Ysay 42 - An Bibel Kernewek 20234 (Kernewek Kemmyn)

An Gwas, Golow dhe'n Kenedhlow

¹ Otta ow gwas neb a skoedhyav, ow den dewisys may lowenha ow enev ynno; my re worras ow Spyrys warnodho, ev a dheg gwirvreus yn-mes dhe'n kenedhlow.

² Ny gri ev na garma, na gul may klewver y lev y'n stret.

³ Korsenn vrewys ny's terr, ha bubenn ow megi ny's difeudh; yn lel y teg gwirvreus yn-rag.

⁴ Ny fyll na ny vydh ev digolonnek, bys pan fastyo gwirvreus y'n norvys; ha'n arvoryow a worta y lagha.

⁵ Yndellma y lever Duw, an Arloedh, neb a wrug an nevow ha'ga ystynn, neb a lesas an norvys ha'n pyth a dheu anodho, neb a re anall dhe'n bobel usi warnodho, ha spyrys dhe'n re a gerdh ynno:

⁶ My yw an Arloedh, my re'th helwis yn ewnder, my a'th syns er an leuv, ha dha witha, my re'th ros yn kevambos dhe'n bobel, golow dhe'n kenedhlow,

⁷ rag igeri an dhewlagas dhall, dhe dhoen yn-mes an brisnoryon a'n vagh, dhiworth an prison an re a esedh yn tewlder.

⁸ My yw an Arloedh, henn yw ow hanow, ow glori ny'n rov dhe gen dhuw, nag ow gormola dhe imajys gravys.

⁹ Otta, an taklow dargenys kyns, hwarvedhys yns, ha taklow nowydh a dherivav lemmyn; kyns i dhe egina anedha y terivav orthowgh.

Kan a Wormola

¹⁰ Kenewgh dhe'n Arloedh kan nowydh, y wormola dhiworth penn an norvys! Tarannes an mor ha pup-tra eus ynno, an arvoryow ha'ga thrigoryon.

¹¹ Dreheves an gwylvos ha'y sitys aga lev, an trevow mayth usi Kedar trigys ynna; kanes trigoryon Sela yn lowen, garmens dhiwar bennow an menydhyow.

¹² Rens i gordhyans dhe'n Arloedh ha derivas i y wormola y'n arvoryow.

¹³ An Arloedh a yn-mes avel gour krev, avel kasor y tifun ev y gonnar, ev a gri, ev a arm yn ughel, ev a dhiskwedh y nerth erbynn y eskerens.

¹⁴ Hirneth my re dewis, my re omwithas stag hag omdempra; lemmyn my a gyn avel benyn ow tineythi, my a arm ha dyena.

¹⁵ My a wra menydhyow ha breow difeyth, ha sygha aga erbys oll; my a dreyl an avonyow dhe ynysow, ha sygha an pollow.

¹⁶ My a hembronk dellyon yn fordh na aswonnons; yn hynsyow na aswonnons y's gidyav. My a dreyl an tewlder a-ragdha dhe wolewder, an tylleryow garow dhe dir leven. An re ma yw an taklow a wrav, ha ny's forsakyav.

¹⁷ An re a drest yn imajys gravys a vydh treylys war-dhelergh hag a berth meth – an re a lever dhe imajys teudh, ‘Hwi yw agan duwow.’

¹⁸ Klewewgh, hwi neb yw bodhar, ha mirewgh, hwi neb yw dall, rag may hwellowgh.

¹⁹ Piw yw dall marnas ow gwas, po bodhar avel ow hannas a dhannvonav? Piw yw dall avello ev neb yw omres dhymm? po dall avel gwas an Arloedh?

²⁰ Ev a wel lies tra, mes ny wra vri anedha, igor yw y dhiwskovarn mes ny glew ev.

Disobayans Ysrael

²¹ Da o gans an Arloedh, dre reson y ewnder, moghhe an lagha ha'y gul gloryus.

²² Mes homm yw pobel ledrys ha ravnys, i oll yw maglennys yn tell ha kudhys yn baghow; devedhys yns ha bos preydh heb denvyth dhe sawya, pyll heb denvyth dhe leverel ‘Daswra!’

²³ Piw yn agas mysk a vynn goslowes orth hemma, ha gul vri ha klewes rag an termyn a dheu?

²⁴ Piw a ros Yakob dhe'n ravner, hag Ysrael dhe'n ladron? A ny veu an Arloedh er y bynn may peghsyn? Ny vynnsons kerdhes yn y fordhow, ha ny vynnsons bos gostydh dh'y lagha.

²⁵ Ytho ev a dhinewis warnodho toemmder y sorr, ha nerth an gas. Ev a worras tan ynno a-derdro, mes ny gonvedhas, ev a'n loskas, mes ny'n kemmeras yn y golonn.