Ysay 47 - An Bibel Kernewek 20234 (Kernewek Kemmyn)

Koedh Babylon

¹ Deus yn-nans hag esedh y'n doust, A wyrghes, myrgh Babylon! Esedh war an dor heb tron, myrgh Kaldea! Rag ny'th henwir na fella tender ha bleudh.

² Kemmer an meyn-melin ha mal bleus, dile dha vayl, destrypp lostenn dha bows, diskudh dha dhiwarr, tremen der an avonyow.

³ Diskudhys vydh dha noethedh, ha gwelys vydh dha veth. My a dhial, ha ny sparyav denvyth.

⁴ Agan dasprenyas, Arloedh an luyow y hanow, an Sans a Ysrael.

⁵ Esedh yn taw, ha ke yn tewlder, A vyrgh Kaldea! Rag ny'th henwir na fella mestres gwlaskordhow.

⁶ My a sorras orth ow fobel, my a dhisakras ow ertach; my a's ros y'th tiwdhorn, ny dhiskwedhsys truedh dhedha; war an re goth y hwrussys dha yew fest poes.

⁷ Ty a leveris, ‘My a vydh mestres bys vykken.’ Ny withsys an taklow ma y'th kolonn, na perthi kov a'ga diwedh.

⁸ Lemmyn ytho, klew hemma, ty garores plesour, neb a esedh yn sawder, neb a lever yn hy holonn, ‘My! Nyns eus ken onan a-der my! Ny esedhav avel gwedhwes, na perthi koll fleghes.’

⁹ An dhew dra ma a dheu warnas, a-dhistowgh, a-ji dhe unn jydh: koll fleghes ha gwedhowses a dheu warnas yn leun, yn despit dhe'th husow pals, ha galloes meur dha worhanow.

¹⁰ Ty a omglewo saw y'th troktra; ty a leveris, ‘Ny'm gwel denvyth.’ Dha skians ha'th aswonnvos a'th toellas, ha ty a leveris y'th kolonn, ‘My! Nyns eus ken onan a-der my.’

¹¹ Mes drog a dheu warnas, na' fydh y dhefendya dre soena. Terroes a goedh warnas, na' fydh y woheles, hag a-dhistowgh y teu distruyans warnas, ma na wodhes anodho travyth.

¹² Sav fast y'th husow ha'th hworhanow pals, gansa may lavursys a-dhia'th yowynkneth; martesen ty a yll gwaynya prow, martesen ty a yll ownekhe dredha.

¹³ Skwith yth os gans dha gusulyansow pals; seves ha'th sawya an re a hwither an nevow, neb a vir orth an ster; an re a dhargan yn termyn an loer nowydh an pyth a dheu warnas.

¹⁴ Mir, avel sowl yth yns, an tan a's lesk; ny's teves omdhelivra dhiworth nerth an flamm. Nyns yw hemma glow rag omdoemma, na tan mayth esedhir a-ragdho.

¹⁵ Yndella dhis yw an re may lavursys gansa, neb re genwerthas genes a-dhia'th yowynkneth. I oll a wander yn aga hynsyow aga honan; nyns eus denvyth dhe'th sawya.