Ysay 37 - An Bibel Kernewek 20234 (Kernewek Kemmyn)

Hezekia a Hwila Kusul Ysay

¹ Pan glewas myghtern Hezekia hemma, ev a skwardyas y dhillas, omgwetha yn yskar ha dos yn chi an Arloedh.

² Ev a dhannvonas Elyakim, governour an palys, ha Shebna an pennskrifennyas ha henavogyon an oferysi, kwethys yn yskar, dhe Ysay mab Amos an profoes.

³ Yn-medhons dhodho, ‘Hezekia a lever hemma: An jydh ma yw dydh a alar ha keredh ha bismer; rag mebyon re dheuth bys min konna an brys, mes nyns eus nerth dhe dhineythi.

⁴ Martesen an Arloedh dha Dhuw a glew geryow an Rabshake a wrug y vester myghtern Assyria dannvon dhe wul ges a'n Duw bew, hag ev a geredh an geryow re glewas an Arloedh dha Dhuw. Rakhenna drehav pysadow rag an remenant yw gesys.’

⁵ Pan dheuth servysi myghtern Hezekia dhe Ysay,

⁶ yn-medh Ysay dhedha, ‘Leverewgh yndellma dh'agas arloedh, “Yndellma y lever an Arloedh: Na borth own a'n geryow a glewsowgh, ma'm arvedhas gwesyon myghtern Assyria dredha.

⁷ Ottavy ow korra ynno spyrys, ha pan glew kyhwedhel, ev a dhehwel dh'y bow y honan; ha my a wra dhodho koedha der an kledha yn y bow y honan.” ’

⁸ An Rabshake a dhehwelis ha klewes y hwrug myghtern Assyria omdenna dhiworth Lakish, hag yth esa ow patalyas orth Libna.

⁹ An myghtern a glewas y teuth Tirhaka myghtern Kush yn-mes dhe vatalyas orto. Pan glewas hemma, ev a dhannvonas kannasow dhe Hezekia, ow leverel,

¹⁰ ‘Kewsewgh yndellma dhe Hezekia myghtern Yuda: Na wres dha Dhuw, a drestydh ynno dha doella, owth ambosa na vydh Yerusalem res yn leuv myghtern Assyria.

¹¹ Otta, ty re glewas an pyth re wrug myghternedh Assyria dhe oll an powyow, orth aga leun dhistrui. Ha ty, a vydhydh delivrys?

¹² A wrug duwow an kenedhlow aga delivra, an kenedhlow a wrug ow thasow aga distrui – Haran, Resef, ha mebyon Eden esa yn Telassar?

¹³ Ple'ma myghtern Hamath, ha myghtern Arpad, ha myghtern an sita Sefarvaym, Hena hag Ivva?’

Pysadow Hezekia

¹⁴ Hezekia a gemmeras an lyther a leuv an kannasow, ha'y redya. Ena Hezekia eth yn-bann dhe ji an Arloedh ha'y lesa a-dherag an Arloedh.

¹⁵ Ha Hezekia a bysis dhe'n Arloedh, ow leverel:

¹⁶ ‘A Arloedh an luyow, Duw Ysrael, a esedh war an cherubim, ty yw Duw, ty dha honan, dhe oll gwlaskordhow an norvys. Ty re wrug nev ha nor.

¹⁷ Pleg dha skovarn yn-nans, A Arloedh, ha klew; igor dha dhewlagas, A Arloedh, ha gwel; klew oll geryow Sennagherib, re dhannvonas dhe skornya an Duw bew.

¹⁸ Gwir yw, Arloedh, myghternedh Assyria dhe dhistrui oll an kenedhlow ha'ga thiryow,

¹⁹ ha re dewlis aga duwow y'n tan. I a's distruis, rag ny vons duwow, mes gweyth diwla den, prenn ha men.

²⁰ Lemmyn, A Arloedh agan Duw, saw ni yn-mes a'y leuv, may hwodhvo oll gwlaskordhow an norvys, ty dha honan dhe vos an Arloedh.’

²¹ Ena Ysay mab Amos a dhannvonas dhe Hezekia, ow leverel, ‘Yndellma y lever an Arloedh, Duw Ysrael: Rag ty dhe bysi warnav a-dro dhe Sennagherib, myghtern Assyria,

²² hemm yw an ger re gewsis an Arloedh er y bynn: ‘Hi a'th tispres, hi a'th skorn – an wyrghes, myrgh Sion; myrgh Yerusalem re shakyas hy fenn war dha lergh.

²³ Piw a wrussys y skonya ha'y gabla, ha piw y trehevsys dha lev er y bynn, ha drehevel dha dhewlagas yn-bann? Erbynn Sans Ysrael!

²⁴ Dre leuv dha servysi ty re skornyas an Arloedh ha leverel, “Gans ow lies charett my res eth yn-bann dhe dopp an menydhyow, dhe bella rannow Lebanon. My re droghas an hirra a'y gederwydh, an gwella a'y veryw. My re dheuth dh'y fenn pella, dhe brysk y goeswik.

²⁵ My re balas puthow hag eva dowrow; my re dhesyghas dre wodhen ow throes oll goverow Ejyp.”

²⁶ ‘A ny glewsys jy? Nans yw pell my a ordenas hemma. Yn dydhyow koth my a'n tewlis; lemmyn my re wrug dhodho hwarvos, rag may fydhydh ow tifeythya sitys kerys yn kalsow a radell.

²⁷ Aga annedhysi, isel aga nerth, o digolonnek ha penndegys; i re dheuth ha bos avel plansow an gwel, kepar ha gwels bleudh kepar ha gwels war dohow goleskys gans gwyns an est.

²⁸ ‘Mes my a woer pan sevydh ha pan esedhydh, pan edh yn-mes ha pan dheudh a-ji ha fatell gonnerydh er ow fynn.

²⁹ Rag ty dhe gonneri er ow fynn ha'th valghder dhe dhos dhe'm diwskovarn, my a worr ow hig y'th troen, ha'm genva y'th tiwweus, ha my a wra dhis dehweles war an fordh may teuthys warnedhi.

Arwoedh rag Hezekia

³⁰ ‘Ha hemma a vydh an tokyn ragos: y'n vlydhen ma an pyth a dyv y honan a vydh dybrys, hag y'n nessa blydhen an pyth yw honan-hesys, mes y'n tressa blydhen hesewgh, mysewgh, plensewgh gwinlannow ha dybrewgh aga frutys;

³¹ An remenant gesys a ji Yuda a wreydh war-nans, ha doen frut war-vann;

³² rag remenant a yn-mes dhiworth Yerusalem, ha diankoryon dhiworth menydh Sion. Avi Arloedh an luyow a wra hemma.

³³ ‘Rakhenna yndellma y lever an Arloedh a-dro dhe vyghtern Assyria: Ny dheu a-ji dhe'n sita ma na tenna seth ena. Ny dheu er hy fynn gans skoes na krugya gweyth-esedhva er hy fynn.

³⁴ War an fordh may teuth, war an keth honna ev a dhehwel, ha ny dheu a-ji dhe'n sita ma, yn-medh an Arloedh.

³⁵ My a vydh skoes dhe'n sita ma dh'y sawya a-barth dhymmo vy hag a-barth Davydh ow gwas.’

Fethans ha Mernans Sennagherib

³⁶ Ena el an Arloedh eth yn-mes ha gweskel pymp ha naw-ugens a vilyow yn kamp Assyria; ha pan sevis tus ternos, otta, korfow marow ens i oll.

³⁷ Ena Sennagherib myghtern Assyria a omdennas, mos tre ha triga yn Nineve.

³⁸ Hag y hwarva, pan esa ow kordhya yn chi Nisrok y dhuw, Adrammelek ha Shareser y vebyon a'n ladhas gans an kledha, hag i a skapyas dhe bow Ararat. Hag Esarhaddon y vab a reynyas yn y le.