Ysay 14 - An Bibel Kernewek 20234 (Kernewek Kemmyn)

Dehwelyans Ysrael

¹ Rag an Arloedh a gemmer truedh a Yakob, ha dewis Ysrael arta, ha ri powes dhedha war aga thiredh. Alyons a jun gansa, ha glena orth chi Yakob.

² Poblow a's kemmer ha'ga dri dh'aga thyller aga honan. Chi Ysrael a's erit yn tir an Arloedh avel kethyon ha kethesow. I a wra dhe'n re a's kemmeras yn kethneth bos aga hethyon i, hag i a rewl an re a's arwaskas.

Koedh Myghtern Babylon

³ Y'n jydh may hwra an Arloedh ri dhis powes dhiworth dha alar ha'th ankres ha dhiworth an ober kales a veus gwrys dhe lavurya ynno,

⁴ ty a gemmer an kows ma yn-bann erbynn myghtern Babylon, ha leverel: Fatell hedhis an turant! Fatell hedhis an omsettyans!

⁵ An Arloedh re derris lorgh an debeles, an dernwelenn a rewloryon,

⁶ neb a weskis poblow yn sorr gans strokosow heb hedhi, hag yn konnar fetha kenedhlow gans arwask heb fronn.

⁷ Oll an norvys a bowes yn kosel; i a gri gans joy.

⁸ Meryw ynwedh a lowenha warnas, ha kederwydh Lebanon: ‘A-ban veus iselhes, ny yskynn treghyas er agan pynn.’

⁹ Ifarn a-woeles yw amovys ragos, dhe'th vetya pan dheudh; ev a dhifun spyrysyon an re varow ragos oll myns a veu ledyoryon an norvys; ev a dhrehav dhiworth aga thronys oll myghternedh an kenedhlow.

¹⁰ I oll a'th worthyp ha leverel dhis, ‘Ty ynwedh yw ydhil avelon, ty yw devedhys ha bos haval dhyn.’

¹¹ Dha veuredh yw dres yn-nans dhe ifarn, gans son dha delynnow; yma gweli a gontron lesys yn-dannos, ha pryves yw dha gudhans.

¹² Fatell osta koedhys dhiworth nev, A Vorlowenn, mab an bora! Ty re beu treghys dhe'n dor, neb a fethas kenedhlow.

¹³ Ty a leveris y'th kolonn, ‘My a yskynn dhe nev; my a dhrehav ow thron a-ugh ster Duw; esedhys vydhav war venydh an kuntelles, yn pella rannow an gogledh;

¹⁴ my a yskynn a-ugh keyn an kommol; my a vydh kepar ha'n Ughella.’

¹⁵ Mes ty yw dres yn-nans dhe ifarn, dhe bella rannow an pytt.

¹⁶ An re a'th wel a hwither orthis ha prederi ahanas: ‘Yw hemma an gour a gryghyllis an nor, ha wul dhe wlaskordhow krena,

¹⁷ neb a wrug an nor avel gwylvos, neb a dhomhwelas y sitys, ha ny asas y brisnoryon dhe vos tre?’

¹⁸ Oll myghternedh an kenedhlow, a wrowedh yn glori, peub yn y vedh y honan;

¹⁹ mes ty, ty yw tewlys yn-mes, a-ves dhe'th vedh, avel barrenn gasadow, kudhys gans an re ledhys, an re gwenys gans an kledha, neb a dhiyskynn dhe veyn an pytt avel korf trettys yn-dann dreys.

²⁰ Ny vydhydh junys gansa yn ynkleudhyans, rag ty a dhistruis dha dir, ha ladha dha bobel. Ny vydh henwys bys vykken has an debeles.

²¹ Pareusewgh ladhva rag y vebyon drefenn peghosow aga thasow; ma na saffons hag erita an tir ha lenwel enep an nor a sitys.

²² My a sev er aga fynn, yn-medh Arloedh an luyow, ha treghi dhiworth Babylon hanow ha remenant, agh ha linyeth, yn-medh an Arloedh.

²³ My a's gwra yn perghennogeth rag sort, ha pollow dowr, ha'y skuba dhe-ves gans an skubell a gollva, yn-medh Arloedh an luyow.

Profoesans a-dro dhe Assyria

²⁴ Arloedh an luyow re dos, ow leverel: Kepar dell vynnis vy, yndella y hwer; ha kepar dell erviris, yndella y sev:

²⁵ dhe derri Assyria y'm tir, ha'y drettya yn-dann dreys war ow menydhyow; Y yew a vydh kemmerys dhiwarnedha, ha'y vegh a vydh kemmerys a-dhiwar aga skoedh.

²⁶ Hemm yw an towl ervirys rag oll an norvys; ha homm yw an leuv ystynnys war oll an kenedhlow.

²⁷ Ytho Arloedh an luyow re erviris, ha piw a'n lest? Y leuv yw ystynnys, ha piw a's treyl dhe-ves?

Profoesans a-dro dhe Filistia

²⁸ Yn blydhen mernans myghtern Ahaz y feu an profoesans ma:

²⁹ Na lowenha, Filistia, ty oll, drefenn bos dralys an welenn a'th weskis; rag dhiworth gwreydhenn an sarf y teu nader, ha'y frut a vydh sarf askellek.

³⁰ An re gynsa-genys a'n voghosogyon a beur, ha'n edhommogyon a wrowedh yn sawder. Mes my a dhistru dha gyf gans divoetter; ha ladha dha remenant.

³¹ Oul a yet, kri a sita; teudh yn own, Filistia, ty oll. Mog a dheu dhiworth an gogledh, ha nyns eus termynek yn y renkow.

³² Fatell worthyp kannasow an genedhel? ‘Yth yw an Arloedh neb re selyas Sion, ha boghosogyon y bobel a hwila harber ynni.’