Ysay 43 - An Bibel Kernewek 20234 (Kernewek Kemmyn)

Ambos Daspren

¹ Ha lemmyn yndellma y lever an Arloedh, ev neb a'th wrug, A Yakob, hag ev neb a'th formyas, A Ysrael: Na borth own, rag my re'th prenas ha re'th henwis orth hanow, dhymmo vy yth os.

² Pan dremenydh der an dowrow y fydhav genes, ha der an avonyow, ny livons warnas; pan gerdhydh dre dan, ny vydhydh leskys, ha ny wra an flamm dha woleski.

³ Rag yth ov an Arloedh, dha Dhuw, an Sans a Ysrael, dha Selwyas. Ejyp a rov avel dha dhaspren, Ethiopia ha Seba yn keschanj ragos.

⁴ Rag ty yw drudh y'm golok hag enorys, ha my a'th kar; y rov tus yn keschanj ragos, kenedhlow yn keschanj rag dha vewnans.

⁵ Na borth own, rag yth esov genes; dhiworth an howldrevel y trov dha has, dhiworth an howlsedhes y'th kuntellav.

⁶ My a lever dhe'n gledhbarth, ‘Daskorr i!’ ha dhe'n dhyghowbarth, ‘Na wra aga lesta! Dro ow mebyon a'n pellder ha'm myrghes a benn an norvys,

⁷ pub huni neb yw henwys orth ow hanow, neb re wrugavy rag ow glori, neb a formis vy ha kreatya.’

⁸ Dro yn-rag an bobel yw dall, mes yma dewlagas dhedha, an re yw bodhar, mes yma diwskovarn dhedha.

⁹ Oll an kenedhlow re dheuth war-barth ha'n poblow res omguntellas. Piw yn aga mysk a dherivas hemma, ha darleverel an taklow kyns? Degens aga dustunioryon rag aga justifia, ha klewens ha leverens, ‘Gwir yw.’

¹⁰ ‘Hwi yw ow dustunioryon’, y lever an Arloedh, ha'm gwas a dhewisis, rag may hwodhvowgh ha krysi dhymm, ha konvedhes, my dhe vos ev. Kyns my ny veu Duw formys, na ny vydh nevra war ow lergh.

¹¹ My, my yw an Arloedh, hag a-der my nyns eus selwyas.

¹² My a dherivas hag a selwis hag a dhellos, pan nag esa Duw astranj yn agas mysk, ha hwi yw ow dustunioryon, y lever an Arloedh, my dhe vos Duw.

¹³ Ynwedh alemma rag my yw ev; nyns eus denvyth a yll delivra dhiworth ow dorn; my a ober ha piw a yll y lettya?

¹⁴ Yndellma y lever an Arloedh, dha dhasprenyer, an Sans a Ysrael: A'gas govis y tannvonav dhe Babylon, ha distrui aga fowesigyon oll, y'n gorholyon mayth esa aga kriow lowen ow tasseni.

¹⁵ My yw an Arloedh, agas Sans, formyer Ysrael, agas myghtern.

¹⁶ Yndellma y lever an Arloedh, a wra fordh y'n mor, hyns y'n dowrow meur,

¹⁷ neb a dhro yn-mes charett ha margh, lu ha kasor war-barth; i a wrowedh, ny yllons sevel yn-bann, megys yns, avel bubenn dhifeudhys:

¹⁸ na berthewgh kov a'n taklow kyns, na na brederewgh a'n taklow koth.

¹⁹ Otta, y hwrav tra nowydh, lemmyn y hwra ev egina: a ny'n gwelowgh? My a wra hyns y'n difeythtir, avonyow y'n gwylvos.

²⁰ An bestes gwyls a'm enor, an owrgeun ha'n strusyow; rag my a re dowr y'n difeythtir, avonyow y'n gwylvos, dhe ri diwes dhe'm pobel dhewisys,

²¹ an bobel a formis ragov ow honan, rag may teriffens ow gormola.

²² Saw ny elwsys warnav, A Yakob; mes ty re beu skwithys orthiv, A Ysrael.

²³ Ny dhuges dhymm dha dheves rag offrynn leskys, na'm enora gans dha sakrifisow. Ny'th veghis gans offrynnow, na'th skwitha gans frankynkys.

²⁴ Ny brensys dhymm kalamus gans arghans, ha ny resys dhymm gwalgh a vlonek a'th sakrifisow, mes ty re'm beghyas gans dha beghosow; ty re'm skwithas gans dha dhrogoberow.

²⁵ My, my yw ev neb a dhefend dhe-ves dha dreuspassow a'm govis ow honan, ha ny borthav kov a'th peghosow.

²⁶ Galw vy dhe'n lys, gwren ni mos dhe drial war-barth, diskwedh dha gen, may fi prevys ewn.

²⁷ Dha gynsa tas a beghas, ha'th leverysi a rebellyas er ow fynn.

²⁸ Ytho my a dhisakras pennsevigyon an sentri, my a ros Yakob dhe gowldhistruyans, hag Ysrael dhe dhespit.