleudh may fewgh pelys dhiworto.

² Mirewgh orth Abraham, agas tas, hag orth Sara a'gas dineythis; rag nyns o ev marnas onan pan y'n gelwis, mes my a'n bennigas ha'y wul lies.

³ Rag an Arloedh a vynn konfortya Sion, ev a vynn konfortya oll hy magoryow, ha gul hy gwylvos avel Eden, hy difeyth avel lowarth an Arloedh. Joy ha lowender a vydh kevys ynni, grasyans ha lev kana.

⁴ Goslowewgh orthiv, ow fobel, hag attendyewgh orthiv, ow henedhel; rag lagha a yn-mes a-dhiworthiv, ha'm ewnder a vydh golow dhe'n kenedhlow.

⁵ Ogas yw ow delivrans, gallas ow selwyans yn-mes, ha'm diwvregh a vreus an kenedhlow; an ynysow a'm gorta, hag y'm bregh i a fydh.

⁶ Drehevewgh agas dewlagas war-vann dhe'n nevow ha mirewgh orth an nor a-woeles; rag an nevow a deudh dhe-ves avel mog, an nor a vydh usys avel kweth, ha'n re usi trigys warnodho a verow avel gwibes; mes ow selwyans a vydh bys vykken, ha ny vydh diwedh dhe'm ewnder.

⁷ Goslowewgh orthiv, hwi hag a woer ewnder, hwi bobel a's teves ow dyskans yn agas kolonn; na berthewgh own a'n geredh a dus, ha na bedhewgh digolonnek drefenn aga despit.

⁸ Rag an goedhan a wra aga dybri avel kweth, ha'n pryv a wra aga dybri avel gwlan; mes ow ewnder a vydh heb diwedh, ha'm selwyans a unn henedh dhe'n nessa.

⁹ Difun, difun, omwisk yn nerth, A vregh an Arloedh. Difun kepar hag y'n dydhyow koth, henedhow an termyn pell, A ny veu ty hag a droghas Rahab yn temmigow, hag a wanas an dhragon?

¹⁰ A ny veu ty hag a syghas an mor, dowrow an keynvor; neb a wrug downder an mor fordh may tremenna an re dasprenys warnedhi?

¹¹ An re dasprenys a'n Arloedh a dhehwel, ha dos dhe Sion gans kana, ha joy heb diwedh a vydh war aga fenn. I a's tevydh lowena ha joy; tristyns ha hanasa a fi dhe'n fo.

¹² My, my yw neb a'gas konfort. Ytho piw osta jy may perthydh own a dhen hag a verow, hag a vab-den neb a wedher avel gwels?

¹³ Ty re ankovas an Arloedh, dha Wrier, neb a lesas an nevow hag a fondyas selyow an norvys. Oll an jydh ty a berth own, drefenn konnar an gwasker, neb a'n jeves mall a dhistrui. Mes ple'ma konnar an gwasker?

¹⁴ Delivrys vydh yn skon an re gweskys dhe'n dor yn kargharow; ny verwons y'n pytt, na ny fyllons a vara.

¹⁵ Rag my yw an Arloedh, dha Dhuw, neb a ankres an mor, may tarenno an tonnow; Arloedh an luyow yw ow hanow.

¹⁶ My re worras ow geryow yn dha anow, ha'th kudha yn skeus ow leuv, owth ystynn an nevow, hag ow fondya selyow an norvys, hag ow leverel dhe Sion, ‘Ty yw ow fobel.’

¹⁷ Difun, difun! Sav yn-bann, A Yerusalem, ty neb re evas orth dorn an Arloedh hanaf y sorr, neb re evas bys y'n godhes an bolla a vedhwenep.

¹⁸ Nyns eus denvyth dh'y hembronk yn mysk oll an vebyon re omdhuk; nyns eus denvyth dh'y synsi er an dhorn yn mysk oll an vebyon re vagas.

¹⁹ An dhew dra ma re hwarva dhis; piw a geskodhev genes? Gwastya ha distrui, divoetter ha kledha; piw a'th konfort?

²⁰ Dha vebyon re glamderas, i re wrowedhas orth penn pub stret avel gavrewik yn roes; leun yns a gonnar an Arloedh, keredh dha Dhuw.

²¹ Ytho klew hemma, ty druan, neb yw medhow, mes a-der gans gwin.

²² Yndellma y lever dha Arloedh, an Arloedh, dha Dhuw neb a bled ken y bobel: Otta, my re gemmeras dhiworth dha dhorn an hanaf a vedhwenep. Ny evydh nevra na fella a volla ow honnar.

²³ Ha my a'n gorr yn dorn dha dormentorys, neb a leveris dhis, ‘Pleg dhe'n dor rag may kerthyn warnas’; ha ty re wrug dha geyn avel an dor, hag avel an stret rag tus dhe dremena warnodho.