Ysay 44 - An Bibel Kernewek 20234 (Kernewek Kemmyn)

Bennath Duw war Ysrael

¹ Mes klew lemmyn, A Yakob, ow gwas, hag Ysrael neb re dhewisis!

² Yndellma y lever an Arloedh a'th wrug, neb a'th formyas a'n dorr, hag a wra dha weres: Na borth own, a Yakob, ow gwas, Yeshurun neb re dhewisis.

³ Rag my a dhinwa dowr war an syghtir, ha stredhow war an dor krin; ha my a dhinwa ow spyrys war dha has, hag ow bennath war dha agh.

⁴ Hag i a dyv kepar dell vens yn mysk gwels, avel helyk ryb stredhow dowr.

⁵ Hemma a lever, ‘Dhe'n Arloedh yth ov’, y gila a vydh gelwys gans hanow Yakob, hag onan arall a vynn skrifa war y leuv, ‘Dhe'n Arloedh’ ha kemmeres an hanow a enor ‘Ysrael’.

⁶ Yndellma y lever an Arloedh, Myghtern Ysrael, ha'y Dhasprenyas, Arloedh an luyow: My yw an kynsa ha my yw an diwettha, hag a-der my nyns eus duw.

⁷ Piw yw haval dhymm? Dylles ev, meneges ev ha'y dhiskwedhes dhymm. Piw yw re dharleveris an taklow a dheu? Leverens dhyn an pyth yw hwath dhe dhos.

⁸ Na berthewgh own, bedhewgh diagha! A ny dharleveris dhis seuladhydh ha'y veneges? Hwi yw ow dustuniow. Eus Duw a-der my? Nyns eus karrek, ny aswonnav kammenn.

Follneth Gordhyans Idolys

⁹ Oll myns a wra imajys yw mann, ha'n taklow may lowenhons ynna yw diles. Aga dustunioryon yw heb gweles ha heb godhvos, ytho i a berth meth.

¹⁰ Piw re wrug duw po teudhi imaj gravys na'n jeves les kammenn?

¹¹ Otta, oll y hynsa a's tevydh meth, ha nyns yw an greftoryon marnas tus; omguntellens i oll, sevens yn-rag; i a vydh ownek, i a berth meth war-barth.

¹² An gov a gemmer toul, hag oberi ganso war regydh, ha shapya imaj gans mortholow, ha'y wul gans nerth y vregh; dhodho yma nown ha'y nerth a fyll, ny yv dowr, hag ev a glamder.

¹³ An ser prenn a ystynn kordenn-vusura, ev a'n merk gans mynowes, ev a'n shap gans raskow hag a'n merk gans kompas; ev a'n shap dhe hevelep gour, gans tekter den, may trikko yn chi.

¹⁴ Ev a dregh kederwydh, hag a dhewis glastanenn po derwenn ha gasa dhedhi tevi krev yn mysk gwydh an koes; ev a blans lowrwydhenn ha'n glaw a's mag.

¹⁵ Ena y teu ha bos keunys rag den. Ev a gemmer rann anedha hag a omdoemm; ev a enow tan hag a beb bara; ynwedh y hwra duw ha'y wordhya, ev a wra imaj gravys hag a goedh dhe'n dor a-ragdho.

¹⁶ Hanter anodho ev a lesk yn tan; a-ugh an hanter ma ev a rost kig ha'y dhybri, ha lenwys yw; ynwedh ev a omdoemm hag a lever, ‘Aha, toemm ov, my re welas an tan!’

¹⁷ A'n remenant arall ev a wra duw, y imaj, ha koedha dhe'n dor a-ragdho ha'y wordhya; ev a bys dhodho hag a lever, ‘Delirv vy, rag ty yw ow duw.’

¹⁸ Ny wodhons, na ny gonvedhons; rag aga dewlagas yw drogurys bys ma na welons, ha'ga holonn bys ma na gonvedhons.

¹⁹ Ny breder nagonan yn y golonn, na nyns eus godhvos na konvedhes dhe leverel, ‘Hanter anodho re loskas y'n tan, ynwedh my a bebis bara war y regydh, my a rostyas kig ha dybri. A wrav vy tra gasadow a'y remenant? A wrav vy koedha dhe'n dor a-rag stokk a brenn?’

²⁰ Ev a beur war lusu, kolonn doellys re'n kammhembronkas, ha ny'n jeves delivra y enev na leverel, ‘A nyns eus gow y'm leuv dhyghow?’

Nyns yw Ysrael Ankevys

²¹ Porth kov a'n re ma, A Yakob, hag Ysrael, rag ty yw ow gwas; my a'th formyas, ty yw ow gwas; A Ysrael, ny vydhydh ankevys genev.

²² My re skubas dhe-ves dha dreuspassow avel kommolenn, ha'th peghosow avel niwl; dehwel dhymm, rag my re'th tasprenas.

²³ Kenewgh, A nevow, rag an Arloedh re'n gwrug, germewgh, A dhownderyow an norvys; germewgh gans joy, A venydhyow, An goeswik ha pub gwydhenn eus ynno! Rag an Arloedh re dhasprenas Yakob, hag ev a vydh glorifiys yn Ysrael.

²⁴ Yndellma y lever an Arloedh, dha Dhasprenyas, neb a'th formyas y'n dorr: My yw an Arloedh, a wrug pup-tra, neb a ystynnas an nevow ow honan, hag a lesas an norvys ow honan;

²⁵ neb a lett toknys oferysi-dhargan, hag a wra ges a goelyogyon; neb a dreyl tus fur war-dhelergh, ha gul foll aga godhvos;

²⁶ neb a surha ger y was, hag a gowlwra kusul y gannasow; neb a gews a Yerusalem, ‘Hi a vydh annedhys’, hag a-dro dhe sitys Yuda, ‘I a vydh drehevys, ha my a dhastrehav aga magoryow’;

²⁷ neb a lever dhe'n keynvor, ‘Bydh sygh! ha my a sygh agas avonyow’;

²⁸ neb a gews a Kyrus, ‘Ow bugel yw ev, hag ev a gollenow ow forpos oll’; ow leverel a-dro dhe Yerusalem, ‘Bedhes dastrehevys’, hag a-dro dhe'n tempel, ‘Bedhes hy selven desedhys yn y le.’