Ysay 15 - An Bibel Kernewek 20234 (Kernewek Kemmyn)

Profoesans a-dro dhe Moab

¹ Profoesans a-dro dhe Moab: Ar yn Moab yw gwastys, distruys yn unn nos. Kir yn Moab yw gwastys, distruys yn unn nos.

² Dibon re yskynnas dhe'n tempel, dhe'n tylleryow ughel dhe oela; war Nebo ha war Medeba Moab a oul. War bub penn yma bloghter, ha treghys yw pub barv.

³ Y'n stretys i a omwrogys gans yskar; war an tohow hag y'n plenys pubonan a oul, owth oela dagrow.

⁴ Heshbon hag Eleale a gri, aga lev yw klewys bys Yahas. Rakhenna soudoryon Moab a arm, ha'ga enev a gren.

⁵ Ow holonn a gri rag Moab; hy fowesigyon a fi bys Soar, bys Eglath-shelishiya. Yth ons yn-bann owth oela war an fordh-yskynna dhe Luhith; war an fordh dhe Horonaym i a dhrehav garm a gollva.

⁶ Dowrow Nimrim yw ynyal, an gwels yw sygh, an aswels a fyll; nyns eus glasneth na fella.

⁷ Rakhenna an palster a waynsons ha'n gwara a withsons a vydh degys dhe-ves bys yn Nans an Edhel.

⁸ Ytho an arm res eth oll a-dro dre dir Moab; hy oelva a dheu bys yn Eglaym, hy oelva bys yn Beer-elim.

⁹ Rag dowrow Dimon yw leun a woes; mes my a dhre hwath moy war Dimon, lew rag fowesigyon Moab ha rag remenant an tir.