Ysay 19 - An Bibel Kernewek 20234 (Kernewek Kemmyn)

Profoesans a-dro dhe Ejyp

¹ Profoesans a-dro dhe Ejyp. Awotta'n Arloedh ow marghogeth war gommolenn skav hag ow tos bys yn Ejyp; idolys Ejyp a gren a-ragdho, ha kolonn Ejyp a deudh a-bervedh ynno.

² My a sett Ejyp erbynn Ejyp; pubonan a vatal orth y vroder, ha pubonan orth y gentrevek, sita orth sita, ruvaneth orth ruvaneth.

³ Spyrys Ejyp a fyll a-ji dhodho; my a dhiswra y gusul; i a hwila an idolys ha spyrysyon an re varow, an nygromonsoryon ha'n goelyogyon.

⁴ My a dhelirv Ejyp yn leuv arlydhi fell; myghtern fers a's rewl, yn-medh an Arloedh, Arloedh an luyow.

⁵ Dowr dhiworth an mor a dhesygh, ha gweli an avon a vydh kras ha sygh.

⁶ An dowrgleudhyow a vydh flerys, ha kanolyow Ejyp a fyll ha sygha. Kors ha keun a wedher;

⁷ korsegi ryb an Nil, orth heyl an Nil, ha pup-tra yw hesys ryb an Nil a vydh sygh, hag a vydh hwythys dhe-ves, ha bos gyllys glan.

⁸ An byskadoryon a gyn, hag oll an re a dewl higow y'n Nil a alar; an re a les roesow war enep an mor a wannha.

⁹ Gweythoryon gans lin kribys a vydh digolonnek, ha'n wiadoryon a vydh gwannliwek.

¹⁰ Hy gonisysi a vydh digolonnek, oll an re a ober rag arveth a vydh grevys.

¹¹ Yn hwir, fellyon yw pennsevigyon Soan; kusulyoryon fur Faro a re kusul gokki. Fatell leverowgh dhe Faro, ‘Mab tus fur ov vy, mab myghternedh goth’?

¹² Ytho ple'ma agas tus fur? Leverens orthis, ha derivens an pyth re erviras Arloedh an luyow erbynn Ejyp.

¹³ Pennsevigyon Soan a dheuth ha bos fellyon, pennsevigyon Nof yw toellys; pennmeyn hy loethow re ledyas Ejyp yn stray.

¹⁴ An Arloedh re gemmyskas a-ji dhedhi spyrys gorth; i a wra dhe Ejyp trebuchya yn oll hy gwriansow, kepar dell drebuch penn-medhow yn y hwyj.

¹⁵ Ny'n jevydh Ejyp travyth dhe wul, penn na lost, palm na korsenn.

¹⁶ Y'n jydh na Ejyp a vydh avel benynes. I a gren rag own, a-rag leuv Arloedh an luyow, a wra ev hy shakya er aga fynn.

¹⁷ Pow Yuda a vydh euth dhe Ejyp; peub may fo kampoellys dhodho a vydh dyegrys drefenn kusul Arloedh an luyow, a erviras er aga fynn.

Bennath ow Tos war Ejyp, Assyria hag Ysrael

¹⁸ Y'n jydh na y fydh pymp sita yn pow Ejyp ow kewsel taves Kanan hag ow ti lelder dhe Arloedh an luyow. Onan anedha a vydh henwys Sita an Howl.

¹⁹ Y'n jydh na y fydh alter dhe'n Arloedh yn kres pow Ejyp, ha peulven dhe'n Arloedh orth hy or.

²⁰ Ev a vydh tokyn ha dustuni dhe Arloedh an luyow yn pow Ejyp. Pan grions dhe'n Arloedh drefenn an arwaskoryon, ev a dhannvon dhedha selwador, hag ev a's menten ha'ga delivra.

²¹ An Arloedh a wra y honan aswonnys dhe Ejyp, hag Ejyp a aswonn an Arloedh y'n jydh na, ha gul sakrifisow hag offrynnow greun; i a ambos ambosow dhe'n Arloedh ha'ga hewera.

²² An Arloedh a wysk Ejyp gans pla, ow kweskel hag ow sawya. I a dreyl dhe'n Arloedh hag ev a woslow orth aga fysadow, ha'ga sawya.

²³ Y'n jydh na y fydh fordh-veur dhiworth Ejyp bys yn Assyria, hag Assyria a vydh kevrennys gans Ejyp, hag Ejyp gans Assyria. Ejyp hag Assyria a wordh war-barth.

²⁴ Y'n jydh na Ysrael a vydh an tressa war-barth gans Ejyp hag Assyria, bennath yn kres an norvys.

²⁵ Arloedh an luyow a's bennik, ow leverel, ‘Benniges re bo ow fobel Ejyp, hag ober ow diwla Assyria, hag Ysrael ow eretons.’