Ysay 38 - An Bibel Kernewek 20234 (Kernewek Kemmyn)

Kleves Hezekia

¹ Y'n dydhyow na Hezekia o klav bys yn eneworres, hag Ysay mab Amos an profoes a dheuth dhodho, ha leverel dhodho, ‘Yndellma y lever an Arloedh: Roy arghadow dhe'th chi, rag ty a verow ha ny vewydh.’

² Ena Hezekia a dreylyas y fas dhe'n fos ha pysi war an Arloedh,

³ ha leverel, ‘A Arloedh, porth kov, my a'th pys, fatell esen ow kerdhes a-ragos yn gwiryonedh hag a leun golonn, ha my re wrug an pyth yw da y'th wolok.’ Ha Hezekia a oelas yn hwerow.

⁴ Ena ger an Arloedh a dheuth dhe Ysay, ow leverel,

⁵ ‘Ke ha lavar dhe Hezekia, Yndellma y lever an Arloedh, Duw Davydh dha das: My re glewas dha bysadow, my re welas dha dhagrow; awottavy ow keworra dhe'th tydhyow pymthek blydhen.

⁶ My a wra dha dhelivra jy ha'n sita ma yn-mes a leuv myghtern Assyria, ha defendya an sita ma.

⁷ ‘Ha homm yw an tokyn dhis dhiworth an Arloedh, y hwra an Arloedh an dra ma re ambosas:

⁸ My a wra dhe'n skeus tewlys gans an howl war grisyow Ahaz treylya war-dhelergh deg gris.’ Ytho an howl eth war-dhelergh war an deg gris may hwrussa mos yn-nans.

⁹ Skrifenn Hezekia myghtern Yuda, pan via klav ha bos yagh wosa y gleves:

¹⁰ My a leveris: Yn hanter-dydh ow bewnans res yw dhymm mos; ha bos niverys yn yetys ifarn yn remenant ow blydhynyow.

¹¹ My a leveris, Ny welav an Arloedh yn tir an re vew; ny virav orth den byth moy yn mysk trigoryon an norvys.

¹² Ow thrigva yw tennys yn-mes ha destryppys dhiworthiv avel tylda bugel; avel gwiader re rolis vy ow throgel; ev a'm tregh dhe-ves dhiworth an steuv; dydh ha nos ty a'm dre dhe dhiwedh.

¹³ My a wrowedhas bys vyttin; avel lew, yndella ev a derr oll ow eskern; dydh ha nos ty a'm dre dhe dhiwedh.

¹⁴ Kepar ha gwennel po garan, yndella y gryllis; my a gynis kepar ha kolomm. Ow dewlagas a fyll ow mires war-vann. A Arloedh, yma ankres dhymm, bydh goestel ragov.

¹⁵ Pandr'a lavarav? Ev re gewsis dhymm, hag ev y honan re'n gwrug. My a gerdh yn lent oll ow blydhynyow drefenn hwerowder ow enev.

¹⁶ Arloedh, der an taklow ma tus a vew, hag ynna oll yma bewnans ow spyrys. Ty a'm restoryas dhe yeghes ha gul dhymm bewa.

¹⁷ Otta rag les y feu dhymm hwerowder; mes ty re withas ow enev dhiworth an pytt a dhistruans, rag ty re dewlis oll ow feghosow a-dryv dha geyn.

¹⁸ Rag ny yll ifarn godhvos gras dhis, na ny yll ankow dha wormel; an re a dhiyskynn dhe'n pytt ny yllons gwaytyas dha wiryonedh.

¹⁹ Den bew, ny yll marnas den bew dha wormel, avelov vy hedhyw; tasow a wra godhvedhys dhe vebyon dha wiryonedh.

²⁰ An Arloedh a'm saw, ha ni a gan gans daffar kerdyn oll dydhyow agan bewnans yn chi an Arloedh.

²¹ Ysay a lavarsa, ‘Drens powltis a figys ha'y lesa war an brewvann may fo yaghhes.’

²² Ynwedh Hezekia a leveris, ‘Pandr'a vydh an tokyn my dhe yskynna dhe ji an Arloedh?’