Ysay 18 - An Bibel Kernewek 20234 (Kernewek Kemmyn)

Profoesans a-dro dhe Ethiopia

¹ Go-hi, gwlas a skathow-goelya eus dres avonyow Kush,

² neb a dhannvon kannasow war an mor, yn lestri papyrus war enep an dowr. Kewgh, hwi gannasow skav, dhe genedhel hir ha smodh aga kroghen, dhe bobel ownys ogas ha pell, kenedhel grev ha breselek, neb yw hy thir rynnys gans avonyow.

³ Oll trigoryon an norvys hag annedhysi an bys, pan vydh baner drehevys war an menydhyow, mirewgh! ha pan vydh hirgorn hwythys, klewewgh!

⁴ Yndellma y lever an Arloedh dhymm: My a vydh kosel ha mires dhiworth ow thrigva avel toemmder kler y'n howlsplann, avel kommolenn gluth yn toemmder an drevas.

⁵ Ytho, kyns an drevas, pan yw an vleujenn gyllys ha'n flour re dheuth ha bos grappa owth adhvesi, ev a dregh an barrennow gans higow-skethra, ha remova ha tenna yn-mes an skorrennow.

⁶ I a vydh gesys war-barth rag ydhyn-preydh an menydhyow ha rag bestes an tir; an ydhyn a spen an hav warnedha hag oll bestes an tir a spen an gwav warnedha.

⁷ Y'n termyn na rohow a vydh dres dhe Arloedh an luyow dhiworth pobel hir ha leven, dhiworth pobel ownys ogas ha pell, kenedhel grev a drett yn-dann dreys, mayth yw y wlas rynnys gans avonyow; i a's dre dhe dyller hanow Arloedh an luyow, dhe venydh Sion.